Qoronttoosa Asaassi Xaafettida Koyroogaa 6:1-20
6 Intteppe issi uri haraa mootiyobi deꞌikko, pirddawu geeshshatukko biyogaa aggidi, ammanenna asati pirddanaadan pirdda keettaa baanawu waani xalii?
2 Woy geeshshati saꞌaa asaa bolli pirddanaagaa erekketii? Intte saꞌaa asaa bolli pirddanaba gidikko, laafabaa pirddanawu danddayekketii?
3 Nuuni kiitanchchatu bolli pirddanaagaa erekketii? Yaanikko, nuuni ha deꞌuwa allaalleta pirddana danddayoos.
4 Pirddi koshshiyo ha deꞌuwa allaalleti inttessi deꞌikko, galchchay kariyogeeti pirddana mala etakko ayssi beetii?
5 Taani inttena yeellayanawu hagaa gays. Ba ishatubaa pirddana danddayiya hayyottiya issi asinne intte giddon baawee?
6 Shin issi ishay ammanenna daannaa sinttan hara ishaa mootees!
7 Intte issoy issuwa pirdda keettan mootiyo wode kawuyyideta. Yaatiyogaappe intte naaqettiyakko kehennee? Qassi asi intteppe balibakkidi ekkiyakko kehennee?
8 Shin intte intte ishata naaqqeetanne balibakkeeta!
9 Woy xillo gidenna asati Xoossaa Kawotettaa laattennaagaa erekketii? Cimettoppite.* Pokkiya tuna nagaraa* oottiyageeti, eeqawu goynniyageeti, wodiraa laammiyageeti, attuma asaara zinꞌꞌiya attumaageeti,*
10 kaysoti, yaaretiya asati, mattottiyageeti, cayiyageetinne bonqqiyageeti Xoossaa Kawotettaa laattokkona.
11 Qassi intteppekka issoti issoti kase hegaa mala asa. Shin Godaa Yesuus Kiristtoosa sunttaaninne nu Xoossaa ayyaanan geeyideta, Xoossawu dummatideta, qassi xillo geetettideta.
12 Ubbabaakka tana diggiya higgee baawa, shin tana maaddiyay ubbabaa gidenna. Ubbabaakka tana diggiya higgee baawa, shin taani aybissinne aylletikke.
13 Qumay uluwassa, uloykka qumaassa; shin Xoossay he naaꞌꞌatakka maaddennaba kessana. Nu bollan Godawu oottana koshsheesippe attin, pokkiya tuna nagaraa* oottana koshshenna, qassi Goday bollawu koshshiyabaa immees.
14 Shin Xoossay Godaa denttidoogaadan, nunakka ba wolqqan hayquwappe denttana.
15 Intte bollay Kiristtoosa bollaara gayttidi issuwa gididoogaa erekketii? Taani inttena shaaramuxaara issuwa oottanawu Kiristtoosa bollaappe shaakkiyabadan qoppeetii? Mule yaatikke!
16 Shaaramuxa maccaaseera gayttiya ooninne iira issi bolla gidiyogaa erekketii? Ayssi giikko, Xoossay, “Eti naaꞌꞌay issi asho gidana” yaagees.
17 Shin issi asi Godaara issuwa gidikko, ayyaanan aara issuwa gidana.
18 Pokkiya tuna nagaraappe* baqite! Asi oottiyo hara ay nagaranne ba bollaappe kareera oottees, shin pokkiya tuna nagaraa oottiya uri ba bollan he nagaraa oottees.
19 Intte bollay Xoossay intteyyo immido, intte giddon deꞌiya geeshsha ayyaanaa garo gidiyogaa erekketii? Qassi intte inttebaa gidekketa,
20 ayssi giikko, intte alꞌꞌoban shamettideta. Hegaa gishshawu, intte bollan Xoossaa bonchchite.
Footnotes
^ Woykko “baloppite.”
^ Giriikettuwan, Porniya.
^ Koyro xaafettido qaalan ha sohuwan, issoy attuma asadan, haray qassi macca asadan haniyogaa bessiya naaꞌꞌu qaalati deꞌoosona.
^ Giriikettuwan, Porniya.
^ Giriikettuwan, Porniya.
