Qoronttoosa Asaassi Xaafettida Koyroogaa 1:1-31
1 Xoossay koyido gishshawu Kiristtoos Yesuusi kiittidoogaa gidanaadan xeegettida taani Phawuloosinne nu ishay Sostteniisi,
2 Qoronttoosan deꞌiya Xoossaa galchchaayyonne nu Godaa Yesuus Kiristtoosa sunttaa ubbasan xeegiyageetuyyo nuuni ha dabddaabbiya xaafoos; I etayyokka nuuyyokka Godaa. Intte Kiristtoos Yesuusaara issuwa gidanaadan Xoossay inttena dummayiisinne intte geeshsha gidanaadan xeegiis.
3 Laggetiyabi baynna Xoossaa nu Aawaa kehatettaynne sarotettay, qassi Godaa Yesuus Kiristtoosaagee intteyyo gido.
4 Xoossay Kiristtoos Yesuusa baggaara intteyyo laggetiyabi baynna kehatettaa kehido gishshawu, taani ubba wode ta Xoossaa galatays;
5 intte Kiristtoosaara issuwa gidiyo gishshawu, Xoossay inttena ubbaban dureyiis; hegaappe denddidaagan, intte A qaalaa loytti yooteetanne loytti ereeta,
6 qassi intte Kiristtoosabaa siyidobaa minttidi ammanideta,
7 hegaa gishshawu, intte nu Godaa Yesuus Kiristtoosi ba wolqqaa qonccissanaagaa naagishin koshshiya ubbabay intteyyo deꞌana.
8 Qassi Xoossay inttena wurssettay gakkanaashin minttana; yaatin nu Godaa Yesuus Kiristtoosa gallassi inttena mootana danddayiyobi deꞌenna.
9 Ba Naꞌaa, nu Godaa Yesuus Kiristtoosaara issuwa gidanaadan inttena xeegida Xoossay ammanettees.
10 Simi ta ishatoo, intte ubbay issi malabaa haasayanaadaaninne inttena shaakkiyabi deꞌennaadan, qassi intte muleera issi malabaa qoppananne halchchana mala, nu Godaa Yesuus Kiristtoosa sunttan taani inttena zorays.
11 Ayssi giikko, ta ishatoo, intte issoy issuwara palamettiyogaa Qalooꞌe so asaappe amaridaageeti taayyo yootidosona.
12 Taani hagaa giyoy intte, “Taani Phawuloosaagaa,” “Shin taani Aphiloosaagaa,” “Shin taani Keefaagaa,”* “Shin taani Kiristtoosaagaa” yaagiyo gishshataassa.
13 Kiristtoosi shaahettidee? Phawuloosi intteyyo mittan kaqettidi hayqqideeyye? Woy intte Phawuloosa sunttan haattan muukettidetii?
14 Taani Qarisphphoosanne Gaayosappe attin, intteppe oonanne haattan muukkabeenna gishshawu Xoossaa galatays;
15 hegaa gishshawu, intteppe ooninne, “Taani Phawuloosa sunttan haattan muukettaas” gaanawu danddayenna.
16 Hegaa bolli, taani Isxxifaanaasa soo asaakka haattan muukkaas. Shin etappe hara asa taani haattan muukkidaakkonne hassayikke.
17 Ayssi giikko, Kiristtoosi tana mishiraachchuwa yootanaassappe attin, asaa haattan muukkanaassi kiittibeenna. Shin taani mishiraachchuwa asa hayyuwan yootada, Kiristtoosi mittan kaqettidi hayqqidoogaa maaddennaba oottanawu koyikke.
18 Ayssi giikko, Kiristtoosi mittan kaqettidi hayqqidoogaa tamaarissiyobay xayanaageetuyyo eeyyatetta, shin nuussi attanaageetuyyo Xoossaa wolqqaa bessiyaba.
19 Ayssi giikko, “Taani hayyo eriya asatu hayyoy xayanaadan oottana, qassi eranchchatu qofaa phenqqeshana”* geetettidi xaafettiis.
20 Ha saꞌaa asaa giddon hayyottiya asi awan deꞌii? Higgiya tamaarissiyagee* awan deꞌii? Eranchcha* asi awan deꞌii? Xoossay ha saꞌaa hayyoy eeyyatetta gidiyogaa bessibeennee?
21 Ha saꞌaa asay ba hayyuwan ammanettiyo gishshawu, Xoossaa eribeenna. Shin ha saꞌaa asay eeyyatettadan xeelliyo, nuuni yootiyo mishiraachchuwa ammaniyageeta ashshiyogan, Xoossay ba hayyuwa bessiis.
22 Ayhudati malaataa oychchoosona, qassi Giriiketi hayyuwa koyoosona;
23 shin Ayhudati xubettanaadan oottiya, qassi hara biittaa asay eeyyatettadan xeelliyo, mittan kaqettidi hayqqida Kiristtoosabaa nuuni yootoos.
24 Gidoppe attin, xeegettidaageetuyyo, Ayhudatuyyokka Giriiketuyyokka Kiristtoosi Xoossaa wolqqaa, qassi Xoossaa hayyuwa.
25 Ayssi giikko, asay eeyyatettadan xeelliyo Xoossaabay asa hayyuwappe aadhdhees, qassi laafabadan xeelliyobay asa minotettaappe aadhdhees.
26 Ayssi giikko, ta ishatoo, Xoossay inttena xeegiyo wode asa* xeelan intteppe daroti hayyottiya asa gidennaagaa, daroti wolqqaama gidennaagaa, daroti gita* asa gidennaagaa intte akeekeeta;
27 shin Xoossay hayyottiya asata yeellayanawu ha saꞌaa asay eeyyadan xeelliyogeeta dooriis, qassi minota yeellayanawu ha saꞌaa asay laafadan xeelliyogeeta dooriis;
28 qassi Xoossay asay gitabadan xeelliyobaa goꞌꞌennaba kessanawu, ha saꞌaa asay laafabadan, karettidabadaaninne goꞌꞌennabadan xeelliyobaa dooriis;
29 Xoossay ay asinne* A sinttan ceeqettenna mala hegaa oottiis.
30 Shin Xoossay inttena Kiristtoos Yesuusaara issuwa oottiis. Yesuusi nuuyyo Xoossaa hayyuwa, A xillotettaanne A geeshshatettaa gidiis, qassi I nuna wozidi nu nagaraappe ashshiis.
31 “Ceeqettiya asi Yihoowan ceeqetto” giidoogaadan hanana mala hegee haniis.
Footnotes
^ Pheexiroosakka geetettees.
^ Woykko “wora olana.”
^ Hegee higgiya eranchchaa.
^ Woykko “Palamaa dosiya.”
^ Mise, “asho.”
^ Woykko “bonchchettida keettaa.”
^ Mise, “ashoynne.”
