Qoronttoosa Asaassi Xaafettida Naaꞌꞌanttoogaa 12:1-21
12 Taani ceeqettana koshshees; hegee goꞌꞌennaba gidikkonne, Goday tana bessido ajjuutaabaanne I tawu qonccissidobata yootana.
2 Issi bitanee ba asatettaanakko ba asatettaana gidennaakko taani erikke; Xoossay erees; shin 14 layttappe kase, Goday heezzantto saluwa efiido, Kiristtoosa kaalliya he bitaniya erays.
3 Ee, he bitaniya erays, asatettaanakko asatettaana gidennaakko taani erikke; Xoossay erees;
4 Goday A gannatiya efiis, qassi I asi yootana koshshenna, ee, ooninne haasayana bessenna qaalata siyiis.
5 Taani he bitaniyaban ceeqettays; taani ta laafatettaanappe attin, taban ceeqettikke.
6 Taani tumaa yootiyo gishshawu, ceeqettanawu koyiyakkokka, wozani baynna asadan hanikke. Shin ooninne taani oottin beꞌiyogaappe woy taani haasayin siyiyogaappe aaruwan tabaa qoppenna mala ceeqettikke;
7 taani malaaliya ajjuutata beꞌidoogaa xalaalan ooninne hegaadan qoppana koshshenna.
Taani otorettennaadan diggiya agunttay ta ashuwan deꞌees; he agunttay taani otorettennaadan diggiya, tana ubbatoo baqqiya* Seexaanaa kiitanchchaa.
8 Hegee taappe kichchana mala, taani heezzutoo Godaa woossaas.
9 Shin I taayyo, “Neeni mino gidennaagee ta wolqqaa gitatettaa qonccissiyo gishshawu, laggetiyabi baynna ta kehatettay neeyyo gidana” yaagiis. Hegaa gishshawu, Kiristtoosa wolqqay ta bolli dunkkaanedan deꞌana mala, taani mino gidennaagaappe denddidaagan ufayttaydda ceeqettana.
10 Hegaa gishshawu, taani Kiristtoosa gaasuwan mino gidennaagee, qassi cashshay, metoy, naaqoynne waayee gakkiyogee tana ufayssees. Ayssi giikko, taani mino gidenna wode, tawu wolqqay imettees.
11 Taani wozani baynna asa mala gidaas. Taani oottido loꞌꞌobaa intte yootibeenna gishshawu, taani hegaadan hananaadan oottidaageeti inttena. Intte tana pattenna asadan xeellikkokka, leqqoosona giyo intte kiitettidaageetuppe taani laafiyogaa bessiyabi aybinne baawa.
12 Taani intte giddon keehi genccidoogee, qassi malaatatanne malaaliya gitabata oottidoogee taani kiitettidaagaa gidiyogaa bessees.
13 Taani intteyyo tooho gidabeennagaa xalaalan intte hara galchchatuppe dummateeta. Yaatada mooridanaa? Yaanikko, hegawu tawu atto giite.
14 Taani inttekko baanawu giigettishin hagee tawu heezzantto, qassi taani intteyyo tooho gidikke. Ayssi giikko, taani inttena maaddanawu koyaysippe attin, intteyyo deꞌiyabaa koyikke, qassi naatuyyo koshshiyabaa minjjana bessiyageeti aawaanne aayyiyoppe attin, naati etawu minjjana bessenna.
15 Taani ta shemppuwakka ashshennan, taayyo deꞌiya ubbabaa intteyyo* immanawu ufayttays. Taani inttena keehi siiqays; yaatin taani siiqidoogaa keenaa intte tana siiqana bessennee?
16 Shin taani intteyyo tooho gidabeykke. Gidoppe attin, taani inttena “cimmidoogaa,” qassi “qapha oyqqidoogaa” yooteeta.
17 Taani inttekko kiittido asatun inttena balettada goꞌettidanaayye?
18 Tiitu inttekko baanaadan taani ayyo mintta yootaas, qassi issi ishaakka aara kiittaas. Tiitu inttena balettidi goꞌettideeyye? Nuuni issuwa gidiyogaa bessibookkooyye? Nuuni oottidobay issi mala gidenneeyye?
19 Hagaa intte mootuwa zaaranawu nuuni yootidoba giidi qoppeetii? Nuuni Kiristtoosa kaalliyageeta gidiyo gishshawu Xoossaa sinttan tumaa yootoos. Shin nuuni siiqiyogeetoo, nuuni ubbabaa inttena minttettanawu oottoos.
20 Ayssi giikko, taani yaa gakkiyo wode intte taani koyiyogaadan hanennan, taanikka intte koyiyogaadan hanennan agganeeshsha, ubbakka ooshshay, qanaatee, hanqqoy, palamay, tooshee, ziggirssay, otoroynne karssikarssay deꞌaneeshsha gaada yayyays.
21 Taani yaa biyo wode, Xoossay tana intte sinttan yeellayennan waayi aggana, qassi kase nagaraa oottida daroti zilꞌꞌettidi laamettibeenna gishshawu taani azzanana koshshennan aggenna. Eti sheneyiyabaa, pokkiya tuna nagaraanne* yeellaa xayidi oottiyogaara* gayttidaagan bantta qofaa laammibookkona.
Footnotes
^ Woykko “shociya.”
^ Woykko “intte shemppuwawu.”
^ Giriikettuwan, porniya.
^ Giriikettuwan, aselgiya.
