Qoronttoosa Asaassi Xaafettida Naaꞌꞌanttoogaa 8:1-24
8 Nu ishatoo, Maqidooniyan deꞌiya galchchatuyyo Xoossay kehido laggetiyabi baynna kehatettaabaa intte eranaadan koyoos.
2 Eti manqqo gidikkokka, waayee eta keehi paaccishin keehi ufayttiiddi immidosona; hegee eti daroppe* keha gidiyogaa bessiis.
3 Eti immana danddayiyo ubbabaa, haray atto danddayiyogaappekka aattidi immidosona; hegawu taani markka;
4 ayssi giikko, eti haratuura geeshshata maaddana* mala, kehatettan immanawu danddayanaadan banttawu qoppidi zaari zaaridi nuna woossidosona.
5 Qassi Xoossay koyiyogaadan eti koyro Godaayyonne nuuyyo haggaaziyogan, nuuni qoppidoogaappekka aarobaa oottidosona.
6 Hegaa gishshawu, Tiitu inttena ha oosuwa doomissidoogaadan, intte kehatettan immiyo imotaa shiishuwa polanaadankka nuuni A minttettida.
7 Shin ammanuwan, haasayan, eran, ubbabaa minnidi oottiyogaaninne nuuni inttena siiqiyogaadan harata siiqiyogan intte ubbaban leqqiyogaadan, kehatettan immiyo ha imuwankka leqqanawu baaxetiyogaa aggoppite.
8 Harati wozanappe minnidi oottiyogaa intte akeekanaadaaninne intte harata tumuppe siiqiyogaa paaccanawu taani hagaa yootaysippe attin, inttena azazanaassa gidenna.
9 Ayssi giikko, nu Goday Yesuus Kiristtoosi dure gidikkokka, intte gishshawu hiyyeesidi intteyyo kehido laggetiyabi baynna kehatettaa ereeta; hegaa gishshawu, intte A hiyyeesatettan duretanawu danddayeeta.
10 Qassi taani intteyyo issibaa yootays: Issi layttappe kase, intte ha oosuwa doommiyogaa xalla gidennan, oottanawu koyiyogaakka bessido gishshawu, hagee inttena maaddees.
11 Hegaa gishshawu, intte doommidobaa polite; yaatikko, intte danddayiyogaa keenaa immiyogee, doommido wodiyagaadan polanawukka yeemottiyogaa bessees.
12 Issi asi danddayennabaa gidennan, danddayiyobaa immanaadan Xoossay koyiyo gishshawu, wozanappe immiyogee Xoossaa keehi ufayssees.
13 Ayssi giikko, taani toohuwa inttessi deexettada haratussi kawushshanawu koyikke;
14 Shin laggeyanawu, haꞌꞌi intteyyo palahidabay eta pacaa kunttanaadaana; yaatikko, laggeyana mala, etayyo palahidabay intte pacaa kunttana danddayees.
15 “Daruwa shiishshidaagawu keehi daribeenna, qassi guuttaa shiishshidaagawu keehi guuxxibeenna” geetettidi xaafettidaagaadan, lagge gidana.
16 Tiitu inttessi nuugaadan qoppiyo gishshawu Xoossaa galatoos;
17 ayssi giikko, I nuuni yootidobaa siyiis, shin I wozanappe koyiyo gishshawu, bawu qoppidi inttekko bees.
18 Qassi galchchati ubbay mishiraachchuwara gayttidaagan nashshiyo ishaakka aara issippe kiittoos.
19 Hegaa bollikka, kehatettan immidobaara gayttidaagan nuuni harata maaddanawu wozanappe koyiyogaa bessanawunne Godaa bonchchissanawu haggaaziyo wode nunaara yuuyanaadan galchchati ubbay A sunttidosona.
20 Hegaa gishshawu, ha shiishshido imotaara gayttidaagan nuuni haggaaziyo haggaazan nuna ooninne borenna.
21 Ayssi giikko, nuuni ‘Asaa sinttankka ubbabaa geeshsha wozanan oottanawu baaxetoosippe attin, Yihoowa sintta xallaana gidenna.’
22 Qassi nuuni darotoo paaccidi I daroban salettennaagaa beꞌikkokka, I inttenan keehi ammanettiyo gishshawu ubbakka aaruwan salettenna nu ishaakka nuuni etaara kiittoos.
23 Shin Tiitubaa oychchiyobi deꞌikko, I inttena maaddanawu tanaara issippe oottiya ta ooso miire;* woy nu ishatubaa oychchiyobi deꞌikko, eti galchchati kiittiyogeeta, qassi Kiristtoosa bonchchissiyageeta.
24 Hegaa gishshawu, intte wozanappe siiqiyogaa eta bessite, qassi nuuni inttenan ceeqettiyoy aybissakkokka galchchatuyyo bessite.
