Tasalonqqe Asaassi Xaafettida Koyroogaa 4:1-18
4 Ishatoo, intte Xoossaa ufayssiya ogiyan waanidi deꞌana koshshiyakko nuuni inttena tamaarissida, qassi intte hegaadan deꞌeeta. Shin intte hegaa yaa gujjidi oottanaadan haꞌꞌi intteyyo yootoosinne inttena woossoos.
2 Ayssi giikko, Godaa Yesuusa sunttan nuuni inttena azazidobaa* ereeta.
3 Intte geeshsha gidanaadaaninne pokkiya tuna nagaraappe* baqanaadan Xoossay koyees.
4 Intte ubbay intte bollaa* geeshshatettaaninne bonchchuwan waati naaganaakko erana koshshees;
5 Intte Xoossaa erenna hara biittaa asaagaadan yaaretidi attuma asa woy macca asa qaaqqan xuugettana koshshenna.
6 Nuuni kase yootidoogaadaaninne inttena mintti zoridoogaadan, ha ubbabaa gaasuwan Yihooway qaxxayiyo gishshawu, ha yohuwan ooninne bessennabaa oottananne ba ishaa qohana koshshenna.
7 Ayssi giikko, Xoossay nuuni geeshsha gidanaadan xeesiisippe attin, geeshsha gidenna deꞌuwawu nuna xeesibeenna.
8 Hegaa gishshawu, hagaa xaasayidi xeelliya uri asa gidennan, intteyyo geeshsha ayyaanaa immiya Xoossaa xaasayees.
9 Gidoppe attin, intte issoy issuwa siiqanaadan Xoossay tamaarissido gishshawu, ishanttudan siiqettanaadan nuuni intteyyo xaafana koshshenna.
10 Intte Maqidooniyan ubbasan deꞌiya ishata ubbaa hegaadan siiqeeta. Shin ishatoo, hegee intteyyo ubbatoo eellanaadan inttena zoroos.
11 Nuuni inttena azazidoogaadan, maara deꞌanawu, asa yohon gelennan agganawunne intte kushiyan oottanawu wozanappe koyite;
12 yaatikko, intteyyo aybinne paccenna, qassi galchchan deꞌennaageetu sinttan intte maara deꞌana.
13 Hegaa bollikka, ishatoo, hayqqidaageetubaa* intte akeeka xayanaadan koyokko; yaatikko, intte hidooti baynna asatuugaadan kayyottekketa.
14 Nuuni Yesuusi hayqqidoogaanne denddidoogaa ammaniya asa gididaashin, Yesuusaara issuwa gididi hayqqidaageeti aara deꞌanaadan Xoossay eta denttanaagaakka ammanoos.
15 Ayssi giikko, nuuni Yihooway yootidoogaadan intteyyo odiyobay hagaa: Goday yiidi takkiyo wode deꞌanaageeti nuuni hayqqidaageetuppe mule kasetokko;
16 Ayssi giikko, Goday saluwappe yaana; he wode I Xoossaa malkkataa oyqqidi azaziyogee, kiitanchchatu ubbaa gadaawaa xeessay* siyettana, qassi Kiristtoosan issuwa gididi hayqqidaageeti koyro denddana.
17 Hegaappe guyyiyan, he wode deꞌiya nuuni etaara deꞌanaadan, shaaran pude denttin carkkuwan Godaara gayttana; yaatin nuuni ubbatoo Godaara deꞌana.
18 Hegaa gishshawu, hageeta yootidi issoy issuwa ubbatoo minttettite.
Footnotes
^ Woykko “tamaarissidobaa.”
^ Giriikettuwan, porniya.
^ Mise, “keriya.”
^ Mise, “xiskkidaageetubaa.”
^ Mise, “cenggurssay.”
