Qoronttoosa Asaassi Xaafettida Naaꞌꞌanttoogaa 10:1-18
10 Inttenaara gayttiyo wode intte laafa asadan xeellikkonne, intteppe shaahettiyo wode xala asadan xeelliyo, taani Phawuloosi, Kiristtoosadan ashkkenne keha gidada inttena woossays.
2 Nuuni nu ashoy koyiyogaadan deꞌiyabadan qoppiya issoti issoti taani yaa gakkiyo wode laamettiichchana gaada qoppays; hegaappe denddidaagan, taani eta mintta seerana koshshenna.
3 Ayssi giikko, nuuni ashoy koyiyogaadan deꞌikkokka, ashoy koyiyogaadan olettokko.
4 Nu olaa miishshati asaagaa mala gidokkona, shin mino qato malabaa laalanawu Xoossay nuuyyo immido wolqqaama miishshata.
5 Ayssi giikko, Xoossaa eraa bolli denddiya qofaanne xube gidiya ubbabaa laaloos, qassi Kiristtoosawu azazettana mala qofa ubbaa xoonoos;
6 qassi intte polidi azazettiyogaa bessi simmin, azazettenna ay asanne qaxxayanawu nuuni giigi uttida.
7 Intte beettiyagaadan xeelleeta. Ooninne I Kiristtoosabaa gidiyogaa ammanettikko, zaarettidi hagaa qoppo: I Kiristtoosabaa gidiyogaadan, nuunikka abaa.
8 Inttena ammanuwan shugissanawu gidennan minttanawu Goday nuuyyo immido maatan taani bessiyagaappe aaruwan ceeqettiyakkokka yeellatikke.
9 Ayssi giikko, taani ta dabddaabbiyan inttena yashissanawu maliyaba milatanawu koyikke.
10 Ayssi giikko, issi issi asay hagaadan gees: “A dabddaabbeti minonne denttettiyageeta, shin nuuni A beꞌiyo* wode I laafa, qassi pattennabaa yootees.”
11 He asati nuuni dabddaabbiyan yootidobaa* yaa biyo wodekka oottanaagaa* erona.
12 Ayssi giikko, nuuni nuna banttana sabbiya asatu mala gaanawu koyokko. Shin banttana banttanan likkiyanne banttana banttanaara geeddarissiya he asati aynne akeekennaagee qoncce.
13 Gidoppe attin, nuuni Xoossay nuuyyo mooddido* moottaa zawaa giddon ceeqettoosippe attin, nuuyyo imettida zawaappe gaxan ceeqettokko; inttekka he moottan deꞌeeta.
14 Kiristtoosabaa mishiraachchuwa intteyyo koyro yootidaageeti nuna gidiyo gishshawu, Xoossay nuuyyo mooddidoban intte deꞌennabadan, nuuni inttekko biido wode I mooddidobaappe gaxi kiyibookko.
15 Nuuni nuuyyo imettida zawaappe gaxan, hara asi oottidoban ceeqettokko, shin intte ammanoy minni minni biyo wode, nuuni nu moottan oottidobaykka dicci dicci baanaagaa ammanettoos. Yaanikko, nuuni darobaa oottana;
16 hegaa gishshawu, haratu moottan oosettidaban nuuni ceeqettenna mala, intteppe zarddaꞌidi deꞌiya biittatunkka mishiraachchuwa yootana danddayoos.
17 “Shin ceeqettiya asi Yihoowan ceeqetto.”
18 Ayssi giikko, Yihooway an ufayttiyo asi I xoqqu oottiyogaappe attin, bana sabbiyagaa gidenna.
Footnotes
^ Mise, “I beettiyo.”
^ Mise, “haasayan hanidobaa.”
^ Mise, “oottiyoban hananaagaa.”
^ Woykko “likkidi gishido.”
