Tana Yelidaageeti Paraman SHaahettikko Ay Oottana Danddayiyaanaa?
Ne oottana danddayiyoobaa
Nena qofissiyaabata tobba. Neeni ay keena azzanidaakko woy haniyoobaa xayidaakko nena yelidaageetussi yoota. Hanettiiddi deꞌiyaabay aybakko geella eti neessi qonccissana danddayoosona, qassi hegee neeni keehi unꞌꞌeettennaadan maaddana danddayees.
Nena yelidaageeti neessi koshshiyaaban maaddana danddayennaba gidikko, issi ammanettida laggiyawu yootana danddayaasa.—Leemiso 17:17.
Ubbaappe aaruwan ‘woosaa siyiya’ saluwan deꞌiya ne Aaway ne woosaa siyana. (Mazamure 65:2) ‘I neeyyo qoppiyo gishshawu’ ne wozanaabaa awu wurssa yoota.—1 PHeexiroosa 5:7.
Oottana bessennabaa
Nena yelidaageeti paraman shaahettidoogan kayyottiyoogaappe minettiyoogee meꞌꞌida kushee paxiyoogaa mala—keehippe sakkees shin wurssettan paxiyoogee attenna
Lancciyaa uluwan oyqqoppa. Awu layttay laappunaa gidido wode A yelidaageeti paraman shaahettido Daaneeli, “Tana yelidaageeti banttana siiqiyaageeta. Nuussi, qassi eti oottidobay nu bolli gattanabaa mule qoppibookkona” yaagiis.
Daaneeli hanqquwaanne lancciyaa aggana xayikko, A bolli ayba qohoy gakkanee?—Zaaruwaa demmanawu maaddiyaaba: Leemiso 29:22 nabbaba.
Bana yelidaageeti A bolli gattido qohuwaa atto giyoogee Daaneelawu loꞌꞌo gidiyoy aybissee?—Zaaruwaa demmanawu maaddiyaaba: Efisoona 4:31, 32 nabbaba.
Nena qohiya eeshshatuppe haakka. Deeni hagaadan giis: “Tana yelidaageeti paraman shaahetti simmin, taani unꞌꞌettiyaagaanne ufayttennaagaa gidaas. Timirtte keettan metoy tana gakkiyoogaa doommiisinne issi laytti kunddaas. Hegaappe simmin ... kifiliyan naacaysinne darotoo warettays.”
Deeni kifiliyan naaciyoogan woy warettiyoogan ay oottanawu maliyaaba neeyyo milatii?
Galaatiyaa 6:7n deꞌiya maaray Deena mala asay bana qohiya eeshshatuppe haakkanaadan waatidi maaddana danddayii?
Qofan qohettidobay paxxanawu daro wodiyaa ekkees. Gidoppe attin, ne deꞌuwan issi issibaa kaseegaadan oottikko, zaarettada woppu gaana.
