Qoronttoosa Asaassi Xaafettida Naaꞌꞌanttoogaa 5:1-21
5 Saꞌaa keettay, ha nu dunkkaanee laalettikko,* asi keexxibeenna merinaa keettaa Xoossay nuuyyo saluwan immanaagaa eroos.
2 Qassi saluwan nuuyyo giigidaagaa maayanawu* wozanappe koyiiddi, ha keettan* ooloos;
3 hegaa gishshawu, nuuni hegaa maayiyo wode, kallo deꞌokko.
4 Ha dunkkaaniyan deꞌiya nuuni hagaa qaaranawu koyennaba gidikkokka, hankkuwa maayanawu koyiyo gishshawu, keehi hirggidi ooloos; hegaa maayiyo wode, hayqqiyagee deꞌuwan mitettana.
5 Ha deꞌuwawu nuna giigissidaagee, yaanabawu malaata* oottidi nuussi ayyaanaa immida Xoossaa.
6 Qassi nu keettay ha bollan deꞌiyo wode nuuni Godaara deꞌennaagaa ubba wode keehi ammanettoosinne eroos,
7 qassi nuuni ammaniyogaadan deꞌoosippe attin, beꞌiyogaadan deꞌenna gishshawu hegaa eroos.
8 Shin nuuni ha bollan deꞌiyogaappe Godaara deꞌanawu koyoos, qassi deꞌanaagaa keehi ammanettoos.
9 Hegaa gishshawu, nuuni aara deꞌin aggin, A ufayssanawu awudekka baaxetana koshshees.
10 Ayssi giikko, nuuni ubbay ay mala asakko Kiristtoosi pirddiyosaa sinttan qonccana; hegee asay ubbay ha bollan deꞌiyo wode oottidobay loꞌꞌo gidin iita* gidin, ba oosuwadan pirddaa ekkanaadaana.
11 Hegaa gishshawu, nuuni Godawu yayyiyogee aybakko eriyo gishshawu, awudekka asaayyo ammanttiyabaa yootoos, shin Xoossay nuuni ay mala asakko erees. Gidoppe attin, nuuni ay mala asakko intte kahaykka eriyogaa ammanettoos.
12 Nunan ceeqettanaadan nuuni inttena minttettoosippe attin, nuuni oonakko intteyyo zaarettidi qonccissiiddi deꞌokko; hegaappe denddidaagan, wozanan deꞌiyaban gidennan, beettiyaban ceeqettiyageetuyyo intte zaarana danddayeeta.
13 Nuuni kahay sarenna asadan aybakko oottidaba gidikko, hegaa Xoossawu oottida; qassi nuuni hegaa saro kahan oottiyakko, hegee inttena maaddana.
14 Kiristtoosa siiqoy nuna giddees; ayssi giikko, nuuni hagaa akeekida: asay ubbay hayqqido gishshawu, issi asi ubbaayyo hayqqiis.
15 Qassi paxa deꞌiyageeti banttawu hayqqidaagawunne Xoossay denttidoogawu deꞌanaappe attin, banttawu deꞌiyogaa aggana mala, I ubbaayyo hayqqiis.
16 Hegaa gishshawu, ay asanne hagaappe sinttanawu asaagaadan* xeellokko. Nuuni kase Kiristtoosa asaagaadan xeellidaba gidikkokka, haꞌꞌi hegaadan xeellokko.
17 Hegaa gishshawu, ooninne Kiristtoosaara issuwa gidikko, I ooratta mereta; Xoossay galꞌꞌabata diggirggiis; beꞌite! I oorattabata medhdhiis.
18 Shin Kiristtoosan nuuni aara sigettanaadan oottidanne aara sigettanaadan asaa maaddiyo haggaazaa nuuyyo immida Xoossay ha ubbabaa oottiis;
19 he haggaazaappe denddidaagan, Xoossay asaa eta nagaran oychchennan aggidi, eti banaara Kiristtoosa baggaara sigettanaadan oottiiddi deꞌees, qassi asay Xoossaara sigettana danddayiyogaa etayyo yootiyo oosuwa nuuyyo immiis.
20 Hegaa gishshawu, Xoossay asaa nu baggaara xeegiyobadan, nuuni Kiristtoosa gishshaa kiitettiyageeta.* Nuuni, “Xoossaara sigettite” yaagidi, Kiristtoosa gishshaa asaa woossoos.
21 Xoossay nagari baynnaagaa nuuyyo nagaraa yarshsho* oottiis; hegaappe denddidaagan, nuuni aani Xoossaa sinttan xillo gidana danddayoos.
Footnotes
^ Woykko “maashikko.”
^ Woykko “nuuni deꞌiyosaa maayanawu.”
^ Woykko “deꞌiyosan.”
^ Woykko “qawudo; yaanabawu waabe.”
^ Woykko “shaattiyaba.”
^ Mise, “ashuwadan.”
^ Woykko “ambbaasaddereta.” Haariya asa gishshaa kiitettiya sunttata.
^ Woykko “nagara.”
