Qoronttoosa Asaassi Xaafettida Koyroogaa 11:1-34
11 Taani Kiristtoosa milatiyogaadan, inttekka tana milatite.
2 Intte ubbaban tana hassayiyo gishshawunne taani inttena tamaarissidoogaadan ubbabaa oottiyo gishshawu inttena galatays.
3 Shin attuma asa ubbaa kaalettiyagee* Kiristtoosa gidiyogaa, qassi macca asa kaalettiyagee* attuma asa gidiyogaa, qassi Kiristtoosa kaalettiyagee* Xoossaa gidiyogaa intte eranaadan koyays.
4 Ba huuphiyan issibaa wottidi woossiya woy Xoossay erissidobaa yootiya attuma asi ubbi bana kaalettiyagaa* yeellayees;
5 Shin ba huuphiya kammennan woossiya woy Xoossay erissidobaa yootiya macca asi ubbi bana kaalettiyagaa* yeellayees, hegee maccaasiya ba huuphiya binnaanaa meedettidoogaa mala.
6 Ayssi giikko, issi maccaasiya ba huuphiya kammana xayikko, qanxxettana koshshees; shin macca asi ba huuphiya binnaanaa qanxxettiyogee woy meedettiyogee yeellayiyaba gidikko, A ba huuphiya kammana koshshees.
7 Attuma asi Xoossaa milatiyo gishshawunne A bonchchissiyo gishshawu, ba huuphiya kammana koshshenna, shin macca asi attuma asa bonchchissees.
8 Ayssi giikko, attuma asi macca asappe merettibeenna, shin macca asi attuma asappe merettiis.
9 Hegaa bollikka, attuma asi macca asassi merettibeenna, shin macca asi attuma asassi merettiis.
10 Maccaara attuma asa maataa bonchchiyogaa bessiya malaataa ba huuphiyan wottana koshshiyoy hegaassa; kiitanchchati hegaa beꞌana.
11 Shin Godaa kaalliyageetu giddon, macca asi deꞌennaakko attuma asi deꞌana danddayenna, qassi attuma asi deꞌennaakko macca asi deꞌana danddayenna.
12 Ayssi giikko, macca asi attuma asappe merettidoogaadan, attuma asi macca asappe yelettees; shin ubbabaa medhdhidaagee Xoossaa.
13 Ane intte pirddite: Macca asi ba huuphiya kammennan Xoossaa woossana bessii?
14 Attuma asi ba huuphiya binnaanaa keehi dichchiyogee A kawushshiyaba gidiyogaa asa meretaappe tamaarekketii?
15 Shin issi maccaasiya ba huuphiya binnaanaa keehi dichchikko, hegee O bonchchissiyaba gidiyogaa erekketii? Ayssi giikko, binnaanay huuphiya kammanawu iyyo imettiis.
16 Gidoppe attin, issi asi hagaa maayennan aggana danddayees, shin hegee nuussikka Xoossaa galchchatussikka maara gidenna.
17 Shin taani hageeta intteyyo yootiyo wode inttena galatikke; ayssi giikko, intte shiiqoti inttena maaddiyogaappe aaruwan qohoosona.
18 Ane hagaa qoppite; galchchan intte issippe shiiqiyo wode palamettiyogaa taani siyaas, qassi hegaappe amaridaagee tuma gidiyogaa ammanays.
19 Ayssi giikko, intte intte giddon shaahettanaagee qoncce; hegaappe denddidaagan, Xoossay awugeetun ufayttiyakkokka erettana.
20 Godaa Kahuwa maanawu intte issippe shiiqiyo wode, hegaa maara oottekketa.
21 Ayssi giikko, intte ubbay Godaa Kahuwa miyo wode, kasetidi intte kahuwa miichcheeta; hegaappe denddidaagan, issoy namisettees, shin haray mattottees.
22 Maanawunne uyanawu intteyyo keetti baawee? Woy Xoossaa galchchaa bonchchekketii? Qassi hiyyeesata ayssi yeellayeetii? Taani inttena woygana danddayiyanaa? Inttena galatana koshshii? Taani inttena mule galatikke.
23 Taani inttena tamaarissidobay Godaappe ekkidoba, hegeekka, Godaa Yesuusi bana pirddawu aatti immana qammi oyttaa ekkidi,
24 woossi simmidi, oyttaa menttidi, “Hagee intte gishshawu imettida ta bollaa gishshataassa. Tana hassayanawu hagaa oottiyogaa aggoppite” yaagiis.
25 Eti kahuwa mi simmin, I woyniyakka hegaadan oottiis; hagaadan giis: “Hagee ta suuttan doommida ooratta maachchaa gishshataassa. Intte hagaa uyiyo wode awudenne tana hassayanawu hagaa oottiyogaa aggoppite.”
26 Ayssi giikko, intte ha oyttaa miyo wodenne ha woyniya uyiyo wode awudenne Goday yaana gakkanaashin A hayquwabaa yooteeta.
27 Hegaa gishshawu, ayyo bessennan Godaa oyttaa miya woy A woyniya uyiya ooninne Godaa bollaaranne suuttaara gayttidaagan mooranchcha gidana.
28 Issi asi koyro ba wozanaa paacco; yaatidi, I yaatana bessiya asa gidiyogaa ammanettikko, oyttaa maananne woyniya uyana danddayees.
29 Ayssi giikko, bollay aybakko akeekennan miyanne uyiya asi ba bolli pirddissiyabaa meesinne uyees.
30 Intte giddoppe daroti minnibeennaynne harggiyoy hegaassa, qassi daroti hayqqidosona.*
31 Shin nuuni ay mala asakko nu wozanaa paaccikko, nu bolli pirddissokko.
32 Gidoppe attin, Yihooway nuna yiggi xeelliyo wode, nuna seerees; hegaappe denddidaagan, nuuni ha saꞌaa asaara qaxxayettokko.
33 Hegaa gishshawu, ta ishatoo, intte he kahuwa maanawu shiiqiyo wode, ubbay gakkanaashin naagite.
34 Ooninne namisettikko, ba son maana bessees; yaatikko, intte issippe shiiqiyo wode, Xoossay intte bolli pirddenna. Shin hara allaalleta taani yaa gakkada maarayana.
Footnotes
^ Mise, “huuphee.”
^ Mise, “huuphee.”
^ Mise, “huuphee.”
^ Mise, “ba huuphiya.”
^ Mise, “ba huuphiya.”
^ Mise, “hayquwan xiskkidosona.” Qassi ayyaanaaban hayqqiyogaa bessiyogee qoncce.
