Efisoona Asaassi 5:1-33
5 Simi intte Xoossay siiqiyo naata gidiyo gishshawu, Xoossaa milatite,
2 qassi Kiristtoosi nuna* siiqidi, bana sawuwa tonggu giya yarshsho oottidi nu* gishshawu Xoossaayyo immidoogaadan, inttekka siiquwan deꞌite.
3 Geeshsha asatuyyo bessennaba gidiyo gishshawu, pokkiya tuna nagaraanne* tunatetta ubbaa woy yaaretiyogaa bessiyabaa, intte haray atto haasayanakka bessenna;
4 intte Xoossaa galatana besseesippe attin, yeellayiyabaa haniyogee woy eeyyabaa haasayiyogee woy pokkiyabaa qiriyogee bessiyaba gidenna.
5 Ayssi giikko, pokkiya tuna nagaraa oottiya asi woy tuna asi woy yaaretiya asi, hegeekka, eeqiya asi Kiristtoosi haariyo, Xoossaa Kawotettaa laattennaagaa intte ereetanne loytti akeekeeta.
6 Pattenna haasayan ooninne inttena cimmoppo; ayssi giikko, hegaa gaasuwan Xoossay azazettennaageeta hanqqettana.
7 Hegaa gishshawu, etaagaadan oottoppite;*
8 ayssi giikko, intte kase xuma, shin haꞌꞌi Godaageeta gidiyo gishshawu pooꞌo. Intte pooꞌuwa naatudan deꞌiyogaa aggoppite;
9 ayssi giikko, pooꞌoy ayfiyobay ubba qommo loꞌꞌotettaa, xillotettaanne tumaa.
10 Godaa ufayssiyabay aybakko awudekka shaakki erite;
11 qassi xumaara gayttida pattenna oosota oottiyogaa aggite; shin he oosoti iita gidiyogaa bessite.
12 Ayssi giikko, eti geeman oottiyobay yootanawukka yeellayiyaba.
13 Iitabaa ubbaa pooꞌoy bessees; ayssi giikko, beettiyabay ubbay pooꞌo gidees.
14 Hegaa gishshawu, Geeshsha Maxaafay, “Nenoo, xiskkiyagoo, beegottada hayquwappe dendda, qassi Kiristtoosi ne bolli pooꞌissana” yaagees.
15 Simi intte eeyyatudan gidennan, hayyottiya asatudan deꞌiyakkonne loytti qoppite;*
16 nuuni iita gallassatun deꞌiyo gishshawu, intte wodiyan keehi koshshiyabaa oottite.*
17 Hegaa gishshawu, wozani baynna asa gidiyogaa aggite, shin Yihooway koyiyobay aybakko akeekite.
18 Qassi woyne eessan mattottoppite; hegee shoraa xayanaadan* oottees, shin ubbatoo ayyaanay inttenan eellanaadan oottite.
19 Mazamureta yexxiiddi, Xoossaa sabbiiddinne goynuwa yettata yexxiiddi issoy issuwa* minttettite; Yihoowa sabbanawu wozanappe yexxite;
20 qassi ubbabawu nu Godaa Yesuus Kiristtoosa sunttan nu Xoossaanne Aawaa ubbatoo galatite.
21 Intte Kiristtoosawu yayyidi issoy issuwawu haarettite.
22 Machchoti Godawu haarettiyogaadan bantta azinawu azinawu haarettana koshshees;
23 ayssi giikko, ba bollaa, galchchaa ashshiya Kiristtoosi A kaalettiyagaa* gidiyogaadan, azinaykka ba machchiyo kaalettiyagaa.
24 Galchchay Kiristtoosawu haarettiyogaadan, machchotikka ubbaban bantta azinawu azinawu haarettana koshshees.
25 Azinatoo, Kiristtoosi galchchaa siiqidi ayyo hayqqidoogaadan, inttekka intte machchiyo machchiyo siiqiyogaa aggoppite;
26 I qaalaa haattan galchchaa meecci geeshshidi mulxxuxxissanawu hegaa oottiis;
27 I galchchay wottiyobi baynna geeshsha gidanaadan koyiyo gishshawu ayyo yallisidi beettanaadan hegaa oottiis.
28 Hegaadan, azinati banttana siiqiyogaadan bantta machchiyo machchiyo siiqana koshshees. Ba machchiyo siiqiya asi bana siiqees;
29 Kiristtoosi galchchawu oottiyogaadan, ooninne ba bollaa* mizeesinne alꞌꞌobadan xeelleesippe attin, mule ixxenna;
30 ayssi giikko, nuuni A bollaa shaahota.
31 “Hegaa gishshawu, issi asi ba aawaanne ba aayyiyo aggidi ba machchiyo baqqi oyqqana,* yaatin eti naaꞌꞌay issi asho gidana.”
32 Ha geemmi uttida yohoy gitaba. Taani yootiyobay Kiristtoosabaanne galchchaabaa.
33 Gidoppe attin, intte ubbay intte machchiyo machchiyo intte huuphedan siiqana bessees, qassi machchiya ba azinaa wozanappe bonchchana koshshees.
Footnotes
^ Woykko geella, “inttena.”
^ Woykko geella, “intte.”
^ Giriikettuwan, porniya.
^ Woykko “etaara walahettoppite.”
^ Woykko “naagettite.”
^ Mise, “maacido wodiya shammite.”
^ Woykko “dajjetanaadan.”
^ Woykko geella, “inttena.”
^ Mise, “huuphe.”
^ Mise, “ashuwa.”
^ Woykko “machcheera deꞌi aggana.”
