Efisoona Asaassi 6:1-24
6 Naatoo, intte aawaayyonne aayeeyyo Goday koyiyogaadan azazettite; ayssi giikko, hegee xillo ooso.
2 “Ne aawaanne ne aayyiyo bonchcha” giya koyro azazoy anjjettanaadan oottees; he anjjoy,
3 “Ne deꞌoy giiga gidanaadaananne* saꞌan neeni adussa wodiya deꞌanaadaana” yaagees.
4 Aawatoo, intte naata Yihooway yootiyogaadan seeritenne zoriteppe* attin, eta yiilloyoppite.
5 Aylletoo, intte godatuyyo* yayyidinne eta bonchchidi, Kiristtoosayyo azazettiyogaadan etayyo wozanappe azazettite;
6 intte asa ufayssanawu giidi beso xalaalawu* azazettoppite, shin intte Kiristtoosa aylle gidiyo gishshawu, Xoossay koyiyobaa kumetta shemppuwan oottite.
7 Asassi gidennan, Yihoowayyo oottiyogaadan intte godatuyyo wozanappe oottite;
8 ayssi giikko, ooninne aylle gidin woy goqa gidin, I oottiyo loꞌꞌobaa ubbaa Yihoowappe zaaridi ekkanaagaa intte ereeta.
9 Godatoo, inttekka eta yashissennan etayyo hegaadan oottite; ayssi giikko, eta Godaynne intte Goday saluwan deꞌiyogaa, qassi I ubbaa issi ayfiyan xeelliyogaa intte ereeta.
10 Wurssettan, Godaaninne A gita minotettan appe wolqqaa ekkite.
11 Dabloosi balettanawu oottiyobaa eqettidi minni eqqanawu Xoossay immiyo kumetta ola miishshaa maayite;
12 ayssi giikko, nuuni saluwan deꞌiya iita ayyaanatuura, kawotettatuura, maataawatuuranne saꞌaa asaa xumaa haariyageetuura warettoosippe* attin, suuttaaranne ashoora warettokko.
13 Hegaa gishshawu, Xoossay immiyo kumetta ola miishshaa maayite; hegaappe denddidaagan, iita gallassan morkkiya intte eqettana danddayeeta, qassi intte ubbabaa ootti polidi minni eqqana.
14 Simi intte xeessan tumaa qabattodan danccidi, xillotettaa tiran wottiyobadan maayidi minni eqqite,
15 qassi sarotettaa mishiraachchuwa yootanawu giigi uttiyogaa intte tohuwan caammadan wottite.
16 He ubbabaa bolli, Seexaanaa zubbeta* eexxiyageeta ubbaa intte toyssana danddayiyo ammanuwa gita gonddalledan oyqqite.
17 Hegaadankka, atotettaa birata qophedan wottite, qassi ayyaanay immiyo bisuwa, hegeekka, Xoossaa qaalaa oyqqite;
18 qassi ubba qommo woosaaninne watiwatuwan,* ubbatoo ayyaanan Xoossaa woossiyogaa aggoppite. Yaatanawu naagi uttite, qassi geeshshatu ubbaayyo wozanappe woossiyogaa aggoppite.
19 Taani haasayiyo wode Xoossay taayyo loꞌꞌo inxxarssaa immana mala taayyokka woossite; hegaappe denddidaagan, mishiraachchuwabaa genttido yohuwa erissanawu taani yayyennan yootana danddayays;
20 taani mishiraachchuwa yootanawu kiitettiyo* gishshawu qashettaas; taani yayyennan mishiraachchuwa bessiyagaadan yootana mala, taayyo Xoossaa woossite.
21 Intte tabaanne ta hanotaabaa eranaadan, nu siiqo ishay, Godayyo ammanettidi haggaaziya Tikiqoosi intteyyo ubbabaa yootana.
22 Taani A inttekko kiittiyoy hegaassa; hegaappe denddidaagan, intte nu hanotaa erana, qassi I inttena minttettana.
23 Xoossay Aawaynne Goday Yesuus Kiristtoosi immiyo sarotettay, siiqoynne ammanoy nu ishatuyyo gido.
24 Nu Godaa Yesuus Kiristtoosa tumuppe siiqiya ubbaassi laggetiyabi baynna kehatettay gido.
Footnotes
^ Woykko “Neeni duretanaadaananne.”
^ Woykko “tamaarissiteppe, kaalettiteppe.” Mise, “kahan wottite.”
^ Mise, “ashuwan godatuyyo.”
^ Mise, “asa ufayssiyageetudan ayfe haggaazan.”
^ Mise, “baaxetoosippe.”
^ Woykko “oliyo miishshata.”
^ Woykko “wozanappe woossiyogan.”
^ Woykko “ambbaasaddere.” Haariya asa gishshaa kiitettiya suntta.
