Qoronttoosa Asaassi Xaafettida Koyroogaa 2:1-16
2 Hegaa gishshawu, ta ishatoo, taani inttekko biido wode, Xoossay gentti wottido yohuwa intte malaalettanaadan oottiya haasayan woy hayyuwan yootabeykke.
2 Ayssi giikko, taani intte sinttan Yesuus Kiristtoosappe, qassi mittan kaqettidi hayqqida appe haraa erennaadan maacaas.
3 Hegaa bollikka, taani laafatettan, yashshan, qassi keehi kokkoraydda inttekko baas;
4 taani hayyottiya asatuugaadan ammanttiya haasayan yootabeykkenne tamaarissabeykke; shin ta haasayay geeshsha ayyaanaa wolqqaa bessiis;
5 intte asa hayyuwan gidennan, Xoossaa wolqqan ammananaadan hegaa oottaas.
6 Nuuni eta ammanoy minnidoogeetu giddon hayyuwabaa haasayoos, shin hegee ha wodiya hayyuwa woykko ha saꞌaa haariya, xayiyageetu hayyuwa gidenna.
7 Shin nuuni Xoossaa hayyuwa, bonchcho maataa nuuni ekkanaagaa Xoossay daro wodiyappe kase halchchido geemmida yohuwa yootoos.
8 Ha saꞌaa haariyageetuppe ooninne ha hayyuwa eribeenna; eti eridaba gidiyakko nu gita Godaa Yesuusa worokkona.*
9 Shin kasetidi xaafettidoogaadan, “Xoossay bana siiqiyageetuyyo giigissidobaa ayfee beꞌibeenna, hayttay siyibeenna, qassi asa wozanay qoppibeenna.”
10 Ayssi giikko, Xoossay hageeta ba ayyaanan qonccissidoy nuussa; ayyaanay ubbabaa, haray atto Xoossaabaa geemmida yohuwara ubbaa qonccissiyo gishshawu hegee haniis.
11 Issi asa qofaa an deꞌiya ayyaanaappe attin, hari ooni erana danddayii? Hegaadankka, Xoossaa qofaa Xoossaa ayyaanaappe attin, ooninne erenna.
12 Nuuni Xoossay kehatettan nuuyyo immidobaa eranawu Xoossaa ayyaanaa ekkidappe attin, ha saꞌaa ayyaanaa ekkibookko.
13 Qassi nuuni hageetakka goynuwara gayttidabaa qonccissanawu Xoossaa ayyaanaappe ekkidonne tamaarido qaalatun yootoosippe attin, asa hayyuwan tamaarido qaalatun yootokko.
14 Shin Xoossaa ayyaanaara gayttida yohoti ashuwabaa qoppiya asassi eeyyatetta gidiyo gishshawu, I hegeeta ekkenna; he yohoti ayyaanay kaalettin qoriyoba gidiyo gishshawu, I hegeeta erana danddayenna.
15 Gidoppe attin, geeshsha ayyaanay kaalettiyo asi ubbabaa qorees, shin A ooninne qorenna.
16 Ayssi giikko, “Yihoowa tamaarissanawu A qofaa ooni erii?” Shin nuussi Kiristtoosa qofay deꞌees.
Footnotes
^ Woykko “mittan kaqqokkona.”
