Qoronttoosa Asaassi Xaafettida Naaꞌꞌanttoogaa 11:1-33
11 Taani wozani baynna asa milatikkokka intte tana danddayiyakko ixxikke. Shin intte tana danddayideta!
2 Xoossay qoppiyogaadan* taani intteyyo wozanappe qoppays; ayssi giikko, taani inttena issi azinawu, Kiristtoosawu giigida geeshsha* geelaꞌodan ayyo immaas.
3 Shin shooshshay Hewaano cimmidoogaadaaninne balettidoogaadan, intte Kiristtoosayyo bessiyagaadan wozanappe A kaallennaadaaninne geeshsha deꞌo deꞌennaadan, oonakko intte qofaa mooridi inttena wora zaarenna mala yayyays.
4 Ayssi giikko, issi asi inttekko biidi, Yesuusabaa nuuni yootidobaappe harabaa intteyyo yootikko, woy intte ekkido ayyaanaappe hara ayyaanaa ekkidi biikko, woy intte ammanido mishiraachchuwappe haraa intteyyo yootikko, intte abaa danddayeeta.
5 Ayssi giikko, leqqoosona giyo, kiitettida intte asatuppe taani laafiyogaa bessiyabi aybinne baawa gaada qoppays.
6 Shin taani loytta haasayennaba gidikkonne, taayyo eray deꞌees; qassi hegaa ubba ogiyaninne ubbaban intteyyo bessida.
7 Taani intteppe aybanne ekkennan, ufayttaydda Xoossaa mishiraachchuwa intteyyo yootaas; yaatin, intte bonchchettana mala taani ziqqi giido gishshawu, nagaraa oottidanaa?
8 Taani intteyyo haggaazanawu taayyo koshshiyabaa* hara galchchatuppe ekkada etawu pacissaas.*
9 Taani inttenaara deꞌaydda tawu koshshiyaban metootido wode, Maqidooniyappe biida ishati taayyo koshshiyabaa koridi immido gishshawu, ooyyonne tooho gidabeykke. Ee, taani intteyyo aybiininne tooho gidenna mala naagettaas, qassi naagettiyogaa aggikke.
10 Kiristtoosa tumay tanan deꞌido keenan, taani Akaayiyan ubbasan hegan ceeqettiyogaa aggikke.
11 Taani ayssi hegaadan oottidanaa? Inttena siiqenna gishshataassee? Taani inttena siiqiyogaa Xoossay erees.
12 Shin banttana nu mala kiitettidaageeta giidi ceeqettiya amarida asati deꞌoosona; hegaa gishshawu, ceeqettanawu etawu ayba gaasoynne* deꞌenna mala, taani oottaydda deꞌiyobaa oottiyogaa aggikke.
13 Ayssi giikko, he asati Kiristtoosi kiittidoogeeta milatanawu maliya, bantta oosuwan balettiya, banttana kiitettidaageeta giidi worddotiyageeta.
14 Qassi Seexaanay pooꞌuwa kiitanchcha milatanawu maliyogaa aggenna gishshawu, hegee malaalenna.
15 Hegaa gishshawu, ayyo oottiyageetikka xillotettawu oottiyaba milatanawu malikko, hegee malaalenna. Shin wurssettan etayyo eta oosuwadan hanana.
16 Taani haranttuwakka yootays: Tana wozani baynna asadan xeelloppite. Shin intte tana hegaadan xeellikkokka, wozani baynna asa danddayiyogaadan tana danddayite; yaatikko, taanikka guuttaa ceeqettana.
17 Taani haꞌꞌi haasayiyogee Godaagaa mala gidenna, shin banan ammanettiyanne ceeqettiya, wozani baynna asaagaa mala.
18 Daroti ashoy koyiyogaadan* ceeqettiyo gishshawu, taanikka ceeqettana.
19 Intte keehi “wozannaama” gidiyo gishshawu, wozani baynnaageeta danddayiyogee inttena ufayssees.
20 Ee tuma, inttena aylledan gamiya,* intte aquwanne intteyyo deꞌiyabaa ekkirggiya, intte liiphiya kiyiyanne intte qinxxalliya baqqiya oonanne danddayeeta.
21 Hagee nuna yeellayiyaba; ayssi giikko, nuuni yayyidi oottidoba milatana danddayees.
Shin ooninne xalidi aybakko oottikko—taani wozani baynna asadan haasayays—taanikka hegaadan xalana danddayays.
22 Eti Ibraawee? Taanikka Ibraawe. Eti Israaꞌeela asee? Taanikka Israaꞌeela asa. Eti Abrahaama zerettee? Taanikka A zeretta.
23 Eti Kiristtoosawu haggaaziyageetee? Gooyiya asadan gays, taani ooppenne leqqays: taani darobaa oottaas, darotoo qashettaas, asay tana darotoo shociisinne darotoo woriichchi ashshiis.
24 Ayhudati 40wu issuwa ashshidi ichchashutoo tana shocidosona,
25 asay tana heezzutoo bikilan shociis, issitoo shuchchan caddiis, heezzutoo markkabiya daafaappe attaas, issi gallassaanne issi qammaa abban takkaas;
26 darotoo manddaraas; shaafati, bonqqiyageeti, ta asatinne hara biittaa asati tana hirggissidosona; kataman, bazzuwan, abbaaninne worddo ishatu giddon hirggaas;
27 minnada oottaasinne daafuraas, daro qammi xiskkennan aqaas, namisettaasinne saamettaas, tawu darotoo miyobi xayiis, tana meegiisinne taani kallottaas.*
28 Hegeetu ubbaa bolli, galchchatu ubbaabay tana ubba galla hirggissees.
29 Issi asi shuggiyo wode, taani shuggikkinaa? Issi asi xubettiyo wode, taani yiillotikkinaa?
30 Ceeqettana bessikko, taani shugo gidiyogaa bessiyabatun ceeqettana.
31 Godaa Yesuusa Xoossaynne Aaway, merinawu sabettana bessiyagee, taani yootiyobay worddo gidennaagaa erees.
32 Kawuwa Aretaasa gishshaa Damasqqo katamaa haariyagee tana oyqqanawu he katamaa naagissiis,
33 shin ishati katamaa gimbbiya maskkootiyara keeshiyan tana duge wottin, A kushiyappe kessa ekkaas.
Footnotes
^ Mise, “Xoossaa yeemuwan.”
^ Woykko “tilla.”
^ Woykko “haggaazanawu maaduwa.”
^ Mise, “etappe bonqqaas.”
^ Woykko “milatissiyobi aybinne.”
^ Hegeekka, asaagaadan.
^ Woykko “naaqqiya.”
^ Woykko “maayiyobaa xayaas.”
