Qoronttoosa Asaassi Xaafettida Naaꞌꞌanttoogaa 7:1-16
7 Hegaa gishshawu, taani siiqiyogeetoo, Xoossay hegaadan giido gishshawu, nuuni Xoossawu yayyiiddi polidi geeshsha gidanawu, ashuwanne ayyaanaa mooriya aybippekka geeyana koshshees.
2 Intte wozanaa nuussi dooyite. Nuuni oonanne naaqqibookko, nuuni oonanne bashshibookko, nuuni oonanne balettidi goꞌettibookko.
3 Taani hegaa giyoy inttena boranaassa gidenna. Ayssi giikko, taani kase giidoogaadan nuuni inttena keehi siiqiyo* gishshawu, inttenaara issippe hayqqananne deꞌana.
4 Taani intteyyo wozanappe yootays. Taani inttenan ceeqettays. Taani minettaas; taani waayettiyo wode ubban zawi baynnaagaa ufayttaas.
5 Nuuni Maqidooniya yiido wode, nu ashoy woppu gibeenna, shin ubba ginan waayettida, asay nuna keehi naaqqiis, qassi nu giddon hirggay deꞌees.
6 Shin Tiitu nunaara takkidoogan, waayettiyageeta minttettiya Xoossay nuna minttettiis;
7 qassi nuuni minettidoy I inttenan minettidoogaanappe attin, I yiidoogaa xalaalaana gidenna; I intte tana beꞌanawu laamotiyogaa, keehi azzaniyogaa, qassi tabay inttena qofissiyogaa* nuuyyo yootiis; hegee tana keehi ufayssiis.
8 Ayssi giikko, taani ta dabddaabbiyan inttena azzanttidaba gidiyakkokka, hegan zilꞌꞌettikke. Taani koyro zilꞌꞌettikkokka (hegee inttena guutta wode xallawu azzanttikkokka, yaatidoogaa erada),
9 haꞌꞌi ufayttays; intte azzanidoogee zilꞌꞌettidi laamettanaadan oottido gishshawu ufayttaysippe attin, intte azzanidoogan ufayttikke. Ayssi giikko, Xoossaa ufayssiya ogiyan intte azzanideta; nuuni yootidoban intte qohettibeennay hegaassa.
10 Ayssi giikko, asay ba nagaran zilꞌꞌetti laamettidi attanaadan oottiya, Xoossaa ufayssiya azzanoy nuna awudekka maaddees; shin ha saꞌaa asaadan azzaniyogee hayqqanaadan oottees.
11 Xoossaa ufayssiya ogiyan intte azzanidoogee qoncce; hegaappe denddidaagan intte keehi baaxetideta, inttena geeshshideta, he mooruwan yiillotideta, Xoossaayyo yayyideta, zilꞌꞌettidi laamettanawu koyideta, Xoossaayyo wozanappe oottideta, qassi mooruwa suurissideta! He yohuwa maarayanawu* oottana bessiya ubbabaa oottideta.
12 Taani intteyyo xaafidaba gidikkokka, nagaraa oottidaagawu, woy he nagaran qohettidaagawu hegaa xaafabeykke, shin nuuni yootiyobaa siyanawu koyiyogaa Xoossaa sinttan intte tumuppe bessanaakkonne eranawu xaafaas.
13 Nuuni minettidoy hegaassa.
Shin hegaappekka aaruwan, intte ubbay Tiitu wozanaa* gazddissidoogee A ufayssido gishshawu, nuuni keehi ufayttida.
14 Ayssi giikko, taani inttenan ceeqettada ayyo yootikkokka, yeellatabeykke; shin nuuni intteyyo yootidobay ubbay tuma gidiyogaadan, nuuni ceeqettidi Tiitussi yootidobaykka tumattiis.
15 Qassi intte ubbay wozanappe bonchchidi A waati mokki ekkidaakko, intte azazettiyogaa I hassayidi inttena kaseppe aaruwan wozanappe siiqees.
16 Taani ubbaban inttenan keehi ammanettiyo gishshawu ufayttays.
Footnotes
^ Woykko “intte nu wozanan deꞌiyo.”
^ Mise, “yeemoyiyogaa.”
^ Woykko “yohuwappe geeyanawu.”
^ Mise, “ayyaanaa.”
