YELAGATI OYCHCHIYO OYSHAA
Taani Timirtte Keettaa Biyogaa Dosana Xayikko Waatoo?
Hanqqettiya asttaamareta. Laggeti iitabawu denttettiyogaa. Timirtte keettan imettiya unꞌꞌissiya paacetanne keehi daro so oosuwa. Neeni timirtte keettaa biyogaa dosana xayikko, hegaayyo loꞌꞌo gaasoy deꞌana danddayees. a Layttay 19 gidido Racheela b hagaadan gaasu:
“Taani timirtte keettaappe harasaa awanne biyakko ixxikke. Timirtte keettaa biyogaappe, abbaa doonaa biyakko woy ta laggetuura wodiya aattiyakko woy ubba tana yelidaageeta qumaa kattiyogan woy keettaa geeshshiyogan maaddiyakko dosays!”
Neeyyokka Racheeliigaadan siyettikko, neeni timirttiya wurssada shemppana gakkanaashin timirtte keettan takkiyo layttaa qasho keettadan xeellana danddayaasa. Neeni timirtte keettan takkiyo wodiyabaa loꞌꞌobaa qoppana danddayay?
Hagaa eray? Neeni timirtte keettaabaa loꞌꞌobaa qoppiyo wode, oottiyobaa doorananne timirtte keettaa neeni gencciyo metiya sohodan xeelliyogaa aggana danddayaasa. Timirtte keettay neeni gasttiyo wode goꞌettiyo eraa demmanaadaaninne gujjanaadan oottiyaba gidana.
Timirtte keettaa loꞌꞌobadan xeellanawu kaallidi deꞌiyabata qoppa:
Ne timirttiya. Neeni timirttiyan sugiyogee, sinttappe ooso sohuwaninne deꞌuwan hara ogetun metoy gakkiyo wode ubbatoo haratu maaduwa oychchiyogaappe nerkka giigissanaadan maaddana. ‘Timirtte keettaa biyogaa dosennaadan oottiyabati deꞌikkokka, taani ta timirttiyappe demmiyo goꞌꞌay aybee?’ gaada nena oychcha.
Geeshsha Maxaafaa maaraa: “Lo77o aadhdhida eratettaanne adussi qoppiyoogaa naaga.”—Leemiso 3:21.
Gujjada eranawu, “Taani Timirttiyan Kunddikko Shin?” giya huuphe yohuwa xeella.
Ne meezetidobata. Neeni timirtte keettan meezetiyo loꞌꞌobati ne wodiya waata goꞌettanaakko, nena nerkka seeriyagaa gidanaadaaninne minna oottiyo meeziya, hegeekka neeni gasttiyo wode koshshiya eeshshata tamaaranaadan maaddana. Nena hagaadan oychcha: ‘Taani timirtte keettan meeze oottiyo loꞌꞌobati tana seeriyagaanne loꞌꞌo oosanchcha gidanaadan tana maaddiyoy ayba ogetuunee? Hegaara gayttidaagan ay giigissana danddayiyanaa?’
Geeshsha Maxaafaa maaraa: “Minnidi oottidoban ubban go77ai de7ees.”—Leemiso 14:23.
Gujjada eranawu, “Ta Wodiya Waata Loytta Goꞌettana Danddayiyanaa?” giya huuphe yohuwa xeella.
Neeyyo haratuura deꞌiya gaytotettaa. Neeni timirtte keettan nenaara tamaariyageeta oyqqiyo ogee, haratuyyo qarettiyagaanne eta bonchchiyagaa gidanaadan maaddana danddayees. Joshuwa giyo issi yelagay hagaadan giis: “Asaara waati haasayanaakko meezetiyogee taarikiyanne saynisiya timirttiyadan keehi koshshiyaba. Hegee neeni ne deꞌo laytta ubban goꞌettanaba.” Nena hagaadan oychcha: ‘Taani haratuura, ubba eti diccido hanotaynne ammaniyobay taagaappe dummatiyogeetuura sarotettan deꞌiyogaabaa timirtte keettan ay tamaaridanaa?’
Geeshsha Maxaafaa maaraa: “Asa ubbaara saro de7anau minnite.”—Ibraawe 12:14.
Gujjada eranawu, “Asaara Haasayiyogan Waana Qara Gidana Danddayiyanaa?” giya huuphe yohuwa xeella.
Ne sinttanaa. Timirttee neeni ne abbiya eranaadaaninne hegaara maayiya halchchota kessanaadan maaddana danddayees. Bruko giyo yelaga maccaasiya hagaadan gaasu: “Taagaadan neenikka issiban loohana danddayaasa, yaatiyogan neeni timirttiya wurssiyo wode ooso demmana danddayaasa.” Nena hagaadan oychcha: ‘Timirttiya wurssiyo wode ay ooso oottana danddayiyanaa? Taani tamaaridobay hegaa mala oosuwa oottanawu waati maaddanee?’
Geeshsha Maxaafaa maaraa: “Ne gediyaassi ogiyaa salallissa.”—Leemiso 4:26.
