Tasalonqqe Asaassi Xaafettida Koyroogaa 2:1-20
2 Ishatoo, nuuni inttena xomoosidoogee hada attibeennaagaa intte eriyogee tuma.
2 Ayssi giikko, intte eriyogaadan, nuuni Piliphisiyusan koyro waayettidabanne kawuyyidaba gidikkokka, asay keehi eqettishin* Xoossaa mishiraachchuwa yayyennan* intteyyo yootanaadan Xoossay nuna maaddiis.
3 Nuuni inttena worddo qofan woy iita qofan woy balettanawu zorokko,
4 shin mishiraachchuwa yootanaadan Xoossay doorido asadan intteyyo yootoos; nuuni wozanaa yiggi xeelliya Xoossaa ufayssanawu yootoosippe attin, asaa ufayssanawu yootokko.
5 Nuuni inttena heebboyiyo haasayan cimmibeennaagaa, qassi intteppe aybakko ekkanawu giidi loꞌꞌo asa milatibeennaagaa intte ereeta; hegawu Xoossay markka!
6 Nuuni Kiristtoosi kiittidoogeeta gidiyo gishshawu inttena darobaa kesissidi tooho gidana danddayikkonne, intte woy harati nuna sabbanaadan* koyibookko.
7 Shin xanttiya aayyiya ba naatuyyo qarettiyogaadaaninne qoppiyogaadan, nuuni siiqiyogaanne kehiyogaa intte giddon bessida.
8 Nuuni inttena keehi siiqiyo gishshawu, Xoossaa mishiraachchuwa xalaala gidennan, inttessi giidi nu shemppuwakka* immanawu murttida.*
9 Ishatoo, nuuni minnidi oottidoogaanne keehi daafuridoogaa intte hassayiyogee tuma. Nuuni Xoossaa mishiraachchuwa intteyyo yootido wode, intte giddon oonanne darobaa kesissidi ayyo tooho gidenna mala qamminne gallassi oottida.
10 Nuuni inttenaara, ammaniyageetuura ammanettiyageeta gididi, xillobaa oottiiddinne boree baynnan deꞌida; hegawu inttekka Xoossaykka markka.
11 Aaway ba naatuyyo oottiyogaadan, nuuni inttena ubbaa zoridoogaa, minttettidoogaanne ay oottana koshshiyakko intteyyo mintti yootidoogaa loytti ereeta;
12 hegaappe denddidaagan, intte inttena ba kawotettawunne bonchchuwawu xeesida Xoossaa ufayssiya ogiyan deꞌana koshshees.
13 Nuuni Xoossaa ubbatoo galatiyoy hegaassa; ayssi giikko, intte nuuppe siyido Xoossaa qaalaa ekkido wode, ammaniya inttena oosuwawu denttettiya Xoossaa qaaladan ekkidetappe attin, asa qaaladan ekkibeekketa, qassi I tumukka Xoossaa qaala.
14 Ayssi giikko, ishatoo, Kiristtoos Yesuusa kaalliya, Yihudan deꞌiya Xoossaa galchchati Ayhudatu kushiyan waayettidoogaadan inttekka intte biitta asatu kushiyan waayettido gishshawu, eta milatideta.
15 he asati haray atto, Godaa Yesuusanne Xoossay erissidobaa yootiyageetakka woridosona, qassi nuna naaqqidosona; hegaa bollikka, eti Xoossaa ufayssennabaa oottoosona, qassi eti oottiyobay ooyyonne loꞌꞌo gidenna;
16 ayssi giikko, hara biittaa asay attana mala nuuni etayyo yootennaadan, eti digganawu maloosona; yaatiyogan eti ubbatoo nagaraa bolli nagaraa gujjoosona. Shin Xoossay ba hanqquwa haꞌꞌi eta bolli gussana hanees.
17 Ishatoo, nuna asay intteppe shaakkido wode, inttena beꞌana danddayennaba gidikkonne, inttena hassayiyogaa aggibookko; shin nuuni wozanappe koyido gishshawu, inttena* beꞌanawu keehi baaxetida.
18 Hegaa gishshawu, nuuni inttekko baanawu koyida, ee, taani Phawuloosi naaꞌꞌutoo baanawu malaas; shin Seexaanay nuuyyo ogiya gorddiis.
19 Yesuusi yiyo wode nuuni A sinttan ceeqettiyo, nu hidootay woy nu ufayssay woy nu kallachchay oonee? Inttena gidekketii?
20 Intte nuuyyo bonchchonne ufayssa gidiyogee tuma.
Footnotes
^ Woykko geella, “keehi baaxetishin.”
^ Woykko “xalidi.”
^ Mise, “gitayanaadan.”
^ Woykko “nunakka.”
^ Mise, “keehi ufayttida.”
^ Mise, “intte somꞌꞌuwa.”
