Qoronttoosa Asaassi Xaafettida Koyroogaa 14:1-40
14 Issoy issuwa siiqiyogaa mule aggoppite, shin ayyaanan imettiya imotata, ubbakka, Xoossay erissidobaa yootiyo imotaa ekkanawu baaxetiyogaa* aggoppite.
2 Ayssi giikko, hara doonaa haasayiya uri Xoossay genttido yohuwa ayyaanan haasayiyaba gidikkokka, ooninne siyenna gishshawu, I Xoossawu yooteesippe attin, asawu yootenna.
3 Shin Xoossay erissidobaa yootiya uri I yootiyoban asaa ammanuwa minttees, qassi eta maaddeesinne minttettees.
4 Hara doonaa haasayiya asi ba ammanuwa minttees, shin Xoossay erissidobaa yootiya asi galchchaa ammanuwa minttees.
5 Taani intte ubbay dumma dumma doonata haasayiyakko ixxikke, shin Xoossay erissidobaa intte yootanaadan koyays. Dumma dumma doonatun yootidobay birshshettana xayikko, yaatiyogaappe Xoossay erissidobaa yootiyogee loꞌꞌo; yaatikko, galchchaa ammanoy minnana danddayees.
6 Shin ta ishatoo, taani haꞌꞌi inttekko baada, Xoossay qonccissidobaa woy eraa woy Xoossay erissidobaa woy intte tamaariyobaa yootennan, dumma dumma doonatun yootiyakko, hegee inttena ay maaddanee?
7 Hegee cenggurssaa kessiya, paxa deꞌenna pulaaliya woy diittaa mala. Issi asi pulaaliya punniiddi woy diittaa diixxiiddi issi cenggurssa xallaa kessikko, asay waati shaakki eranee?
8 Malkkatay maara punettana xayikko, olawu ooni giigettanee?
9 Hegaadankka, akeekanawu metennabaa intte haasayana xayikko, ooninne intte yootiyobaa waati akeekanee? Hegee intte carkkuwawu yootiyogaappe dummatenna.
10 Ha saꞌan daro qommo qaalati deꞌoosona, shin eta giddon akeekettenna qaali baawa.
11 Ayssi giikko, odettidabaa taani akeekana xayikko, hegaa yootida urawu taani hara biittaa asa gidays, qassi yootidaagee taayyo hara biittaa asa gidees.
12 Hegaadankka, ayyaanan imettiya imotata intte wozanappe koyiyo gishshawu, galchchaa ammanuwa minttanawu daro imotata ekkanawu koyite.
13 Hegaa gishshawu, birshshanaadan Xoossay bana maaddana mala, hara doonaa haasayiya uri woosso.
14 Ayssi giikko, taani hara doonan woossikko, ayyaanan taayyo imettida imotaappe attin, woossiyay tana gidikke; hegaa gishshawu, taani woossiyobaa akeekikke.
15 Yaatin waatanee? Taani ayyaanan imettida imotan woossana, shin akeekiyobaa woossana. Taani Xoossaa sabbanawu ayyaanan imettida imotan yexxana, shin A sabbanawu taani akeekiyobaa yexxana.
16 Hankkoode, intte ayyaanan imettiya imotan Xoossaa sabbikko, intte giddon deꞌiya aynne erenna asi intte galatiyo wode hegaa akeekenna gishshawu, waanidi aminꞌꞌi gaanee?
17 Xoossaa intte loꞌꞌo ogiyan galatiyogee tuma, shin hegee hankko bitaniya ammanuwa minttenna.
18 Taani intte ubbay haasayiyogaappe daro doonaa haasayiyo gishshawu Xoossaa galatays.
19 Gidoppe attin, taani galchchan tammu shaꞌu qaalata haasayiyogaappe, harati oottanabaakka yootana mala, akeekettiya* ichchashu qaalata haasayana.
20 Ta ishatoo, guutta naatudan qoppoppite,* shin iitatettawu guutta naata gidite; qassi gamma gakkida asadan qoppite.*
21 Higgiyan hagaadan xaafettiis: “Yihooway, ‘Taani ha asaayyo hara biittaa asaa doonatuuninne erettenna asatu qaalatun yootana; yaatikkonne, taani yootiyobaa eti siyennan ixxana’ yaagees.”
