Ha huuphe yohuwan

•  Aaway oottana koshshiyabay aybee?

•  Aawaappe koyettiyabaa dumma oottiyabay aybee?

•  Aawatanne eta macca naata

•  Aawata maaddiya zoriya

•   Naꞌay yelettanaappe kase. Neeni haꞌꞌi azina gidada oottiyobay sinttappe aawa gidiyo wode oottanabaa qonccissees. Du Fazers Mater? giyo maxaafay hagaadan gees:

   “Shahaarida A keettaayiya koshshiyabaa shammiyo wode maaddiya, O aakime soo efiya, uluwan deꞌiya naꞌaa altrasawund giyo maashiniyan beꞌiya woy wozanaa diddiqettaa siyiya aaway, naꞌay yeletti simmin, ba keettaayeeranne ba naꞌaara keehi matattana danddayees.”

   “Ta machchiya shahaara gidido wodiyan barkka attidabadan iyyo siyettanaadan koyabeenna gishshawu, tawu danddayettida keenan O maaddaas. Ubba, nuuni nu naꞌaa kifiliyakka issippe giigissida. Nu naꞌay yelettanaagaa naagiiddi issippe aattido wodee, nu naaꞌꞌawukka keehi dumma.”—Jemza.

   Geeshsha Maxaafaa maaraa: “Issoi issuwaa go77iyaabaa koyanaappe attin, intte huuphe xalaalaa go77iyaabaa koyoppite.”—Piliphphisiyuusa 2:4.

•   Naꞌay yeletti simmin. Ne naꞌaara kaaꞌiyogaaninne idimmiyogan aara dabbotettaa minttana danddayaasa. Naꞌaassi koshshiyabaa oottiyogan maadda. Neeni aawa gidada oottiyobay ne naꞌaa dichchawu keehi maaddiyaba. Neeni ne naꞌaara siiqettiyogee, ne A keehi nashshiyogaa bessees.

   “Ne naꞌaakko duge ziqqi ga. Aara kaaꞌa. A neekko shiishsha ekka. Kaassaa dosiya asa gida. Siiqiyogaabaa naati koyro tamaariyoy yelidaageetuppe gidiyogaa akeeka.”—Richarda.

   Geeshsha Maxaafaa maaraa: “Naati GODAAPPE imettiya imota; yeloti tumuppe woito.”—Mazamure 127:3.

•   Naꞌay dicciyo wode. Issi issi xinaatee qonccissiyogaadan, bantta aawaara keehi siiqettiya naati timirttiyan gooba, darin unꞌꞌettokkona, qassi jallissiya xaliya goꞌettiyonne danobaa oottiyo hanotaykka guutta. Ne naꞌaara dabbotettaa minttanawu wodiya bazza.

   “Ta naꞌay bana danddayidi sooppe kiyido wode A keehi laamottidabay nuuni kaamiya laaggidi haahosaa biyo wode woy kahuwa miyo wode haasayiyobaa gidiyogaa tawu yootiis. He wodetun taani ta naꞌaara haasayido keehi maaddiya amaridabati, ta qoppabeenna wodiyan haasayidoogeeta. Hegaadan haasayana danddayidoy nuuni issippe daro wodiya aattido gishshataassa.”—Deenisa.

   Geeshsha Maxaafaa maaraa: “Intte waani de7iyaakko akeekite; aadhdhida eratettaara de7iya asadan de7iteppe attin, aadhdhida eratetti bainna asadan de7oppite . . . intte lo77o wodiyaa coo xaissoppite.”—Efisoona 5:15, 16.

 Issi issi wogatun, aawati deꞌuwassi koshshiyabaa kunttiyageetanne bantta so asaa qohuwappe naagiyageeta, qassi aayoti so asaa siiqiyageetanne etawu qarettiyageeta giidi asay qoppees. (Zaarettido Wogaa 1:31; Isiyaasa 49:15) Issi issi so asawu he naaꞌꞌubatakka oottiyay issi ura gidana danddayees. Gidikkokka, eranchchati yootiyogaadan, aawaykka aayyiyakka bantta so asaa maaddiyo gita aawatettay deꞌees. a

 So asaabaa xannaꞌiya Judiz Walirsteno giyo eranchchiya, ha qofaa qonccissiya deꞌuwan hanidabaa yootaasu. A hagaadan gaasu: “Tammanne naaꞌꞌu laytta gidido ta naꞌiya kaamiya daafan qohettido wode, ambbulanssiya aaway laagganaadan koyaasu, ayssi giikko, hegaa mala wodiyan I aaway O naagana danddayiyogaa ammanettaasu. Guyyeppe A hosppitaaliya gela simmin, taani I hiixaa matan uttada kumetta gallassaa O minttettanaadan koyaasu.” b

 “Aawati so asay naagettidinne woppu giidi deꞌanaadan maaddana danddayoosona; hegaa banttarkka oottiyogee aayotussi metiyaba gidana danddayees. Qassi aayyiya ba naati giyobaa qaretan ezggiyogan, siiqiyogaanne etawu qoppiyogaa bessawusu. Eti naꞌꞌay issippe oottoosona.”—Daaniyela.

 Geeshsha Maxaafaa maaraa: “Ta na7au, ne aawaa zoriyaa ezgga; ne aayyiyaa tamaarissiyoogaakka karoppa.”—Leemiso 1:8.

 Neeni aawa gidiyogaadan, ne naꞌiya attuma asati O waati bonchchanaadan koyana bessiyakko tamaarissa. A hegaabaa, kaallidi deꞌiya naaꞌꞌu ogetun tamaarana:

•   I aayyiyo neeni bonchchiyo ogiya akeekiyogan. Neeni ne keettaayyiyo bonchchiyonne siiqiyo wode, ne naꞌiya sinttappe dooriyo azinawu ay mala eeshshay deꞌana koshshiyakko akeekawusu.—1 PHeexiroosa 3:7

•   Neeni O waata bonchchiyakko akeekiyogan. Neeni ne naꞌiyo bonchchiyogaa bessiyo wode, A bana bonchchanaadan tamaarissaasa. Qassi, A hara attumaageeti O waati bonchchanaadan koyanaakkokka tamaarissaasa.

   Shin, neeni ubba galla O boriyaba gidikko, A bana pattennabadan xeellananne O qohanawu cimmidi ikko shiiqiya hara attuma asatun nashettanawu koyana danddayawusu.

   “I aaway dosiyonne maaddiyo naꞌiya, loꞌꞌo azina gidanawu koshshiya eeshshay baynna ura siiqana danddayuku.”—Wayna.