I ba machcheeppe qosikkonne A hegaa eraasu. Atto gaanaadan O minttidi woossiis. Hegaa agganawu qaalaa geliis, qassi amarida wodiyawu aggiis. Shin guyyeppe zaarettidi doommiis. Ha odettida ubbabati zaari zaari haniyogaa doommidosona.

Ne hanotaykka hegaa malee? Yaatikko, neeni pornograafiya beꞌiyogee ne machchiyo ay keena qohana danddayiyakko akeekananne he amaliya muleera waata aggana danddayiyakko erana koshshees. a

Ha huuphe yohuwan

•  Neeni erana koshshiyabay aybee?

•  Neeni ay oottana danddayay?

•  Ne azinay pornograafiya beꞌiyaba gidikko

Pornograafee aqo deꞌuwa qohana danddayees. Hegee mooribeenna aqo laggee hanqqettanaadaaninne machchiya ba azinaa ammananawu metootanaadan oottana danddayees. b

Kaallidi deꞌiyabati, I Azinay pornograafiya beꞌiyo machcheeyyo siyettana danddayiyabata:

• Kaddidabadan qoppiyogaa. Saaro giyo machchiya hagaadan gaasu: “Hegee, ta keettaaway zaari zaaridi wodiraa laammidoogaa mala.”

• Bana pattennabadan xeelliyogaa. Issi machchiya, I azinay pornograafiya beꞌiyogee, A ba “meray loꞌennabadan qoppanaadaaninne yeellatanaadan” oottidoogaa yootaasu.

• Ammanettennaagaa. Heleno giyo machchiya, “Taani ta azinay oottiyo ubbabaa siriyogaa doommaas” yaagaasu.

• Unꞌꞌettiyogaa. Kateriino giyo machchiya, “Ta keettaaway pornograafiya beꞌiyogee taani ubbatoo unꞌꞌettiyoba gidiis” yaagaasu.

Ane hagaa qoppa: Geeshsha Maxaafay azinay ba machchiyo siiqana bessiyogaa yootees. (Efisoona 5:25) Yaatin, qommoora odettidaagaadan ba machcheeyyo siyettanaadan oottiya azinay ha xiqisee yootiyobawu azazettii?

Pornograafiya beꞌiyo amaliya aggiyogee waayissennaba gidenna. Sitaaso giyo machchiya hagaadan gaasu: “Ta keettaaway sijaaraa, maruwanaanne ushshaa amaliya aggiis, shin pornograafiya beꞌiyo amaliya agganawu haꞌꞌikka metootees.”

Ne hanotaykka hegaa mala gidikko, pornograafiya beꞌiyo amaliya muleera agganaadan kaallidi deꞌiyabati nena maaddana danddayoosona.

• Pornograafee iitaba gidiyoy aybissakko akeeka. Pornograafee issi uri ba amo xalaalaa qoppanaadan oottees; hegee ufayssiya aqo deꞌuwawu koshshiya siiqoynne ammanettiyogee xayanaadan oottees. Qassi, aqo deꞌuwa giigissida Xoossaa Yihoowa bonchchennaagaakka bessees.

  Geeshsha Maxaafaa maaraa: “Ekkiyoogaanne geliyoogaa asai ubbai bonchchanau bessees.”—Ibraawe 13:4.

• Neeni oottidobaa hara uran gaasoyoppa. ‘Ta machchiya tana keehi siiqiyogaa qonccissiyakko taani pornograafiya beꞌikke’ gooppa. Ne mooruwa ne keettaayen gaasoyiyogee likke gidenna; hegaadan oottiyogee A nena yiilloyiyo wode ubban pornograafiya beꞌiyogaa neeni zaarettada doommanaadan oottana danddayees.

  Geeshsha Maxaafaa maaraa: “Asi huuphiyan huuphiyan ba huuphe iita amuwan gooshettiyo wodenne cimettiyo wode paacettees.”—Yaaqooba 1:14.

• Ne machcheera intte wozanan deꞌiyabaa qoncciyan haasayite. Kevena giyo azinay hagaadan giis: “Pokkobawu denttettiyabaa beꞌanaadan taani paacettido wode xoonettada hegaa beꞌidaakko woy he paaciya xoonidaakko ta machcheera ubba galla haasayoos. Hegaadan ubbatoo haasayiyogee taani ippe qottiyobi aybinne baynnaagaa A eranaadan oottiis.”

  Geeshsha Maxaafaa maaraa: “Nuuni ubbaban ammanettiya asa gididi deꞌanawu koyoos.”—Ibraawe 13:18, NW.

• Ubba wode akeekanchcha gida. Neeyyo amale gididabay neeni hegaa aggoosappe daro layttay aadhdhinkka zaarettidi doommana danddayees. Qommoora abay odettido Keveni hagaadan giis: “Taani tammu layttawu pornograafiya beꞌabeenna gishshawu, ta metoy muleera qaarettidabadan qoppaas. Shin he amalee zuggidi injjetiya wodiya naagiiddi takkiis.”

  Geeshsha Maxaafaa maaraa: “Bau eqqidobaa milatiyo urai ooninne kunddennaadan, bana naago.”—1 Qoronttoosa 10:12.

• Neeni paacettiyo wode, danddayanchcha gida. Neeni iitabaa amottiyogaa muleera agganawu metootana danddayikkonne, he iitabaa oottanawu woy agganawu doorana danddayaasa. Iita amoy aggana danddayiyaba; ubba, neeni hegaa aggada harabaa qoppikko he amoy eesuwan xayana danddayees.

  Geeshsha Maxaafaa maaraa: “Intte ubbay intte asatettaa naagidi geeshshatettaaninne bonchchuwan oyqqana koshshiyoogaa eranawu besseesippe attin yaaretidi keehi amottiyogan gidana bessenna.”—1 Tasalonqqe 4:4, 5, NW.

• Iita amoy zaarettidi doommanaadan oottiya hanotatuppe haakka. Willpawurs Not Enaaf giyo maxaafay hagaadan gees: “Iitabawu injjetiya hanotan deꞌiyogee neeni kibiriitiya qaaciyogaa mala. Guutta lambbay gujettikko . . . tamay eexxana danddayees.”

  Geeshsha Maxaafaa maaraa: “Ai nagarinne tana haaroppo.”—Mazamure 119:133.

• Hidootaa qanxxoppa. Ne machchiya nenan zaarettada ammanettanawu daro wodiya, ubba daro layttaa koshshana danddayees. Shin daro aqo laggeti hegaadan oottidosona.

  Geeshsha Maxaafaa maaraa: “Siiqoi danddayanchcha.”—1 Qoronttoosa 13:4.