Efisoona Asaassi 3:1-21
3 Hegaa gishshawu, hara biittaa asawu intteyyonne Kiristtoos Yesuusayyo qashettida taani Phawuloosi,
2 laggetiyabi baynna Xoossaa kehatettan intte goꞌettanaadan maaddiyo aawatettay taayyo imettidoogaa intte siyidoogee qoncce;
3 ee, taani kase intteyyo qanttan xaafidoogaadan, Xoossay gentti wottidobaa taani eranaadan oottiis.
4 Hegaa gishshawu, Kiristtoosabay geemmi uttidaagaa taani akeekiyogaa intte hagaa nabbabiyo wode erana.
5 Ha geemmidabay A geeshshatuyyo, kiitettidaageetuyyonne Xoossay erissidobaa yootiyageetuyyo haꞌꞌi ayyaanan qonccidoogaadan kase yeletaayyo qonccibeenna;
6 he geemmidabay hagaa: Hara biittaa asay mishiraachchuwan Kiristtoos Yesuusan issuwa gididi nunaara laattana, nunaara issi cita gidananne imettana geetettida anjjuwa nunaara shaakkana.
7 Intte ha geemmidabaa akeekanaadan laggetiyabi baynna Xoossaa kehatettan inttena maaddiya asa gidaas; I tawu coo immido he imotan ba wolqqaa bessiis.
8 Geeshshatu ubbaappe guuxxiya taayyo laggetiyabi baynna ha kehatettay imettiis; hegaappe denddidaagan, akeekanawu danddayettenna Kiristtoosa anjjuwabaa mishiraachchuwa taani hara biittaa asawu yootana koshshees;
9 qassi ubbabaa medhdhida Xoossay daro wodiyawu genttidobaara gayttidaagan oottiiddi deꞌiyobaa taani asay akeekanaadan oottana koshshees.
10 Xoossay keehi daro ogetun bessido A hayyoy saluwan deꞌiya haariyageetuyyonne maataawatuyyo galchchaa baggaara erettana mala Xoossay hegaa oottiis.
11 Hegee Kiristtoosaara, nu Godaa Yesuusaara gayttidaban Xoossay merinaassi halchchido halchchuwara maayiyaba;
12 nuuni Kiristtoosa ammaniyo gishshawu, an yayyennan haasayananne ammanettidi yayyennan Xoossaa woossana danddayoos.
13 Hegaa gishshawu, taani inttessi gaada waayettiyogaappe denddidaagan, intte yayyenna mala oychchays; ayssi giikko, hegee intte bonchchettanaadan oottees.
14 Hegaa gishshawu, taani gulbbatada Aawaa woossays;
15 saluwaninne saꞌan deꞌiyageeti ubbay* sunttaa appe ekkidosona.
16 Xoossay ba gitatettan ba ayyaanan intteyyo wolqqaa immidi, intte wozanaa minttana mala taani woossays;
17 intte Kiristtoosa ammaniyo ammanuwan I siiquwara intte wozanan deꞌanaadankka woossays. Qassi hiixettida shuchchan xaphuwa yeddidi intte minni eqqana;
18 hegaappe denddidaagan, intte geeshshatu ubbaara tumaayyo ubba ginay* ay keenakko polidi akeekana;
19 qassi eraappe aadhdhiya Kiristtoosa siiquwa intte erana; hegaappe denddidaagan, Xoossay immiyo kumettabay inttenan eellana.
20 Nuuni oychchana woy qoppana danddayiyogaappe keehi aadhdhiyabaa nunan oottiya ba wolqqan oottana danddayiya Xoossaayyo
21 yeleta ubban, galchchaaninne Kiristtoos Yesuusan meri merinawu sabay ayyo gido. Aminꞌꞌi.
