Qoronttoosa Asaassi Xaafettida Koyroogaa 9:1-27
9 Taani laꞌa asa gidikkinaa? Taani Kiristtoosi kiittidoogaa gidikkinaa? Taani nu Godaa Yesuusa beꞌabeykkinaa? Godan intte ta oosuwa ayfeta gidekketii?
2 Taani haratuura gayttidaagan kiitettidaagaa gidana xayikkonne, intteyyo kiitettidaagaa gidiyogee qoncce. Ayssi giikko, intte tana Goday kiittidoogaa bessiya maatafa mala.
3 Tana boriyageetuyyo taani zaariyobay hagaa:
4 Maanawunne uyanawu nuussi maati baawee?
5 Kiitettida haratudaaninne Godaa ishatudan, qassi Keefadan* ammaniya machchiyo ekkidi iira yuuyanawu nuussi maati baawee?
6 Woy deꞌuwawu koshshiyabaassi oottiyogaa agganawu maati baynnaageeti tananne Barnnaabaasa xalaalee?
7 Ba oosuwa oottiiddi bawu koshshiya ubbabawu miishsha qanxxiya wotaaddari deꞌii? Woyne tokkidi A ayfe meennay oonee? Woy wude heemmiiddi he wudiya maattaappe goꞌettennay oonee?
8 Taani yootiyobay asa woga gidenna. Higgeekka hegaa yootees.
9 Ayssi giikko, Muuse Higgiyan, “Neeni kattaa qoxxiyo wode booraa doonaa qachchoppa” geetettidi xaafettiis. Xoossay boorata qoppidi giidee?
10 Woy hegaa nuussi xaafissidee? Hegee nu gishshawu xaafettidoogee tuma. Ayssi giikko, gaden goyiyageenne kattaa qoxxiyagee kattaa ekkanaagaa ammanettidi oottana koshshees.
11 Nuuni intte wozanan Xoossaa qaalaa zeridaba gidikko, nuussi koshshiyabaa intteppe ekkiyogee bessennabee?
12 Harata intte maaddana mala etawu maati deꞌikko, nuuyyo etaagaappe aadhdhiya maati deꞌennee? Gidoppe attin, nuuni he maatan goꞌettibookko; shin Kiristtoosabaa yootiyo mishiraachchoy ubbasaa gakkennaadan nuuni ayba ogiyaninne xube gidenna mala ubbabaa genccoos.
13 Xoossaa garuwan oottiyageeti yan deꞌiya qumaappe miyogaa erekketii? Qassi yarshshiyosan oottiyageeti yaappe bantta gishshaa ekkiyogaa erekketii?
14 Hegaadankka, mishiraachchuwa yootiyageeti mishiraachchuwan banttawu koshshiyabaa demmanaadan Goday azaziis.
15 Gidoppe attin, intte tawu aybanne oottanaadan oychchabeykke. Taani intte tawukka hegaa oottana koshshees gaanawu xaafabeykke; yaatiyogaappe taayyo hayqoy keha. Taani ceeqettiyobaa ooninne mela ashshanaadan koyikke!
16 Taani mishiraachchuwa yootiyo gishshawu ceeqettiyo gaasoy baawa; ayssi giikko, hegee taani oottana bessiyaba. Ubba taani mishiraachchuwa yootennaba gidikko, taayyo aayyeero!
17 Taani koyiyo gishshawu ha oosuwa oottikko, taayyo woytoy deꞌees; shin taani koyennan oottiyakkokka, Xoossay tawu ha oosuwa hadaraa immiis.
18 Yaatin ta woytoy aybee? Ta woytoy mishiraachchuwa coo yootiyogaa. Yaatiyogan, mishiraachchuwa yootana mala tawu imettanaadan oychchiyo maatay deꞌiyobata oychchennan aggana danddayays.
19 Taani oossinne aylle gidikke, shin ehaana danddayiyogaa keena daro asaa Kiristtoosakko ehaanawu tana ubbawu aylle oottaas.
20 Ayhudata ehaanawu Ayhudatuura Ayhuda asa mala gidaas; taani higgiyadan deꞌiyaba gidikkonne, higgiyadan deꞌennaageeta ehaanawu higgiyadan deꞌenna asa mala gidaas.
21 Taani Xoossaa higgiyadaaninne Kiristtoosa higgiyadan deꞌays, shin taani higgiyadan deꞌennaageeta ehaanawu etaara higgiyadan deꞌenna asa mala gidaas.
22 Minnibeenna asata ehaanawu minnibeennaageetuura minnabeenna asa gidaas. Taani ay hanikkonne amaridaageeta ashshanawu, ubba qommo asawu tawu danddayettida ubbabaa oottaas.
23 Shin taani ubbabaa oottiyoy haratuyyo mishiraachchuwa yootanaassa.
24 Wottaa annaaciyan woxxiyay ubbaa gidikkonne, woytuwa ekkiyagee issuwa xalaala gidiyogaa erekketii? Inttekka woytuwa ekkana danddayiyo ogiyan woxxite.
25 Annaacettiya* ubbay ubbaban bana naagees. Eti xayana danddayiya kallachchaa ekkanawu yaatoosona, shin nuuni xayenna kallachchaa ekkanaassa.
26 Hegaa gishshawu, taani gakkana sohuwa eriyo gishshawu woxxays; qassi carkko yimppiya asadan yimppikke;
27 shin taani haratuyyo mishiraachchuwa yoota simmin Xoossay tana ayba ogiyanakko aggenna mala, ta bollaa yimppaysinne* taayyo aylle oottays.
