Qoronttoosa Asaassi Xaafettida Koyroogaa 4:1-21
4 Asi nuna Kiristtoosawu haarettidi haggaaziya,* Xoossaa keettaa ayssiya, I genttido yohuwa erissiya asadan xeellana mala koyoos.
2 Qassi keettaa ayssiya asi ba oottiyoban ammanettana bessees.
3 Haray atto taaninne tabaa yigga xeellenna gishshawu, intte woy pirddiya asikka tabaa yiggi xeelliyogaa laafabadan xeellays.
4 Ayssi giikko, taani mooridobay aybakko erikke.* Shin hegee taani xillo gidiyogaa bessiyaba gidenna; tana yiggi xeelliyay Yihoowa.
5 Hegaa gishshawu, wodee gakkennan O bollinne pirddoppite; Goday yaanaashin naagite. I xuman geemmidabaa pooꞌuwawu kessananne asa wozanan deꞌiyabaa qonccissana, qassi he wode Xoossay asan ubban eta hanotaadan ufayttana.
6 Simi ta ishatoo, intte otorettenna malanne issuwa haraappe aattidi bonchchenna mala, “Xaafettidabaappe kanttoppite” giya maaraa nunan tamaaranaadan, inttena maaddanawu tabaaninne Aphiloosaban hageeta intteyyo yootaas.
7 Nena haraappe dummayiyay oonee? Qassi neeni ekkabeennabay neessi aybi deꞌii? Yaatin neeni ekkidaba gidikko, ekkabeennabadan ayssi ceeqettay?
8 Intte kalliichchidetiiyye? Intte duretiichchidetiiyye? Nunaara kawotennan kawo gididi haariyogaa doommiichchidetii? Intte kawotidi haariyogaa doommiyakko taani ufayttays, ayssi giikko, yaanidaakko nuunikka inttenaara haarana.
9 Ayssi giikko, nuuni ha saꞌaassi, kiitanchchatussinne asaassi tiyaatiriyan bessiyoba mala gidido gishshawu, hayqqanaadan pirddido asadan ubbaappe wurssettan bessanawu, nuna kiitettidaageeta Xoossay wottidoba tawu milatees.
10 Nuuni Kiristtoosa kaalliyo gishshawu, asay nuna eeyyadan xeellees, shin Kiristtoosa kaalliyo gishshawu, intte inttena wozannaama giidi qoppeeta; qassi nuuni laafa milatoos, shin intte mino milateeta; intte bonchchetteeta, shin nuuni tooshettoos.
11 Nuuni hanno gakkanawu namisettoos, saamettoos, kallottoos, yimppettoos,* qassi deꞌiyo keetti xayin metootoos,
12 qassi minni oottiiddi daafuroos. Asay nuna cayiyo wode anjjoos, naaqqiyo wode danddayoosinne genccoos;
13 nu bolli iitabaa haasayiyo wode liiqo qaalan zaaroos,* hanno gakkanawu ha saꞌaa asay nuna pitodan, ubbabaappe denttidi oliyo maaddennabadan xeellees.
14 Taani hagaa xaafiyoy siiqiyo naatudan inttena zoranaassappe attin, yeellayanaassa gidenna.
15 Ayssi giikko, Kiristtoosa waati kaallanaakko tamaarissiya 10,000 asttamaareti intteyyo deꞌana danddayoosona, shin intteyyo daro aawati deꞌokkona. Kiristtoos Yesuusan nuuni issuwa gidiyo gishshawu, taani mishiraachchuwa yootiyogan inttessi aawa gidaas.
16 Hegaa gishshawu, tana milatanaadan inttena zorays.
17 Godaayyo kumetta wozanaappe haggaaziya, ta siiqiyo naꞌaa Ximootiyosa taani inttekko kiittiyoy hegaassa. Taani galchchatu ubban tamaarissiyo wode Kiristtoos Yesuusawu haggaazaydda kaalliyo maarata* I inttena hassayissana.
18 Tana inttekko beenna giidi qoppiyo gishshawu, intteppe issoti issoti otorettoosona.
19 Shin Yihoowa shene gidikko, taani inttekko mati baana. He otoranchchati haasayiyobaa eranaassa gidana xayikkonne, etawu Xoossaa wolqqay deꞌiyakkonne eranaassi eta beꞌanawu koyays.
20 Ayssi giikko, Xoossaa Kawotettay issi uri Xoossaappe demmiyo wolqqaanappe attin, I haasayiyoban qonccenna.
21 Intteyyo awugee kehee? Gatimaa ekkada booyye, siiqoynne liiqo qaalay kehee?
Footnotes
^ Woykko “maaddiya.”
^ Woykko “ta kahay geeshsha.”
^ Woykko “asay nuna yimppees.”
^ Woykko “awuddashoos.”
^ Mise, “ogeta.”
