Qoronttoosa Asaassi Xaafettida Koyroogaa 3:1-23
3 Hegaa gishshawu, ta ishatoo, A amoy kaalettiyo asa woy Kiristtoosabaa akeekenna keehi guutta naata haasayissiyogaadaanappe attin, ayyaanay kaalettiyo asa haasayissiyogaadan taani inttena haasayissana danddayabeykke.
2 Intte minnibeenna gishshawu, taani inttena maattaa ushshaasippe attin, mino qumaa mizabeykke. Intte haꞌꞌikka minnibeekketa;
3 ayssi giikko, haꞌꞌikka inttena intte amoy kaalettees. Intte issoy issuwa qanaatiyo gishshawunne issoy issuwara ooyettiyo gishshawu, inttena intte amoy kaalettees; qassi hara asaadan deꞌeeta.
4 Ayssi giikko, intte issoy, “Taani Phawuloosaagaa” haray qassi, “Taani Aphiloosaagaa” giyo wode, hara asaa mala gidekketii?
5 Yaatin, Aphiloosi oonee? Phawuloosi shin oonee? Eti Goday nuussi immido oosuwan haggaaziyageetanne intte ammananaadan maaddidaageeta.
6 Taani tokkaas, Aphiloosi haattaa ushshiis, shin Xoossay dichchiyogaa aggenna;
7 hegaa gishshawu, bonchchettana bessiyay dichchiya Xoossaappe attin, tokkiyagaakka haattaa ushshiyagaakka gidenna.
8 Tokkiyageenne haattaa ushshiyagee issippetettan* oottoosona, shin Xoossay eta ubbaa eta oosuwadan oosuwadan anjjana.
9 Ayssi giikko, nuuni Xoossaara oottiyageeta. Intte Xoossay oosuwa oottiyo gade, qassi Xoossay keexxiyo keetta.
10 Xoossay laggetiyabi baynna kehatettaa tawu kehido gishshawu, taani keexxiya waanna oosanchchaadan* shuchchaa hiixxaas, shin hara uri A bolli keexxees. Gidoppe attin, he shuchchaa bolli keexxiya ubbay waati keexxiyakko ubbatoo wochchana bessees.
11 Ayssi giikko, hiixettida shuchchaappe, hegeekka, Yesuus Kiristtoosappe haraa ooninne hiixxana danddayenna.
12 Shin hiixettida shuchchaa bolli ooninne worqqan, biran, alꞌꞌo shuchchan, mittan, gattan woy dalan keexxikko,
13 eta ubbaa oosoy ay malakko ba gallassi qoncci beettana, ayssi giikko, tamay hegaa qonccissana; qassi eti ay mala keettaa keexxidaakko tamay bessana.
14 Issi asi hiixettida shuchchaa bolli keexxidobay xuugettennan attikko, I woytuwa ekkana;
15 issi asa oosoy xuugettikko, appe gitabay xayana, shin I ba huuphen attana; gidoppe attin, I attikko, tamaa giddoora kanttidabadan attana.
16 Intte Xoossaa garo gidiyogaanne Xoossaa ayyaanay intte giddon deꞌiyogaa erekketii?
17 Ooninne Xoossaa garuwa xayssikko, Xoossay A xayssana; ayssi giikko, Xoossaa garoy geeshsha, qassi intte he garo.
18 Ooninne bana cimmoppo: Intte giddoppe ooninne bana ha saꞌaa asay hayyottiya asadan xeellees giidi qoppikko, I hayyottiya asa gidanawu eeyya gido.
19 Qassi ha saꞌaa hayyoy Xoossaa xeelan eeyyatetta, ayssi giikko, “I hayyottiya asati bantta piriyan gelanaadan aggi bayees” geetetti xaafettiis.
20 Qassi, “Yihooway hayyottiya asatu qofay hada gidiyogaa erees.”
21 Hegaa gishshawu, ooninne asan ceeqettoppo; ayssi giikko, ubbabaykka inttebaa,
22 Phawuloosa gidin, Aphiloosa gidin, Keefa* gidin, ha saꞌaa gidin, deꞌuwa gidin, hayquwa gidin, haꞌꞌi deꞌiyabaa gidin, sinttappe yaanabaa gidin, ubbabaykka inttebaa;
23 intte qassi Kiristtoosabaa, Kiristtoosi qassi Xoossaabaa.
Footnotes
^ Woykko “issi halchchuwan.”
^ Woykko “oosuwa kaalettiya uradan.”
^ Pheexiroosakka geetettees.
