Luqaasi Xaafidoogaa 1:1-80
-
Tewofiloosawu xaafettidaba (1-4)
-
Gabreeli asaa haattan mukkiya Yohaannisi yelettanaagaa yootidoba (5-25)
-
Gabreeli Yesuusi yelettanaagaa yootidoba (26-38)
-
Mayraama Elssaabeexo oychchanawu biidoogaa (39-45)
-
Mayraama Yihoowa gitatettaa yootidoba (46-56)
-
Yohaannisi yelettidoogaanne sunttettidoogaa (57-66)
-
Zakkaariyasi Xoossay erissidobaa yootidoba (67-80)
1 Keehi bonchchettida Tewofiloosaa, daroti nuuni muleera ammaniyo qofaa shiishshidi xaafanawu malidosona;
2 hegaadankka, koyruwappe doommidi hanidabaa beꞌidaageetinne Xoossaa kiitaa awaajjiyageeti hageeta nuuyyo yootidosona.
3 Taani neeyyo ubbabay koyruwappe doommidi hanidoogaadan xaafanawu qofaa qachchidoy hegaassa;
4 qassi neeni tamaaridobay tuma gidiyogaa hegan loytta erana.
5 Yihudaa kawuwa Heeroodisa wode, Abiiya giyo shaahuwan oottiya Zakkaariyasa giyo kahinee deꞌees. A machchiya Aaroona zeretta, qassi I sunttay Elssaabeexo.
6 Eti naaꞌꞌaykka Yihoowa azazotanne higgeta muleera naagido gishshawu, Xoossaa sinttan xillo.
7 Shin Elssaabeexa mantta gidiyo gishshawu, eti naꞌa yelibookkona; qassi eti naaꞌꞌaykka cimidosona.
8 Issi wode, I Xoossaa garuwan ba shaahuwan Xoossaa sinttan kahine oosuwa oottees.
9 Kahinetu meeziyadan* ixaanaa xuuggiyo kayay A gakkiis; hegaa gishshawu, I Yihoowa garuwa gelidi xuuggiis.
10 Qassi I ixaanaa xuuggiyo wode asay ubbay karen woossees.
11 Ixaanaa xuuggiyo sohuwappe ushachcha baggaara Yihoowa kiitanchchay eqqidaagaa I beꞌiis.
12 Shin Zakkaariyasawu haniyobay kirqqi giis, qassi I keehi yayyiis.
13 Gidoppe attin, kiitanchchay A hagaadan giis: “Zakkaariyasaa, neeni wozanappe woossido woosaa Xoossay siyido gishshawu yayyoppa; qassi ne machchiya Elssaabeexa attuma naꞌaa yelana; yaatin neeni A sunttaa Yohaannisa gaana.
14 I yelettido gishshawu neeni keehi ufayttana, qassi haratikka keehi ufayttana;
15 ayssi giikko, I Yihoowa sinttan gita gidana. Shin I woyniya woy mattoyiya ay ushshanne mule uyana bessenna, qassi I yelettanaappe kasekka* an geeshsha ayyaanay kumana;
16 qassi I Israaꞌeela naatuppe darota eta Xoossaa Yihoowakko zaarana.
17 Xoossay A Eelaasa ayyaanaaninne wolqqan baappe sinttawu kiittana; I aawatu wozanaa naatuugaadan oottana, qassi azazettennaageeti xillotudan hayyottanaadan oottana; eti Yihoowayyo giigida asa gidana mala I hegaa oottana.”
18 Zakkaariyasi kiitanchchaayyo hagaadan giis: “Hegee tuma gidiyogaa waata erana danddayiyanaa? Ayssi giikko, taani cimaas, qassi ta machchiyakka cimaasu.”
19 Kiitanchchay ayyo hagaadan giis: “Taani Xoossaa sinttan eqqiya Gabreela; taani nena haasayissanawunne ha mishiraachchuwa neeyyo yootanawu kiitettaas.
20 Shin taani yootido, A wodee gakkin polettanabaa neeni ammanabeenna gishshawu, hageeti hanana gakkanaashin neeni haasayana danddayakka.”
21 He wode, asay Zakkaariyasa naagees, qassi I geeshsha sohuwan keehi gamꞌꞌido gishshawu, eti malaalettidosona.
22 I kiyido wode, haasayana danddayibeenna; qassi I geeshsha sohuwan ajjuutaa beꞌidoogaa asay akeekiis. I etayyo ba kushiyan malaati bessiisippe attin haasayibeenna.
23 I Xoossaa garuwan haggaaziyo wodee wurin, ba soo biis.
24 Amarida gallassappe guyyiyan, A machchiya Elssaabeexa shahaaraasu; qassi A ichchashu aginawu asaara gayttennan takkaasu; A hagaadan gaasu:
25 “Yihooway haꞌꞌi taayyo oottidobaa beꞌite. I ta yeellaa qaaranawu taakko xeelliis.”