22 Hegaa gishshawu, dumma dumma doonata haasayiyogee ammanennaageeti malaalettanaadan ootteesippe attin, ammaniyageetussa gidenna, shin Xoossay erissidobaa yootiyogee ammaniyageetussappe attin, ammanennaageetussa gidenna.
23 Hegaa gishshawu, galchchan deꞌiyageeti ubbay dumma dumma doonata haasayishin aynne erenna asati woy ammanennaageeti gelikko, eti inttena, ‘Hageeti gooyosona’ gookkonaa?
24 Shin intte ubbay Xoossay erissidobaa yootishin ammanenna asi woy aynne erenna asi gelikko, siyiyobay A seerana, qassi A wozanaa yiggi xeellana.
25 I ba wozanan geemmi uttidabaa erana, hegaa gishshawu, gufannidi, “Xoossay tumukka intte giddon deꞌees” yaagidi Xoossawu goynnana.
26 Ta ishatoo, intte issippe shiiqiyo wode, issoy Xoossaa sabbanawu yexxees, haray tamaarissees, haray Xoossay qonccissidobaa yootees, haray hara doonaa haasayees, qassi haray birshshees. Shin ha ubbaban waatana koshshii? Issoy issuwa ammanuwa minttanawu ubbabaa oottite.
27 Ooninne hara doonaa haasayikko, naaꞌꞌu woy heezzu asa xallay haasayo, hegaappe darennan kayan kayan haasayona, qassi issi asi birshshana bessees.
28 Shin birshshiya asi* xayikko, I galchchan coꞌꞌu gaananne ba wozanan Xoossaayyo yootana bessees.
29 Naaꞌꞌu woy heezzu asati Xoossay erissidobaa yootana bessees, qassi hegee woygiyogaakko akeekanawu harati ezggana bessees.
30 Shin issi asi yan uttidaashin Xoossay issibaa awu qonccissikko, haasayiiddi deꞌiyagee coꞌꞌu gaana bessees.
31 Yaatidi, Xoossay erissidobaa yootiyageeti ubbay kayan kayan yootana danddayoosona; yaatikko, shiiqida ubbay tamaarananne minettana danddayees.
32 Xoossay erissidobaa yootiyageeti ayyaanan imettiya imotaa banttana naagidi goꞌettana koshshees.
33 Ayssi giikko, Xoossay sarotettaa Xoossaa, qassi ubbabaa loytti mankkayidi oottees.
Geeshshatu galchcha ubbaagaadan,
34 macca asay galchchawu yootiyogee digettidaba gidiyo gishshawu, eti coꞌꞌu gaana koshshees, shin Higgeekka yootiyogaadan, eti haarettana koshshees.
35 Eti issibaa akeekana xayikko, son bantta azinaa azinaa oychchana koshshees; ayssi giikko, macca asi galchchawu yootiyogee bonchcho bessiyaba gidenna.
36 Xoossaa qaalay intteppe kiyideeyye? Woy he qaalaa intte xallay ekkidetiiyye?
37 Ooninne Xoossay erissidobaa yootays woy ayyaanan imettiya imotaa ekkaas giidi qoppikko, Goday azazidobaa taani intteyyo xaafiyogaa I maayana bessees.
38 Shin ooninne hagaa ekkana xayikko, Xoossay A ekkenna.*
39 Hegaa gishshawu, ta ishatoo, Xoossay erissidobaa yootanawu baaxetiyogaa aggoppite, gidoppe attin, ooninne dumma dumma doonaa haasayennaadan diggoppite.
40 Shin ubbabay mankkatidi maara oosettana bessees.
Footnotes
^ Woykko “minnidi koyiyogaa.”
^ Woykko “yuushsha qoppada.”
^ Woykko “akeekoppite.”
^ Woykko “akeekite.”
^ Woykko “turjjumaanee.”
^ Woykko geella, “ooninne hagaa akeekanawu koyana xayikko, I akeekennan attana.”
