Qoronttoosa Asaassi Xaafettida Naaꞌꞌanttoogaa 4:1-18
4 Hegaa gishshawu, Xoossay nuuyyo qarettidi* immido haggaazaappe denddidaagan, nuuni yibbaatokko.*
2 Gidoppe attin, nuuni yeellayiya geemabaa aggida, balettokko woy Xoossaa qaalaara aybanne walakkokko; shin asa ubbaa kahay akeekana mala, tumaa qonccissiyogan Xoossaa sinttan suurebaa oottiyogaa bessoos.
3 Nuuni yootiyo mishiraachchoy kamettikko, xayanaageetuyyo kamettees;
4 ha saꞌaa asaa* xoossay ammanenna he asatu kahaa dammissiis;* I yaatiyogee Xoossaa milatiya Kiristtoosabaa yootiyo gita mishiraachchuwa pooꞌoy eta bolli pooꞌennaadaana.
5 Ayssi giikko, nuuni Yesuus Kiristtoosi Godaa gidiyogaa, qassi nuuni Yesuusayyo giidi inttessi aylle gidiyogaa yootoosippe attin, nubaa yootokko.
6 Ayssi giikko, “Xumaappe pooꞌoy pooꞌo” giidaagee Xoossaa, qassi Kiristtoosa somꞌꞌuwan phooliya, Xoossaabaa eriyo he gita eraa pooꞌuwa I nu wozanan pooꞌissiis.
7 Gidoppe attin, nuuni buquraa yeggiyo oto mala gidikkokka, nuuyyo ha dumma oosoy deꞌees; hegaappe denddidaagan, asaagaappe aaro wolqqay Xoossaabappe attin, nubaa gidennaagee erettees.
8 Nuna ubba ginan unꞌꞌikkokka, qaaxxennaadan diggenna; nuuyyo kirqqi giikkokka, purddee deꞌees;*
9 nuuni naaqettikkokka, Xoossay nuna aggiigibeenna; nuna shocidi olikkokka, xayibookko.
10 Yesuusa deꞌuwa nu deꞌoy bessana mala, Yesuusaagaadan hayqqana giidi hirggiyobay nuna ubba wode gakkishin genccida.
11 Ayssi giikko, haꞌꞌi deꞌiya nuuni Yesuusa kaalliyo gishshawu hayqoy ubbatoo nuuyyo baazzan gayttees; hegaappe denddidaagan, hayqqiya nu bollaykka Yesuusa deꞌuwa bessana.
12 Hegaa gishshawu, hayquwa hirggay nuussa, shin deꞌoy inttessa.
13 Xaafettidabay hagaadan gees: “Taani ammanaas, hegaa gishshawu yootaas”; nuunikka hegaadan ammanoos, yaaniyo gishshawu yootoos;
14 ayssi giikko, Yesuusa hayquwappe denttidaagee nuunikka Yesuusaara deꞌanaadan denttidi, nuna inttenaara issippe akko efaanaagaa eroos.
15 Nuuni ha ubbaban inttessi giidi genccida; hegaappe denddidaagan, laggetiyabi baynna Xoossaa kehatettay yaa darana; daro asay Xoossaa sabbiyo wodenne galatiyo wode he kehatettay darees.
16 Hegaa gishshawu, nuuni yibbaatokko,* shin bolla baggaara nuuni hitti giikkokka, garssa baggaara ubba galla ooraxxoos.
17 Ayssi giikko, nuuni waayettiyo waayee guutta wodiyassanne kawushsha gidikkokka, nuuni yaa gujji gujji biya merinaa anjjuwa ekkanaadan oottees;
18 Hegaa gishshawu, nuuni awudekka beettennabaa xeelloosippe attin, beettiyabaa xeellokko. Ayssi giikko, beettiyabay haꞌꞌissawu deꞌiyaba, shin beettennabay merinawu deꞌiyaba.
Footnotes
^ Woykko “nuna maaridi.”
^ Woykko “aggiigokko.”
^ Woykko “ha wodiya.”
^ Mise, “qooqissiis.”
^ Woykko geella, “yibbaatidi attokko.”
^ Woykko “aggiigokko.”
