Qoronttoosa Asaassi Xaafettida Koyroogaa 16:1-24
16 Geeshshatuyyo issisan miishshaa shiishshiyogaara gayttidaagan, taani Galaatiya galchchaa azazidoogaadan oottana danddayeeta.
2 Intte ubbay saaminttan saaminttan koyro gallassi intte wolqqa keenaa amaridabaa qoraphphidi wottana koshshees; yaatikko, taani yaa gakkin shiishshekketa.
3 Shin taani yaa gakkiyo wode, intte kehatettan immidobaa efaanaadan amarida asata Yerusalaame kiittana; intte dabddaabbiyan intte eta ammanoos giido asata taani kiittana.
4 Gidoppe attin, taanikka yaa biyogee koshshiyaba milatikko, eti tanaara baana.
5 Shin taani Maqidooniyara aadhdhanawu halchchido gishshawu, Maqidooniyara aadhdhiyo wode inttekko baana;
6 geelladan taani amarida wodiya inttenaara takkennan, ubba balgguwa yan aattennan waaya aggana, yaatin intte taani baanasaa guutta ogiya moyssana danddayeeta.
7 Ayssi giikko, Yihoowa shene gidikko, taani inttenaara guuttaa takkanawu koyiyo gishshawu, yaara aadhdhaydda inttenaara gayttanawu koyikke.
8 Shin taani Phenxxaqosxxe Baalay aadhdhana gakkanaashin Efisoonan takkana,
9 ayssi giikko, oottanawu aaho penggee taayyo dooyettiis, shin eqettiyageeti daro.
10 Ximootiyosi inttekko biikko, ikka tanadan Yihoowa oosuwa oottiyo gishshawu, I intte matan takkiyo wode aynne yayyennaadan oottite.
11 Qassi A ooninne karana koshshenna. I taakko yaanaadan guutta ogiya moyssite; ayssi giikko, taani ishatuura issippe I yaana gaada naagays.
12 Ishatoo, nu ishay Aphiloosi ishatuura inttekko baanaadan A woossaas. I haꞌꞌi baanawu qoppibeenna, shin injjetiyo wode I baana.
13 Beegottidi deꞌite, ammanuwan minni eqqite, xala gidite,* mino gidite.
14 Intte oottiyobaa ubbaa siiquwan oottana koshshees.
15 Isxxifaanaasa soo asay Akaayiyan koyro ammanidaageeta* gidiyogaanne eti geeshshata kumetta wozanaappe maaddidoogaa ereeta; hegaa gishshawu, ishatoo, taani inttena hagaa zorays:
16 Hegaa mala asatuyyonne oosuwa issippe minnidi oottiya ubbatuyyo azazettiyogaakka aggoppite.
17 Isxxifaanaasi, Parddonaaxisinne Akayqoosi yiido gishshawu taani keehi ufayttays; eti intte gishshaa tana keehi maaddidosona.
18 Ayssi giikko, eti tanakka inttenakka minttettidosona.* Hegaa gishshawu, hegaa mala asata nashshite.
19 Isiyan deꞌiya galchchati intteyyo sarotaa kiittoosona. Aqiilinne Phirisqqila, eta son deꞌiya galchchaykka Godaa kaalliyageeta gidiyogaadan, intteyyo wozanappe sarotaa kiittoosona.
20 Ishati ubbay inttena saro goosona. Issoy issuwa geeshsha wozanan yeridi sarotite.
21 Taani Phawuloosi ta kushiyan xaafido sarotaa intteyyo kiittays.
22 Ooninne Godaa siiqennaba gidikko, I qanggettana bessees. Nu Godawu, haa ya!
23 Godaa Yesuusi kehiyo laggetiyabi baynna kehatettay inttessi gidanaadan amottays.
24 Kiristtoos Yesuusa kaalliya inttena ubbata taani siiqiyogaa intte ammanettanaadan koyays.
Footnotes
^ Mise, “intteyyo attuma asa eeshshay deꞌo.”
^ Mise, “Akaayiyan gakkida xeera katta.”
^ Mise, “ayyaanan gazddissidosona.”
