Tasalonqqe Asaassi Xaafettida Koyroogaa 5:1-28
5 Ishatoo, Xoossay doorido gallassatubaanne wodetubaa aybanne nuuni intteyyo xaafana koshshenna.
2 Ayssi giikko, Yihoowa gallassay kaysoy qammi yiyogaadan yaanaagaa intte loytti ereeta.
3 Eti, “Saro, hirggissiyabi baawa!” yaagiyo wode, shahaara macca asa leessoy oyqqiyogaadan akeekennan sohuwara xayana, qassi mule kessi ekkokkona.
4 Shin ishatoo, intte xuman deꞌekketa; hegaa gishshawu, kaysotussi saꞌay akeekennan wonttibayiyogaadan he gallassay inttessi akeekennan yeenna;
5 ayssi giikko, intte ubbay pooꞌuwa naata, qassi gallassaa naata. Nuuni qammaa naata woy qassi xumaa naata gidokko.
6 Hegaa gishshawu, haratuugaadan xiskkiyogaa simi aggidi, beegottidinne nu suure qofaa naagidi deꞌoos.
7 Ayssi giikko, xiskkiyageeti qammi xiskkoosona, mattottiyageetikka qammi mattottoosona.
8 Shin nuuni gallassaa naati simi nu suure qofaa naagidi deꞌoos, qassi ammanuwanne siiquwa tiran wottiyobadan, hegaadankka, atotettaa hidootaa birata qophedan maayos;
9 ayssi giikko, Xoossay nu Godaa Yesuus Kiristtoosan nuna ashshanawu xeegiisippe attin, qaxxayanawu* xeegibeenna.
10 I nuussi hayqqiis; hegaappe denddidaagan, nuuni beegottidi deꞌikkokka woy xiskkikkokka* aara issippe deꞌana.
11 Hegaa gishshawu, haꞌꞌi intte oottiyogaadan, issoy issuwa minttettiyogaanne issoy issuwa maaddiyogaa aggoppite.
12 Ishatoo, intte giddon minnidi oottiyageeta, qassi sintta xeera gididi Godan inttena kaalettiyageetanne zoriyageeta bonchchanaadan nuuni intteyyo yootoos;
13 qassi eti oottiyobaa gishshawu eta keehi bonchchitenne siiqite. Issoy issuwara saro deꞌite.
14 Gidoppe attin, ishatoo, intte maara deꞌennaageeta mintti zoranaadan, azzaniyageeta* minttettanaadan, minnibeennaageeta maaddanaadaaninne asa ubbaa danddayanaadan mintti yootoos.
15 Intte ooyyonne iitabawu iitabaa oottidi halo kessennaadan naagettite, shin awudekka issoy issuwawunne asa ubbawu loꞌꞌobaa oottite.
16 Ubbatoo ufayttite.
17 Ubba wode woossite.
18 Ubbabawu Xoossaa galatite. Intte Kiristtoosa kaalliyageeta gidiyo gishshawu Xoossay intteppe koyiyobay hegaa.
19 Ayyaanaa tamaa toyssoppite.
20 Xoossay erissido yohota karoppite.
21 Ubbabay tumakkonne paaccite; loꞌꞌobaa mintti oyqqite.
22 Iitaba ubbaappe baqite.
23 Sarotettaa Xoossay inttena muleera geeshsha oottanaadan woossays. Qassi ishatoo, nu Goday Yesuus Kiristtoosi yiidi takkiyo wode, intte ayyaanay, intte shemppoynne* intte bollay ubbaban tillanne boree baynnaagaa gidanaadan woossays.
24 Inttena xeegiya Xoossay ammanettees, qassi I hegaa oottanaagee tuma.
25 Ishatoo, nuussi woossiyogaa aggoppite.
26 Ishata ubbaa geeshsha wozanan yeridi sarotite.
27 Ha dabddaabbiya ishatu ubbaassi nabbabanaadan Godaa sunttan taani inttena woossays.
28 Laggetiyabi baynna nu Godaa Yesuus Kiristtoosa kehatettay intteyyo gido.
Footnotes
^ Woykko “hanqqettanawu.”
^ Woykko “hayquwan xiskkikkokka.”
^ Woykko “yibbaatidaageeta.” Mise, “shemppoy laafidoogeeta.”
^ Woykko “deꞌoynne.”
