Issi xinaatee qonccissiyoogaadan, Amarkkan deꞌiya yelagatuppe xeetaappe 80 kushe gidiyaageeti woossoosona; shin etappe bagga gidiyaageeti xalla galla galla woossoosona. Issooti issooti hagaadan qoppennan aggokkona: ‘Woosay tawu woppay siyettanaadan oottiyoogaappe hara maadoy deꞌii?’

•  Woosay aybee?

•  Xoossay ta woosaa siyii?

•  Ayba xeelliyaagan woossana danddayiyaanaa?

•  Ne Laggeti woygiyoonaa?

 Woosay ubbabaa Medhdhidaagaara haasayiyo ogee. Hegee keehi gita maata! Yihooway ubbaa asappe ubbabankka keehi aadhdhiyaabaa gidikkonne, “[I] nuuppe ooyyoonne haaho gidenna.” (Oosuwaa 17:27) Geeshsha Maxaafay nuna hagaadan shoobbees: “Xoossaakko shiiqite; ikka inttekko shiiqana.”—Yaaqooba 4:8.

 Xoossaakko waana shiiqana danddayay?

•   Yaatana danddayiyo issi ogee woossiyoogaa; hegee neeni A haasayissiyo ogee.

•   Haray qassi Geeshsha Maxaafaa xannaꞌiyoogaa; hegee qassi Xoossay nena haasayissiyo oge.

 Hegaadan issoy issuwaara haasayiyoogee hegeekka, woosaynne Geeshsha Maxaafaa xannaꞌiyoogee Xoossaara neeni mino dabbotettaa medhdhanaadan maaddana.

 “Ubbaappe Xoqqa Xoossaa Yihoowaara haasayiyoogee asawu deꞌiya gita maatatuppe issuwaa.”—Jeremiya.

 “Ta wozanan tawu siyettiyaabaa Yihoowawu woosa baggaara yootiyoogee akko keehi shiiqidabadan tawu siyettanaadan oottees.”—Mirando.

 Neeni Xoossan ammaniyaabaa qassi aakko woossiyaaba gidikkonne, ne woosaa I tumuppe siyiyaabadan qoppanawu metootana danddayaasa. Gidikkokka, Geeshsha Maxaafay Yihoowa “woosaa siyiyaagoo” yaagees. (Mazamure 65:2) Ubba qassi Geeshsha Maxaafay hagaadan shoobbees: “I intteyyo qoppiyo gishshau, inttena hirggissiya ubbabaa a bolli olite.”—1 PHeexiroosa 5:7.

 Hagaa qoppa: Neeni ne mata laggiyaara gayttada haasayanawu wodiyaa bazzikkii? Xoossaara gayttidaagankka hegaadan ootta. Akko woossanawu wodiyaa bazza, qassi woossiyo wode Yihoowa giyo A suntta goꞌetta. (Mazamure 86:5-7; 88:9) Geeshsha Maxaafay neeni, ‘ubba wode Xoossaa woossanaadan’ shoobbees.—1 Tasalonqqe 5:17.

 “Woosay taani ta wozanan deꞌiya ubbaabaa saluwan deꞌiya ta Aawayyo qonccissada haasayiyo oge.”—Moyses.

 “Taani ta aayeera woy ta mata laggiyaara haasayiyo wode oottiyoogaadan, Yihoowaara haasayiyo wodekka tawu siyettiya ubbabaa awu yootays.”—Kareno.

 Geeshsha Maxaafay hagaadan gees: “Xoossaa intte woossiyo woosa ubban a keehi galatiiddi, inttena koshshiyaabaa ubbau woossiteppe attin, issibaukka hirggoppite.”—Piliphphisiyuusa 4:6.

 Hegaa giyoogee ne metuwaabaa woossana danddayaasa giyoogee? Ee! Geeshsha Maxaafay, “ne toohuwaa Xoossan wotta; i nena zemppissana” yaagees.—Mazamure 55:22.

 Woossiyo wode ne metuwaabaa xalla Xoossaa woossana bessennaagee qoncce. Kantelo geetettida issi yelagiyaa hagaadan gaasu: “Taani ubbatoo maaduwawu xallawu Yihoowa oychchiyaabaa gidikko loꞌꞌo lagge gidikke. Taani kasetada A galatan bessees, qassi taani A galatan danddayiyo darobay deꞌana bessees.”

 Hagaa qoppa: Ne deꞌuwan gakkida neeni galatanaadan oottiyaabati aybee? Galla galla Yihoowa galatana danddayiyo heezzubaata qoppana danddayay?

 “Keehi loꞌꞌiya ciishshaa beꞌiyo wode gujjin, guuttabankka Yihoowa woosan galatana danddayettees.”—Anito.

 “Neeni keehi maalaalettanaadan oottida meretaabaa woy ne wozanaa denttettidanne hegee neeni Yihoowa galatanaadan oottida Geeshsha Maxaafaa taarikiyaabaa wotta dentta qoppa.”—Brayan.