Qoronttoosa Asaassi Xaafettida Koyroogaa 10:1-33
10 Ta ishatoo, nu mayzza aawati ubbay shaaraappe garssaara, qassi abbaa giddoora biidoogaa intte hassayanaadan koyays;
2 qassi eti ubbay shaaraappe garssaaranne abbaa giddoora biyo wode Muuseera issuwa gididi muukettidosona;
3 qassi eti ubbay Xoossay immido issi qumaa miidosona;
4 hegaadankka, eti ubbay Xoossay immido issi ushshaa uyidosona. Eti Xoossay immido, bantta geeduwan deꞌiyaba milatiya zaallaappe uyidosona, qassi he zaallay Kiristtoosa bessiyaba.*
5 Gidoppe attin, eta giddoppe darotun Xoossay ufayttibeenna; hegaappe denddidaagan, I eta bazzuwan woriis.
6 Eti amottidoogaadan nuuni iitabaa oottanawu amottennaadan naagettana mala, hageeti tamaariyoba gididosona.
7 Qassi etappe issoti issoti oottidoogaadan eeqa misiliyawu intte goynnoppite. Etabay hagaadan xaafettiis: “Asay maanawunne uyanawu uttiis. Yaatidi, duranawu denddiis.”
8 Etappe issoti issoti pokkiya tuna nagaraa oottidoogaadan nuuni pokkiya tuna nagaraa oottana bessenna; hegaa gaasuwan eta giddoppe 23,000ti issi gallassi hayqqidosona.
9 Etappe issoti issoti Yihoowa paaccidoogaadan nuuni A paaccana bessenna; hegaa gaasuwan, eta shooshshati dukkidi woridosona.
10 Etappe issoti issoti zuuzumidoogaadan zuuzummoppite, woriyagee hegaa gaasuwan eta xayssiis.
11 Wodiya wurssettan deꞌiya nuuni etadan hanenna mala, eta gakkidabay nuna tamaarissanawu xaafettiis.
12 Hegaa gishshawu, eqqaas giidi qoppiya uri kunddennaadan naagetto.
13 Intte hara asaagaappe dumma paace paacettibeekketa. Shin Xoossay ammanettees, qassi I intte genccana danddayiyogaappe aaruwa paacettanaadan oottenna,* shin intte paacettiyo wode genccana mala, kiyiyo ogiyakka I bessana.
14 Hegaa gishshawu, ta siiqiyogeetoo, eeqa misiletuppe baqite.
15 Taani akeekiya intteyyo yootays; taani yootiyobay tumakko tuma gidennaakko intteyyo pirddite.
16 Nuuni hegawu Xoossaa galatiyo wancca woynee Kiristtoosa suuttaa bessiyaba gidennee? Nuuni menttiyo oyttay Kirsttoosa bollaa bessiyaba gidennee?
17 Oyttay issuwa gidiyo gishshawu, nuuni daro gidikkonne, issi bolla; ayssi giikko, nuuni ubbay he issi oyttaa moos.
18 Israaꞌeela asata qoppite: Yarshshiyo sohuwan yarshshettidabaappe miyo wode, hegee eti Xoossaara miyogaa mala gidennee?
19 Yaatin hegee eeqa misiletussi yarshshettidabay tumuba, woy eeqa misileti tumuba giyogee?
20 Akkay; shin hegee hara biittaa asay yarshshiyobaa daydanttatussi yarshsheesippe attin, Xoossaassi yarshshenna giyogaa; qassi intteyyo daydanttatuura issippetettay deꞌanaadan koyikke.
21 Intte Yihoowa wanccaappe uyiiddi, daydanttatu wanccaappekka uyanawu danddayekketa; intte Yihoowa masoofiyappe miiddi, daydanttatu masoofiyappekka maanawu danddayekketa.
22 Woy ‘nuuni Yihoowa yiilloyiyo’?* Nuuni appe minniyoyye?
23 Ubbabaakka tana diggiya higgee baawa, shin tana maaddiyay ubbabaa gidenna. Ubbabaakka tana diggiya higgee baawa, shin minttettiyay ubbabaa gidenna.
24 Nuuni ubbay nu xalaalaa gidennan, hara urakka goꞌꞌiyabaa ubbatoo oottana bessees.
25 Bayzettiya ay ashonne intte wozanay* geeshsha gidin, aynne oychchennan miite;
26 ayssi giikko, “saꞌaynne an deꞌiya ubbabay Yihoowaba.”
27 Ammanenna asi inttena shoobbin intte baanawu koyikko, intte wozanay geeshsha gidin, intte sintti aattidobaa aybakka aynne oychchennan miite.
28 Shin ooninne intteyyo, “Ha ashoy yarshshettidaba” giikko, yootida ura xubbenna malanne O kahaanne azzanttenna mala, mooppite.
29 Taani hinkkuwa kahaa gaysippe attin, intteegaa giikke. Taani oottanawu koyiyobaa doorana danddayikkonne, O kahaynne ta bolli pirddenna mala hegaa oottanawu koyikke.
30 Taani Xoossaa galatada miyaba gidikko, A galatiyoban harati tana boranabaa ayssi oottiyanaa?
31 Hegaa gishshawu, intte miyaba woy uyiyaba woy harabaa aybanne oottiyaba gidin, ubbabaa Xoossaa sabissanawu oottite.
32 Intte Ayhudatakka Giriiketakka, qassi Xoossaa galchchaakka xubbiyaba gidennaadan naagettite;
33 taanikka harati goꞌettanaadan koyaysippe attin, taayyo goꞌettanawu koyikke; ee, taani asay ubbay attana mala, eta ufayssanawu ubbabaa oottays.
Footnotes
^ Woykko “Kiristtoosa.”
^ Woykko “anttenna, eeno geenna.”
^ Woykko “qanaatissiyo.”
^ Woykko “kahay.”
