Qoronttoosa Asaassi Xaafettida Koyroogaa 15:1-58
15 Ta ishatoo, taani intteyyo yootido, qassi intte ekkidonne an minni eqqido mishiraachchuwa haꞌꞌi inttena hassayissays.
2 Taani intteyyo yootido mishiraachchuwa intte mintti oyqqikko atteeta; yaatana xayikko, intte coo mela ammanideta.
3 Ayssi giikko, taanikka ekkidonne intteyyo yootido keehi koshshiyabati hageeta: Geeshsha Maxaafati yootiyogaadan, Kiristtoosi nuna nagaraappe wozanawu hayqqiis;
4 qassi I moogettiis, ee, Geeshsha Maxaafati yootiyogaadan, heezzantto gallassi Xoossay A denttiis;
5 qassi I bana Keefawu* qonccissiis, hegaappe simmin, kiitettida tammanne naaꞌꞌatuyyo bana qonccissiis.
6 Hegaappe guyyiyan, 500ppe dariya ishatuyyo bana issitoo qonccissiis; hegeetuppe daroti haꞌꞌikka nunaara deꞌoosona, shin amaridaageeti hayqqidosona.*
7 Hegaappe simmin, I bana Yaaqoobayyo qonccissiis, guyyeppe kiitettidaageetu ubbaayyo bana qonccissiis.
8 Shin wodee gakkennan yelettida naꞌa malawu taayyokka ubbaappe wurssettan bana qonccissiis.
9 Ayssi giikko, taani Xoossaa galchchaa naaqqido gishshawu, kiitettidaageetu ubbaappe laafa, qassi kiitettidaagaa geetettanawukka bessikke.
10 Shin laggetiyabi baynna Xoossaa kehatettaappe denddidaagan taani kiitettidaagaa, qassi Xoossay laggetiyabi baynna kehatettaa taayyo kehidoogee hada attibeenna; shin eta ubbaappe aaruwan taani minnada oottaas; gidoppe attin, Xoossay taayyo kehido laggetiyabi baynna kehatettaappe attin, yaatiday tana gidikke.
11 Hegaa gishshawu, taanikka etikka hegaadan yootida, qassi inttekka hegaadan ammanideta.
12 Xoossay Kiristtoosa hayquwappe denttidoogee odettiyaba gidikko, intteppe amaridaageeti waanidi hayqqidaageeti denddokkona giyonaa?
13 Hayqqidaageeti denddennaba gidikko, Xoossay Kiristtoosa denttibeenna.
14 Shin Xoossay Kiristtoosa denttibeennaba gidikko, nuuni yootiyobay hada, qassi intte ammanoykka hada.
15 Qassi hayqqidaageeta Xoossay tumu denttennaba gidiyakko, I denttibeenna Kiristtoosa denttiis giidi Xoossaabaa markkattido gishshawu, nuunikka Xoossaayyo worddo markka gidida.
16 Ayssi giikko, Xoossay hayqqidaageeta denttennaba gidikko, Kiristtoosakka denttibeenna.
17 Hegaa bollikka, Xoossay Kiristtoosa denttibeennaba gidikko, intte ammanoy hada; intte haꞌꞌikka intte nagaraappe kiyibeekketa.
18 Yaanikko, Kiristtoosa kaalliya hayqqidaageetikka muleera xayidosona.
19 Kiristtoosan nu hidootay ha wodiya xallaassa gidiyakko, nu hanotay oogaappenne aaruwan keehi iita.
20 Shin Xoossay hayqqidaageetuppe* Kiristtoosa koyro denttiis; I gakkida xeera kattaa mala.
21 Hayqoy issi asa baggaara yiido gishshawu, hayqqidaageetu denddoykka issi asa baggaara yiis.
22 Addaame gaasuwan asay ubbay hayqqiyogaadan, hegaadankka Kiristtoosa gaasuwan ubbay deꞌuwa ekkana.
23 Shin ubbay ba kayan kayan denddana: Kiristtoosi gakkida xeera kattaa mala, hegaappe guyyiyan Kiristtoosi simmidi nunaara takkiyo wode Xoossay Kiristtoosaageeta denttana.
24 Hegaappe guyyiyan, I kawotettata ubbaanne maataynne wolqqay deꞌiyogeeta ubbaa xayssidi, wurssettan ba Xoossawunne ba Aawawu Kawotettaa sheedhdhana.
25 I morkketa ubbaa yedhdhanaadan Xoossay oottana* gakkanaashin, kawo gididi haarana bessees.
26 Qassi wurssetta morkkiya, hayquwa, I xayssana.
27 Ayssi giikko, Xoossay “ubbabay A maatan* haarettanaadan oottiis,” shin ‘ubbabaa A maatan haarissiis’ giyogee ubbabay ayyo haarettanaadan oottidaagaappe harata bessiyaba gidiyogee qoncce.
28 Shin Xoossay ba Naꞌaayyo ubbabaa haarissi simmin, Naꞌay qassi ubbabaa baayyo haarissida Xoossawu haarettana, yaanin ubbabaa haariyagee Xoossaa xalla gidana.
29 Hankkoode, hayqqanawu muukettiya Kiristtaaneta yaatiyogee ay maaddii? Hayqqidaageeta Xoossay mule denttennaba gidikko, eti hayqqanawu ayssi muukettiyonaa?
30 Qassi nu shemppuwa daafiyaban ubbatoo ayssi geliyo?
31 Ubba gallassi hayqoy tawu baazzan gayttees. Ta ishatoo, nu Godaa Kiristtoos Yesuusa kaalliyageetun, inttenan, taani ceeqettiyogaadan, hegee tuma.
