Qoronttoosa Asaassi Xaafettida Naaꞌꞌanttoogaa 3:1-18
3 Nuuni oonakko zaarettidi intteyyo qonccissana koshshii? Woykko hara asatuugaadan, nuuni intteyyo woy intte nuuyyo, nubaa qonccissiya dabddaabbiya xaafana koshshii?
2 Asay ubbay eriyonne nabbabiyo, nu wozanan xaafettida nu dabddaabbee inttena.
3 Ayssi giikko, Xoossawu haggaaziya nuuni xaafido Kiristtoosa dabddaabbee inttena gidiyogee qoncce; intte merinawu deꞌiya Xoossaa ayyaanaanappe attin, qalamiyan xaafettibeekketa, qassi asho shuchchaa, wozanaa bollippe attin, shuchchaa bolli xaafettibeekketa.
4 Nuuni Xoossaa sinttan Kiristtoosa gaasuwan hegaa ammanettoos.
5 Ha oosuwa oottanaadan Xoossay nuna maaddeesippe attin, nuuni nu huuphen oottana danddayoos gookko;
6 nuna ooratta maachchawu haggaazana danddayiyageeta oottidaagee A; nuuni higgiyawu haggaaziyageeta gidokko, shin ayyaanawu haggaaziyageeta; ayssi giikko, higgee worees, shin ayyaanay paxa wottees.
7 Shuchchan xaafettida woriya higgee wolqqaama pooꞌuwan imettiis; attana he wolqqaama pooꞌuwappe denddidaagan Israaꞌeela naati Muuse somꞌꞌuwa xeellana danddayibeennaba gidikko,
8 ayyaanay hegaappe keehi wolqqaama pooꞌuwan waani imettennee?
9 Qanggettanaadan oottiya higgee bonchchettidaagaa gidikko, xillo kessiya oosuwa bonchchoy hegaappe aadhdhees!
10 Issi wode bonchchettidaagaa bonchchoy appe aadhdhiya bonchchuwappe denddidaagan qaarettiis.
11 Ayssi giikko, attanaagee bonchchuwan imettidaba gidikko, ooratta maachchaa bonchchoy ay keena gitee!
12 Nuuni hegaa ammanettiyo gishshawu, yayyennan haasayoos,
13 qassi Israaꞌeela naati attanabaa wurssettaa tishshi ootti xeellenna mala ba somꞌꞌuwa kammida Muuseegaadan nuuni oottokko.
14 Shin eti akeekana danddayibookkona. Ayssi giikko, kammidabay Kiristtoosi maaddennan denddenna gishshawu, galꞌꞌa maachchay nabbabettiyo wode, hanno gakkanawu eta kahay kammidaba mala.
15 Muusee xaafidobay nabbabettiyo wode awudenne, eta wozanay hanno gakkanawu kametti uttidaba mala.
16 Shin issi asi Yihoowakko simmiyo wode, he kammidabay denddees.
17 Yihooway Ayyaana, qassi Yihoowa ayyaanay deꞌiyosan, asay laꞌa.
18 Nu somꞌꞌuwa kammidabaa denttida nuuni ubbay Yihoowa bonchchuwa phoolissiya herega mala; Ayyaanay, Yihooway* koyiyogaadan Xoossaa bonchchuwa gujji gujji* phoolissidi Xoossaa milatanawu nuuni laamettiiddi deꞌoos.
