Qoronttoosa Asaassi Xaafettida Naaꞌꞌanttoogaa 6:1-18
6 Nuuni Xoossaara issippe oottoos; qassi Xoossay laggetiyabi baynna kehatettaa inttessi kehidoogee hada attennaadan inttena zoroos.
2 Ayssi giikko, I, “Taani anjjiyo* wode nebaa siyaas, qassi taani ashshiyo gallassi nena maaddaas” yaagees. Hagee Xoossay anjjiyo dumma wode. Hagee Xoossay ashshiyo gallassa.
3 Ooninne xubettanaadan nuuni gaaso gidokko; hegaappe denddidaagan, nu haggaazan bali beettenna;
4 shin nuuni Xoossaayyo haggaaziyogaa ubbaban bessoos: daroban genccida, waayettida, tuggatida, metootida,
5 asay nuna shociis, qashettida, asay nu bolli kobaa kessiis, daafuridi oottida, issi issi qammi xiskkibookko, namisettida;
6 qassi geeshshatettan deꞌoos, Xoossaabaa tumaa eroos, danddayoos, kehoos, geeshsha ayyaanay kaalettiyogaadan deꞌoos, wozanappe siiqoos,
7 tumaa yootoos, Xoossaa wolqqan ammanettoos, xillotettaa ola miishshata ushachcha kushiyaninne* haddirssa kushiyan* oyqqoos,
8 asay nuna bonchchiisinne kawushshiis, boriisinne sabbiis. Asay nuna balettiya asadan xeellees, shin nuuni tumaa yootoos,
9 ooninne erenna asadan nuna xeellees, shin Xoossay nuna erees, hayqqiyabadan* xeellees, shin paxa deꞌoos, qaxxayettidabadan* xeellees, shin hayqqibookko,
10 kayyottiyabadan xeellees, shin awudekka ufayttoos, hiyyeesadan xeellees, shin darota dureyoos, aybinne baynna asadan xeellees, shin ubbabay nuuyyo deꞌees.
11 Qoronttoosan deꞌiya nu ishatoo, nuuni intteyyo qonccissidi yootida,* qassi nu wozanaa intteyyo aassidi dooyida.
12 Nuuni inttena siiqiyo siiquwawu sohuwa xunttibookko, shin intte nuna siiqiyo siiquwawu sohuwa xunttideta.
13 Taani ta naatuyyo yootiyabadan intteyyo yootays; inttekka nuuyyo nuugaadan oottite; intte wozanaa aassidi dooyite.*
14 Ammanennaageetuura waaxettoppite.* Ayssi giikko, xillotettay iitatettaara* laggetiyobi aybi deꞌii? Woy pooꞌuwa xumaara gattiyabi aybi deꞌii?
15 Qassi Kiristtoosi Belihooraara* maayettana danddayii? Woy ammaniyagee* ammanennaagaa milatiyobi aybi deꞌii?
16 Qassi eeqa misileti Xoossaa garuwan deꞌana danddayiyonaa? Ayssi giikko, nuuni merinawu deꞌiya Xoossaa garo; Xoossay giidobay hegaa bessees: “Taani eta giddon deꞌananne eta giddon hemettana, qassi taani eta Xoossaa gidana, qassi eti ta asaa gidana.”
17 “Yihooway hagaadan gees: ‘Hegaa gishshawu, eta giddoppe kiyitenne shaahettite, yaatidi geeshsha gidennabaa bochchoppite’”; “‘qassi taani inttena mokka ekkana.’”
18 “A Wolqqawu Zawi Baynna Yihooway, ‘Qassi taani intteyyo aawa gidana, qassi intte taayyo attuma naatanne macca naata gidana’ yaagees.”
Footnotes
^ Woykko “ekkiyo.”
^ Geella olanawu.
^ Geella teqqanawu.
^ Woykko “hayqqana bessiyabadan.”
^ Woykko “seeridobadan.”
^ Woykko “intteyyo yootanawu doonaa dooyida.”
^ Woykko “inttekka aakkite.”
^ Woykko “ohettoppite.” Hegee bixe gidenna waattaa.
^ Mise, “higgiya menttuwara.”
^ Ibraawetto qaalaappe, birshshettay “Pattennaba.” Seexaanaa bessiyaba.
^ Woykko “ammanettiyagee.”