32 Hara asaagaadan,* taani Efisoonan doꞌaara warettaas, yaatin hegee tana ay maaddii? Xoossay hayqqidaageeta denttennaba gidikko, “nuuni wontto hayqqiyo gishshawu, simi moosinne uyoos.”
33 Ooninne inttena balettoppo. Iita asatuura zuppetiyogee* loꞌꞌo meeziya bashshees.*
34 Beegottidi xillobaa oottite, qassi nagaraa oottoppite. Intteppe issoti issoti Xoossaa erokkona. Taani inttena yeellayanawu hagaa yootays.
35 Gidoppe attin, issi asi, “Hayqqidaageeta Xoossay waati denttanee? Ee, eti denddiyo wode etayyo ay mala bollay deꞌanee?” yaagana.
36 Nenoo, yuushsha qoppennaagoo! Neeni zeriyobay koyro hayqqana xayikko mokkenna.*
37 Qassi neeni gisttiya gidin hara ay kattaakka gidin, zerettaa zeraasappe attin, dicciyagaa* zerakka;
38 shin Xoossay ba sheniyadan awu bollaa immees, qassi zeretta ubbawu A bollaa bollaa immees.
39 Bollay ubbay issi mala gidenna; asaa bollay dumma, mehiya bollay dumma, kafuwa bollay dumma, qassi moliya bollay dumma.
40 Qassi saluwageetussi bollay deꞌees, saꞌaageetussikka bollay deꞌees; shin saluwageetu bollaa puulay saꞌaageetu bollaa puulaappe dummatees.
41 Awa ayfiya puulay dumma, aginaa puulaykka dumma, qassi xoolinttetu puulay dumma; issi xoolinttiya puulay haraagaappe dummatiyogee tuma.
42 Hayqqidaageetu denddoykka hegaa mala. Moogettiya bollay musees; shin denttiyo bollay musana danddayenna.
43 Kawuyyidi moogettees, shin denttiyo wode bonchchettees. Moogettiyo wode laafa, shin denttiyo wode wolqqaama.
44 Moogettiya bollay asho suutta; shin denttiyo wode ayyaana bolla. Asho suutta bollay deꞌikko, ayyaana bollaykka deꞌees.
45 Qassi, “Koyro bitanee Addaamee paxa deꞌiyagaa gidiis” geetettidi xaafettiis. Wurssetta Addaamee deꞌuwa immiya ayyaana gidiis.
46 Shin kasetiyagee asho suutta bollaappe attin, ayyaana bollaa gidenna. Hegaappe simmin, ayyaana bollay yiis.
47 Koyro bitanee saꞌaappe, qassi baanaappe oosettiis; naaꞌꞌantto bitanee saluwappe.
48 Baanaappe oosettidaageeti baanaappe oosettidaagaakka mala; qassi saluwageeti saluwappe yiidaagaakka mala.
49 Nuuni baanaappe oosettidaagaa milatidoogaadan, saluwappe yiidaagaakka milatana.
50 Shin ta ishatoo, ashoynne suuttay Xoossaa Kawotettaa laattana danddayennaagaa, woy qassi musiya bollay musana danddayenna deꞌuwa laattana danddayennaagaa intteyyo yootays.
51 Siyite! Xoossay genttido issibaa taani intteyyo yootays: Nuuni ubbay hayqqidi xiskkokko, shin nuuni ubbay laamettana,
52 wurssetta malkkatay punettiyo wode, liphida* ayfee xeellanaashin nuuni sohuwara laamettana. Ayssi giikko, malkkatay punettana, yaanin hayqqidaageeta eta bollay musennaadan oottidi Xoossay denttana, qassi nuuni laamettana.
53 Ayssi giikko, musiya ha bollay musana danddayenna bollaa maayana, qassi hayqqana danddayiya ha bollay hayqqana danddayenna bollaa maayana.
54 Shin musiya ha bollay musana danddayenna bollaa maayiyo wodenne hayqqana danddayiya ha bollay hayqqana danddayenna bollaa maayiyo wode, “Hayqoy merinawu mitettiis” geetetti xaafettidaagee polettana.
55 “Hayquwawu, neeni xooniyo wolqqay waanidee? Hayquwawu, ne yiishshay waanidee?”
56 Woriya yiishshay nagaraa, qassi nagarawu wolqqaa immidaagee Higgiya.*
57 Shin nu Godaa Yesuus Kiristtoosan hayquwa xoonanaadan Xoossay nuna maaddiyo gishshawu, awu galatay gido!
58 Hegaa gishshawu, taani siiqiyo ta ishatoo, Godaayyo minnidi oottiyogee hada attennaagaa intte eriyo gishshawu, ubba wode Godaa oosuwan oottiyo darobay intteyyo deꞌo, qassi qaaxxennan minni eqqite.
Footnotes
^ Pheexiroosakka geetettees.
^ Mise, “hayquwan xiskkidosona.”
^ Woykko “hayquwan xiskkidaageetuppe.”
^ Mise, “morkketa A tohuwappe garssaara Xoossay wottana.”
^ Mise, “tohuwan.”
^ Woykko geella, “Asa qofaadan.”
^ Woykko “laggetiyogee.”
^ Woykko “loꞌꞌo eeshshaa moorees.”
^ Mise, “paxa deꞌanaadan oosettenna.”
^ Mise, “dicciya bollaa.”
^ Woykko “qiphida.”
^ Woykko “nagaraa wolqqay Higgiya.”
