Efisoona Asaassi 2:1-22
2 Hegaa bolli, intte intte mooruwappenne intte nagaraappe denddidaagan hayqqidaba gidikkonne, Xoossay intteyyo deꞌuwa immiis;
2 intte issi wode ha saꞌaa asaadan deꞌidetanne ha saꞌaa asaa haariyagee koyiyobaa oottideta. I azazettenna asaa denttettiyanne carkkuwadan ubbasaa gakkiya ayyaanaa haarees.
3 Ee, nuunikka ubbay he asatuugaadan nuuni qoppiyobaanne nu ashoy koyiyobaa oottiiddi, nu nagaranchcha ashuwa amuwadan deꞌida; nuunikka haratudan, yelettiiddikka Xoossaa hanqqoy bessiyogeeta.
4 Shin Xoossaa maarotay gita, qassi I nuna siiqido gita siiquwappe denddidaagan,
5 nagaran nuuni hayqqi uttidaashinkka (I laggetiyabi baynna kehatettan inttena ashshiis), I nuuyyo deꞌuwa immidi Kiristtoosaara issuwa oottiis.
6 Hegaa bolli, I nuna Kiristtoos Yesuusaara denttiisinne aara issuwa oottidi saluwan aara utissiis;
7 hegaa gishshawu, Xoossay Kiristtoos Yesuusaara issuwa gidiya nuuyyo sinttappe yaana wodiyan loꞌꞌobaa ubbaa oottiyo* wode, I laggetiyabi baynna ba kehatettay ay keena darokko bessana.
8 Xoossay ammaniya inttena he laggetiyabi baynna kehatettan ashshiis, qassi hegee intte oosuwappe denddidaagan giigidaba gidenna, shin Xoossaa imota.
9 Intte oosoy hegawu gaaso gidenna; hegaa gishshawu, ceeqettanawu ooyyonne gaasoy baawa.
10 Nuuni Xoossaa kushiya oosota,* qassi nuuni Kiristtoos Yesuusa kaalliyo gishshawu, nuuni oottanaadan Xoossay maaci uttido loꞌꞌo oosota oottanawu merettida.
11 Hegaa gishshawu, intte Ayhuda gidennaagaanne asay qaxxaridoogeeti inttena qaxxarettibeenna asata giyogaa hassayeeta.
12 He wode intte Kiristtoosa erennan, Israaꞌeela asaappe shaahettidi, Xoossay anjjana giido maachchawu imatta gididi deꞌideta; intte hidooti baynnaaninne Xoossaa erennan saꞌaa asaa giddon deꞌideta.
13 Shin haꞌꞌi intte Kiristtoos Yesuusa kaalliyo gishshawu, kase Xoossaappe haakkidaageeti Kiristtoosa suuttan Xoossaakko shiiqideta.
14 Ayssi giikko, nu sarotettay A; I he naaꞌꞌu citata issuwa oottiis, qassi he citatu giddon dirssadan eqqida godaa laaliis.
15 I bana kaalliya he naaꞌꞌu citata issi cita oottanawunne eta sigettanawu, ba ashuwa yarshshidi, eti morkkettanaadan oottida azazoti deꞌiyo Higgiya diggirggiis;
16 I he naaꞌꞌu citati issi bolla gidana mala, mittan kaqettidi hayqqiyogan he citata Xoossaara sigettanawu hegaa oottiis; ayssi giikko, I ba hayquwan he morkketettaa diggirggiis.
17 Qassi I yiidi, Xoossaappe haakkida intteyyokka, Xoossaa matan deꞌiyageetuyyokka sarotettaa mishiraachchuwa yootiis;
18 ayssi giikko, nuuni naaꞌꞌu citatikka, diggiyabi baynnan, aani Aawaakko issi ayyaanan shiiqana danddayoos.
19 Hegaa gishshawu, intte imattanne hara biittaa asa gidiyogee attiis, shin intte geeshshatu ubbaara issi biittaawanne Xoossaa keettaa asa,
20 hegaa bollikka, intte hiixettida shuchcha mala gidiya kiitettidaageetunne Xoossay erissidobaa yootiyageetu bolli keexettideta, qassi zooziyan hiixettida shuchchay Kiristtoos Yesuusa.
21 Kiristtoosaara issuwa gidida keettay kumettay, ba shaahotu ubbaara issippe ohettidi, Yihoowayyo geeshsha garo gidanawu dicciiddi deꞌees.
22 Intte Kiristtoosaara issuwa gidiyo gishshawu, inttena haratuura issippe I ayyaanan deꞌiyo keetta oottidi Xoossay keexxiiddi deꞌees.
