Efisoona Asaassi 1:1-23
1 Xoossaa shene gidiyo gishshawu Kiristtoos Yesuusi kiittido taani Phawuloosi Kiristtoos Yesuusa kaalliya, Efisoonan deꞌiya ammanettida geeshshatuyyo hagaa kiittays:
2 Laggetiyabi baynna Xoossaa nu Aawaa kehatettaynne sarotettay, qassi Godaa Yesuus Kiristtoosaagee intteyyo gido.
3 Nu Godaa Yesuus Kiristtoosa Xoossawunne Aawawu sabay gido; ayssi giikko, nuuni Kiristtoosa kaalliyo gishshawu saluwan ayyaana anjjo ubban I nuna anjjiis.
4 Nuuni A siiqiyo gishshawu A sinttan geeshshanne ufuri* baynnaageeta gidana mala, nuuni Kiristtoosaara issuwa gidanaadan saꞌaa doomettaappe kase I nuna dooriis.
5 Ayssi giikko, I bana ufayssidaagaadaaninne ba sheniyadan Kiristtoos Yesuusan nuna ba naata oottidi ekkanawu maaci uttiis;
6 Xoossay ba siiqiyo Naꞌan laggetiyabi baynna gita kehatettaa nuuyyo kehido gishshawu asay A sabbana mala hegaa oottiis.
7 A Naꞌaa suuttan nuuni wozettidanne nu nagaray atto geetettin laꞌa kiyida; ee, laggetiyabi baynna Xoossaa kehatettay keehi gita.
8 I hayyonne akeeka ubban laggetiyabi baynna A kehatettay nuuyyo korettanaadan oottiis;
9 I ba sheniyabaa gentti wottido yohuwa nuna erissiyogan hegaa oottiis. Qassi he genttidobay A ufayssiyabanne I halchchi uttidoba.
10 Saluwan deꞌiyabatanne saꞌan deꞌiyabata, ubbabaa Kiristtoosan issippe shiishshanawu, I giido wodee wurin aysuwa* essiyogeekka he genttido yoho. Ee, ubbabaa issippe shiishshiyoy aana;
11 qassi nuuni aara issippe laataa ekkiyageeta gidanaadan Xoossay nuna dooriis; hegaappe denddidaagan, ba sheniyadan maacidi ubbabaa hegaadan oottiyagee I halchchidoogaadan nuna doori uttiis;
12 hegaa gishshawu, Kiristtoosan ammanettida koyroogeetun nunan Xoossay sabettananne bonchchettana bessees.
13 Shin inttekka tumaa, intte attanaagaa yootiyo mishiraachchuwa siyidi Kiristtoosan ammanettideta. Intte ammani simmin, Xoossay immana giido geeshsha ayyaanan A baggaara intte bolli maatafaa wottiis;
14 he ayyaanay nu laatawu qawudo* mala. Xoossay ba asaa* wozidi laꞌa kessanawu hegaa oottiis; hegee I keehi sabettanaadaaninne bonchchettanaadan oottana.
15 Godaa Yesuusa intte ammaniyo ammanuwabaanne geeshshatu ubbaara gayttidaagan qoncciya intte siiquwabaakka taani siyaas; hegaa gishshawu, taani hegaa siyada,
16 intte gaasuwan Xoossaa galatiyogaa mule aggabeykke. Intteyyo Xoossaa woossiyogaakka aggabeykke;
17 hegeekka, nu Godaa Yesuus Kiristtoosa Xoossay, bonchcho ubbay abaa gidido Aaway intte hayyo eranaadaaninne I qonccissiyobaa akeekanaadan ayyaanaa immanaadaana; yaatin, intte A geeshshi erana.
18 Xoossay intte wozanay beꞌanaadan dooyiis; hegaappe denddidaagan, I inttena ay mala deꞌuwawu* xeegidaakko, qassi I geeshshatuyyo laatadan immana anjjoy ay keena malaaliyabakko intte erana,
19 qassi ammaniya nuuyyo I immiyo wolqqay ay keena gitakkokka intte erana. He gita wolqqay I oottido issibankka qoncciis;
20 hegee I Kiristtoosa hayquwappe denttidi saluwan baappe ushachcha baggan utissido wode oottidobaa;
21 I ha wodiya xalaalan gidennan, sinttappe yaana wodiyankka kawotetta ubbaappe, maata ubbaappe, wolqqa ubbaappe, godatetta ubbaappenne sunttettida suntta ubbaappe aadhdhees.
22 Xoossay ubbabay A maatan* haarettanaadan oottiis, qassi galchchan A ubbabaa kaalettiyagaa* oottiis;
23 galchchay A bollaa, qassi I koshshiya ubbabaa galchchawu immees.
Footnotes
^ Woykko “wotoy.”
^ Hegeekka, oosettiyabatu aysuwa.
^ Woykko “malaata; yaanabawu waabe.”
^ Mise, “xeeꞌuwa.”
^ Mise, “hidootawu.”
^ Mise, “tohuwan.”
^ Mise, “ubbabawu huuphe.”