Qoronttoosa Asaassi Xaafettida Koyroogaa 7:1-40
7 Intte taassi xaafidi oychchidobaara gayttidaagan, attuma asi maccaaro bochchennaakko* loꞌꞌo;
2 shin pokkiya tuna nagaray* daridoogaa gaasuwan, attuma asa ubbawu machcha deꞌiyogeenne macca asa ubbawu azini deꞌiyogee loꞌꞌo.
3 Azinay ba machchee maata gididabaa iyyo ootto, hegaadan machchiyakka ba azinaa maata gididabaa ayyo oottu.
4 Machchee bollan I azinaassappe attin, iyyo maati baawa; hegaadankka, azinaa bollan A machcheessappe attin, ayyo maati baawa.
5 Intte woosawu wodiya bazzanaassa gidikkokka, maayettidi guutta wodiyassa gidana koshsheesippe attin, issoy issuwa diggoppite; hegaappe simmin, intte inttena naagana xayin Seexaanay paaccenna mala zaarettidi gayttite.
6 Gidoppe attin, taani yootidobay oottana danddayettiyabappe attin, azazo gidenna.
7 Shin asay ubbay tanadan ekkennan deꞌiyakko ixxikke. Gidoppe attin, Xoossay asa ubbaa issi mala oottibeenna; issoti issoti ekkennan deꞌoosona, shin harati machcho ekkoosona.
8 Azina gelibeennaageetinne amꞌꞌeti tanadan deꞌiyogee etawu loꞌꞌo gays.
9 Shin eti banttana naaganawu danddayennaba gidikko, azina gelona; ayssi giikko, amuwan xuugettiyogaappe azinaa geliyogee loꞌꞌo.
10 Machchiya ba azinaappe shaahettenna mala, azinaa gelidaageeta azazays (Goday azazeesippe attin, tana gidikke).
11 Shin A shaahettikko, hara azinaa gelennan deꞌu, woy ba azinaara sigettu; qassi azinay ba machcheeppe shaahettana koshshenna.
12 Shin haratuyyo taani (Godaa gidenna) hagaa gays: Issi ishaa machchiya ammanennaaro gidikko, qassi A aara deꞌanawu koyikko, I ippe shaahettoppo;
13 hegaadankka, issi maccaasee azinay ammanennaagaa gidikko, qassi I iira deꞌanawu koyikko, A ba azinaappe shaahettuppu.
14 Ayssi giikko, ammanenna azinay ba machchee gaasuwan anjjuwa demmana,* qassi ammanenna machchiya ishaa gaasuwan anjjuwa demmana;* hankkoode, intte naati anjjuwa demmokkona,* shin haꞌꞌi eti anjjuwa demmidosona.*
15 Gidoppe attin, ammanennaagee shaahettanawu koyikko shaahetto; issi ishay woy issi michchiya hegaa mala hanotan qashettana bessenna, shin Xoossay inttena sarotettawu xeegiis.
16 Ayssi giikko, machchee, neeni ne azinaa ashshanaakkonne ay eray? Woy azinawu, neeni ne machchiyo ashshanaakkonne ay eray?
17 Gidoppe attin, asi ubbi Yihooway A gishsha giidi immidoogaadan, Xoossay A xeegiyo wode deꞌiyogaadan deꞌo. Qassi taani galchchatu ubban hagaa azazays.
18 Ooninne Xoossay A xeegiyo wode qaxxarettidaba gidikko, I hegaadan deꞌo. Ooninne Xoossay A xeegiyo wode qaxxarettibeennaba gidikko, I qaxxarettoppo.
19 Keehi koshshiyabay Xoossaa azazuwa naagiyogaappe attin, qaxxarettiyogaakka qaxxarettennaagaakka gidenna.
20 Asi ubbi ay mala hanotan deꞌishin Xoossay A xeegikkokka, hegaadan deꞌo.
21 Neeni xeegettiyo wode ayllee? Hegee nena metoppo, shin neeni aylletettaappe kiyana danddayikko kiyaagga.
22 Ayssi giikko, Goday xeegiyo wode aylle gidida ooninne Godawu goqa; hegaadankka, xeegettiyo wode goqa gidida ooninne Kiristtoosa aylle.
