Qoronttoosa Asaassi Xaafettida Koyroogaa 8:1-13
8 Haꞌꞌi intteyyo eeqawu yarshshido qumaa xeelliyagan xaafays. Nuuni ubbay ha yohuwabaa eroos. Eray otorissees, shin siiqoy minttettees.
2 Ooninne issibaa eriyabadan qoppikko, he yohuwabaa I erana koshshiyo ubbabaa eriichchibeenna.
3 Shin ooninne Xoossaa siiqikko, Xoossay A erees.
4 Eeqawu yarshshido qumaa miyogaara gayttidaagan, eeqi aynne maaddennaagaanne issi Xoossaappe attin, hara Xoossi baynnaagaa eroos.
5 Ayssi giikko, asay daro “xoossati,” qassi daro “godati” deꞌoosona giidi ammaniyogaadan, saluwan gidin saꞌankka, xoossata geetettiyageeti deꞌikkokka,
6 ubbabay appe gididonne nuuni ayyo deꞌiyo issi Xoossay, Aaway nuussi deꞌees; qassi Xoossay ubbabay, nuunikka aani deꞌanaadan oottido issi Goday, Yesuus Kiristtoosi deꞌees.
7 Gidoppe attin, hegaa eriyay ubba asaa gidenna. Shin issoti issoti eeqawu kase goynniyo gishshawu, eeqawu yarshshido qumaa miyo wode eeqawu goynniyabadan qoppoosona, qassi minnibeenna eta kahay eta mootees.*
8 Shin qumay nuna Xoossaara dabboyenna; nuuni meennan aggidi goꞌettennan attokko, woy miidikka goꞌettiyobi baawa.
9 Shin intte dooriyo maatay minnibeenna asata ayba ogiyanakko xubbiyaba gidenna mala naagettite.
10 Ayssi giikko, minnibeenna asi neeni eray deꞌiyogee eeqa xoossaa garuwan qumaa miishin beꞌikko, ba kahaa eqettidi eeqawu yarshshido qumaa maanawu xalennee?
11 Hegaa gishshawu, ne eray Kiristtoosi A gishshawu hayqqido, minnibeenna ne ishaa ammanoy moorettanaadan oottees.
12 Intte intte ishata hegaadan naaqqidi minnibeenna eta kahaa azzanttiyo wode, Kiristtoosa bolli nagaraa ootteeta.
13 Hegaa gishshawu, qumi ta ishaayyo xube gidikko, taani ta ishaa xubbenna mala, hagaappe guyyiyan mule asho miikke.
Footnotes
^ Mise, “miiriqiis.”
