Efisoona Asaassi 4:1-32
4 Hegaa gishshawu, Godaa gaasuwan qashettida taani, inttena xeegida Xoossay koyiyogaadan intte deꞌana mala inttena woossays;
2 awudenne ziqqi giite, ashilaalite, danddayitenne issoy issuwa siiqidi mooruwa qoodennan deꞌite,
3 issoy issuwara sarotettan deꞌiyogan ayyaanaa issippetettaa naagidi deꞌanawu wozanappe baaxetite.
4 Intte xeegettidoogee issi hidootaassa gidiyogaadan, issi bollaynne issi ayyaanay deꞌees;
5 Goday issuwa, ammanoy issuwa, muuhettay issuwa;
6 ubbaappe bollay, qassi ubbaa baggaaranne ubban oottiya, ubbaa Aaway issi Xoossay deꞌees.
7 Xoossay nuussi ubbaassi laggetiyabi baynna kehatettaa kehiis; coo imettiya imotaa Kiristtoosi nuussi shaakki immido ogee hegaa bessees.
8 Ayssi giikko, Geeshsha Maxaafay, “I xoqqasaa kiyiyo wode, omooddettidaageeta ekkidi biis; I attuma asata imotadan immiis” yaagees.
9 ‘I xoqqasaa kiyiis’ giyogee ay bessiyabee? Hegee I ziqqasaa, hegeekka, saꞌaa wodhdhidoogaakka bessiyaba.
10 Duge wodhdhidaagee salotu ubbaappe xoqqiyasaakka kiyidaagaa; hegaappe denddidaagan, I ubbabay polettanaadan oottana.
11 Qassi I issoti issoti kiitettidaageeta gidanaadan, issoti issoti Xoossay erissidobaa yootanaadan, issoti issoti ubba wode mishiraachchuwa yootanaadan, issoti issoti heemmanaadaaninne tamaarissanaadan immiis;
12 hegee haggaazaara gayttida oosuwawu Kiristtoosa bollaa keexxanawu* geeshshata suureyanaassa;*
13 nuuni ubbay ammaniyobay* issuwa gidana gakkanaashiininne Xoossaa Naꞌaa geeshshi erana gakkanaashin eti hegaa oottana; hegaa gishshawu, nuuni gamma gakkida* asa mala gidin, nu eeshshay muleera Kiristtoosaagaa mala gidana.
14 Hegaa gishshawu, harata cimmiya asati tamaarissiyo worddobaa siyidi eta kaalliyageeti carkkoynne beetay abban yaa haa qaattiyo wolwolo mala gidiyo gishshawu, nuuni naatu mala gidiyogaa aggana koshshees.
15 Shin nuuni siiqananne tumaa haasayana koshshees; yaatiyogan nuuni diccidi, ubbaban bollawu huuphe gidiya Kiristtoosadan deꞌana danddayoos.
16 Bollaa shaahoti ubbay an gaytti ohettidi koshshiyabaa immiya kure ubbaa baggaara issippe oottoosona. Bollaa shaahoti ubbay maara oottiyo wode, hegee bollay diccanaadaaninne siiquwan minnanaadan oottees.
17 Yaatiyo gishshawu, taani Godaa sunttan hagaa yootaysinne markkattays: Hara biittaa asay pattenna* bantta qofaadan hemettiyogaadan hemettiyogaa intte aggana koshshees.
18 Eti erenna gishshawunne eta wozanay dammido* gishshawu, eta qofay xuman deꞌees, qassi Xoossay immiyo deꞌuwappe shaahettidosona.
19 Eta kahay gerzzumidaba mala gidin, eti geeshsha gidennabaa ubbaa yaaretidi oottiiddi yeelli baynnabaa hanoosona.*
20 Shin Kiristtoosi hegaa mala gidennaagaa intte tamaaridetanne ereeta;
21 tumay Yesuusan deꞌiyogaadan, intte appe siyidetanne appe tamaarideta.
22 Intte intte galꞌꞌa eeshshaa,* hegeekka, kase eeshshaa qaarana bessiyogaa tamaarideta; ayssi giikko, cimmiya intte iita amoy he galꞌꞌa eeshshaa mooriiddi deꞌees.
23 Qassi intte qoppiyo ogee* ubbatoo ooraxxana koshshees;
24 hegaadankka, tumu xillotettaaninne ammanuwan Xoossaa sheniyadan merettida ooratta eeshshaa intte maayana koshshees.
25 Simi intte ubbay cimmiyogaa aggido gishshawu, intte shooruwara tumaa haasayite; ayssi giikko, nuuni issi bollaa shaahota.
26 Intte hanqqettana danddayeeta, shin nagaraa oottoppite; intte hanqqetti uttidaashin away wullana koshshenna;
27 Dabloosayyo miikkiya* immoppite.
28 Wuuqqiya uri hagaappe guyye wuuqqoppo, shin ba kushiyan loꞌꞌobaa oottiiddi, minnidi ootto; hegaappe denddidaagan, metootida asassi immiyobay ayyo deꞌana danddayees.
29 Siyiyageeta maaddiyabaa yootanawu he wode koshshiyagaadan harata minttettiya loꞌꞌobaa xalaalaa haasayiteppe attin, wooqqida qaali intte doonaappe kiyoppo.
30 Qassi inttena wozanawu qanxxettidaban ashshiyo gallassaassi Xoossay intte bolli maatafaa wottido, A geeshsha ayyaanaa azzanttoppite.*
31 Ubba qommo morkketettaa, yiilluwa, hanqquwa, cabbuwa, cashshaa, qassi hara iitatetta ubbaa aggite.
32 Shin Xoossay Kiristtoosa gaasuwan intteyyo coo atto giidoogaadan, inttekka issoy issuwawu coo atto giiddi, issoy issuwawu kehitenne qarettite.
Footnotes
^ Woykko “minttanawu.”
^ Woykko “loohissanaassa.”
^ Woykko “ammaniyageeti.”
^ Woykko “dichchaa wurssida.”
^ Woykko “hada.”
^ Woykko “donjjillido.”
^ Giriikettuwan, aselgiya.
^ Mise, “asa.”
^ Woykko “intte kahaa ootissiya wolqqay.” Mise, “intte kahaa ayyaanan.”
^ Woykko “qaadaa.”
^ Woykko “kayyoyoppite.”
