Tasalonqqe Asaassi Xaafettida Koyroogaa 3:1-13
3 Hegaappe denddidaagan, nuuyyo danddayettennan ixxido gishshawu, Ateenan nurkka takkiyogee loꞌꞌo giidi qoppida;
2 shin nuuni Kiristtoosabaa mishiraachchuwa yootiya, Xoossaayyo haggaaziya* nu ishaa Ximootiyosa inttekko kiittida; nuuni intte ammanuwassi giidi I inttena minttanaadaaninne minttettanaadan kiittoos;
3 hegaappe denddidaagan, he waayiya gaasuwan ooninne yeeqenna.* Ayssi giikko, hegaa malabay nu bolli gakkiyogee attennaagaa* intte ereeta.
4 Nuuni waayettanaagaa, inttenaara deꞌiyo wode intteyyo darotoo yootida, qassi intte eriyogaadan, hanidabaykka hegaa.
5 Taayyo danddayettennan ixxin, Xoossan intte ay keena ammanettiyakko eranawu taani kiittidoy hegaassa. Paacciyagee awunkko inttena paaccideeshsha? Yaanikko, nu daafuray hada attiis.
6 Shin Ximootiyosi haꞌꞌi intte matappe nuukko yiidi, intte siiquwabaanne Xoossan intte ay keena ammanettiyakko nuuyyo mishiraachchuwa yootiis; qassi intte nuna hassayiyo wode ubbatoo keehi ufayttiyogaanne nuuni inttena beꞌanawu laamotiyogaadan inttekka nuna beꞌanawu laamotiyogaa yootiis.
7 Ishatoo, nuuni metootiyabanne* waayettiyaba gidikkokka, Xoossan intte ammanettiyogee nuna minttettidoy hegaassa.
8 Ayssi giikko, Godan intte minni eqqidaashiyan nuuni minettida.*
9 Intte gaasuwan Xoossaa sinttan nuuni keehi ufayttidoogawu A galatiyogaa waati bessana danddayiyo?
10 Nuuni inttena* beꞌana malanne intte ammanuwa minttana mala, nuuyyo danddayettida ubban qamminne gallassi wozanappe woossoos.
11 Nuuni inttekko baanaadan nu Xoossay Aawaynne nu Goday Yesuus Kiristtoosi maaddana mala woossoos.
12 Qassi nuuni inttena siiqiyogaadan, intte issoy issuwa siiqiyo siiqoy dalgganaadaaninne intte wozanan eellanaadan Goday maaddana mala amottoos;
13 yaanikko, I intte wozanaa minttana, qassi nu Goday Yesuusi ba geeshshatu ubbaara yiidi takkiyo wode nu Xoossaa Aawaa sinttan I inttena boree baynna geeshsha oottana.
Footnotes
^ Woykko geella, “Xoossaara issippe oottiya.”
^ Woykko “qaaxxenna.”
^ Woykko “hegawu nuuni sunttettidoogaa.”
^ Mise, “nuna koshshidabanne.”
^ Mise, “deꞌoos.”
^ Mise, “intte somꞌꞌuwa.”