23 Intte alꞌꞌoban shamettideta; asa aylle gidiyogaa aggite.
24 Ta ishatoo, asi ubbi Xoossay A xeegiyo wode deꞌiyogaadan A sinttan deꞌo.
25 Ekkibeenna woy gelibeenna asatuban* Goday tana azazidobi baawa, qassi Goday taayyo ba maarotaa bessido gishshawu, taani yootiyobaa ammanettana danddayeeta.
26 Nuuni metiya wodiyan deꞌiyo gishshawu, asi ba deꞌiyogaadan deꞌiyogee loꞌꞌo gaada qoppays.
27 Neeyyo machchiya deꞌay? Shaahettanawu koyoppa. Neeyyo machchiya baawee? Machcho ekkanawu koyoppa.
28 Shin neeni ekkiyaba woy geliyaba gidikkokka, nagara oottakka. Qassi ekkibeenna woy gelibeenna uri* ekkanawu woy gelanawu maacikko, nagara oottenna. Gidoppe attin, yaatiyageeti bantta ashuwan waayettana. Shin taani inttena hegaappe ashshanawu koyays.
29 Ta ishatoo, attida wodee guutta gidiyogaakka hassayite. Hagaappe sinttan, machcho ekkidaageeti machcho ekkibeennabadan hanona,
30 qassi yeekkiyageeti yeekkennabadan, ufayttiyageeti ufayttennabadan, shammiyageeti hegee etabaa gidennabadan hanona,
31 qassi ha saꞌaa asaaban goꞌettiyageeti wurssi goꞌettennabadan hanona; ayssi giikko, ha saꞌaa meray laamettiiddi deꞌees.
32 Taani intte hirggenna mala koyays. Machchibeenna asi Godaa ufayssanawu koyiyo gishshawu, A oosuwabawu hirggees.
33 Shin machchida asi ba machchiyo ufayssanawu koyiyo gishshawu, deꞌuwan ubbatoo koshshiyabawu hirggees,
34 qassi A koshshay shaahettees. Hegaa bollikka, azini baynna maccaasiya, qassi ekkibeenna woy gelibeenna uri ba bollaaninne ba ayyaanan geeshsha gidanawu Godaa oosuwabawu hirggoosona. Gidoppe attin, azina gelida maccaasiya ba azinaa ufayssanawu koyiyo gishshawu, deꞌuwan ubbatoo koshshiyabawu hirggawusu.
35 Qassi taani intte goꞌettanaadan hagaa yootays; shin intte intte wozanaa koshshay shaahettennan Godaayyo bessiyabaa ubbatoo wozanappe oottanaadan denttettanaassappe attin, hegaa inttena qachchanaassi yootikke.
36 Shin ooninne machcho ekkennan deꞌiyogan* bessennabaa hanaydda deꞌays giidi qoppikko, qassi I biron galddo* gidana xayikko, ekkiyogee loꞌꞌo. Hegee nagara gidenna.
37 Shin issi asi ekkennan deꞌanawu* ba wozanan murttikkonne ekkanawu koyana xayikko, qassi I bawu maacidobaa naagidi deꞌana danddayikko, I maacidoogaadan deꞌo, I loꞌꞌobaa oottees.
38 Hegaa bollikka, ekkiyagee* loꞌꞌobaa oottees, shin ekkennaagee ubba keehi loꞌꞌobaa oottees.
39 Machchiya I azinay paxa deꞌiyo wode ubban qashuwan deꞌawusu. Shin azinay hayqqikko,* A laꞌa gidiyo gishshawu, Godaa xalaalaana gidoppe attin, ba koyido asa gelana danddayawusu.
40 Shin A gelennan deꞌikko keehi ufayttawusu gaada qoppays; tanan qassi Xoossaa ayyaanay deꞌiyogaa ammanettays.
Footnotes
^ Hegee, inddaa gaytettaa bessees.
^ Giriikettuwan, Porniya.
^ Mise, “geeyiis.”
^ Mise, “geeyaasu.”
^ Mise, “geeshsha gidokkona.”
^ Mise, “geeshsha.”
^ Mise, “Geelaꞌotettan deꞌiya attuma asatanne macca asata.”
^ Woykko “ba geelaꞌotettaara gayttidaagan.”
^ Woykko “keehi yelaga.”
^ Woykko “geelaꞌotettaa naaganawu.”
^ Woykko “ba geelaꞌotettaa immiyagee.”
^ Mise, “hayquwan xiskkikko.”