26 A shahaarido usuppuntta aginan, Xoossay kiitanchchaa Gabreela Galiilan deꞌiya Naazireete katamaa kiittiis;
27 I Daawita zeretta gidida Yooseefa giyo bitanee giigissido issi geelaꞌeekko kiitettiis; he geelaꞌee sunttay Mayraamo.
28 Kiitanchchay ikko yiidi O, “Saro, keehi anjjettidaaree, Yihooway nenaara deꞌees” yaagiis.
29 Shin A kiitanchchay yootidobaa siyada dagammaasu, qassi he sarotay woygiyogaakko qoppaasu.
30 Hegaa gishshawu, kiitanchchay iyyo hagaadan giis: “Mayraamee, Xoossay nenan ufayttido gishshawu yayyoppa.
31 Neeni shahaarada attuma naꞌaa yelana, qassi neeni A Yesuusa gaada sunttana.
32 I gita gidananne Ubbaappe Xoqqa Xoossaa Naꞌaa geetettana; qassi Xoossaa Yihooway A aawaa Daawita araataa ayyo immana;
33 qassi I Kawo gididi Yaaqooba zerettaa merinawu haarana; qassi A Kawotettaayyo wurssettay deꞌenna.”
34 Shin Mayraama kiitanchchaayyo, “Taani attuma asaara inddan gaytta erenna gishshawu, hegee waanidi hananee?” yaagaasu.
35 Kiitanchchay iyyo hagaadan giis: “Geeshsha ayyaanay ne bolli wodhdhana, qassi Ubbaappe Xoqqa Xoossaa wolqqay nena kammana. Hegaa gishshawu, neeni yelana naꞌay Xoossaa Naꞌaa, geeshshaa geetettana.
36 Qassi, cimida ne dabbiya Elssaabeexakka attuma naꞌaa shahaaraasu, hegaa bollikka, mantta giyo he maccaasiya shahaaroosappe haꞌꞌi usuppuntta agina;
37 ayssi giikko, Xoossay yootidi polana danddayennabi baawa.”
38 Yaagin Mayraama ayyo, “Taani Yihoowa aylliyo! Neeni giidoogaadan taayyo hano” yaagaasu. Yaagin kiitanchchay ippe shaahettidi biis.
39 Mayraama hegaappe guuttaa takkada, deretiya biittan deꞌiya Yihudaa katamatuppe issuwa eesotada baasu;
40 qassi A Zakkaariyasa soo gelada Elssaabeexo sarotaasu.
41 Elssaabeexa bana Mayraama sarotiyogaa siyido wode, I uluwan deꞌiya naꞌay qaaxxiis; qassi Elssaabeexin geeshsha ayyaanay kumin,
42 A ba qaalaa xoqqu oottada hagaadan gaasu: “Neeni macca asa ubbaappe anjjettidaaro, qassi neeni yelana naꞌaykka anjjettidaagaa!
43 Yaanido gishshawu, ta Godaa aayyiya tana oychchanawu yiidoogee taayyo bonchcho.
44 Ayssi giikko, beꞌa! neeni sarotiyogaa taani siyosaara ta uluwan deꞌiya naꞌay ufayttidi qaaxxiis.
45 Odettidabaa ammanida neenikka ufayttaasa; ayssi giikko, Yihooway neeyyo yootidobaa muleera polana.”
46 Qassi Mayraama hagaadan gaasu: “Taani* Yihoowa gitatettaa yootays,
47 qassi tana ashshiya Xoossay taayyo oottidoban ta wozanay ubbatoo ufayttees;
48 ayssi giikko, I ba hiyyeesa aylliyo hassayiis. Qassi hagaappe simmin, tana yeleta ubbay ufayttiya maccaasiyo yaagana;
49 ayssi giikko, wolqqaama Xoossay taayyo gitabaa oottiis, qassi A sunttay geeshsha;
50 qassi merinawu A maarotay ayyo yayyiyageetu bollaana.
51 I he ubbabaa ba wolqqaama kushiyan oottiis; bantta wozanan qoppiyoban otorettiyageeta I laaliis.
52 I wolqqaama asata araataappe wottidi, hiyyeesata xoqqu oottiis;
53 I namisettidaageeta loꞌꞌobaa kalissidi, dureta mela kushe yeddiis.
54 I ba aylliya Israaꞌeela maaddanawu yiis, qassi yaatiyogan, I qaalaa gelidobaa hassayiyogaa bessiis;
55 I Abrahaamayyonne A zerettaayyo* merinawu maarotaa bessanawu qaalaa geliis, qassi nu mayzza aawatuyyokka I yootidobay hegaa.”
56 Mayraama iira heezzu agina gidiyagaa takkada ba soo simmaasu.
57 Elssaabeexa yeliyo wodee gakkin, attuma naꞌaa yelaasu.
58 Qassi I shoorotinne I dabboti Yihooway ba gita maarotaa iyyo bessidoogaa siyidi iira issippe ufayttidosona.
59 Eti hosppuntta gallassi naꞌaa qaxxarawu yiidosona; yaatidi, eti naꞌaa A aawaa sunttan Zakkaariyasa giidi sunttanawu koyidosona.
60 Shin A aayyiya, “Chii! I Yohaannisa geetettana” yaagaasu.
61 Yaagin eti O, “Ne dabbotuppe ha sunttan xeesettiya issi asinne baawa” yaagidosona.
62 Hegaappe simmin, A aaway naꞌaa oona gaanawu koyiyakko eti malaatan A oychchidosona.
63 Yaatiyo gishshawu, A bolli xaafiyobaa immanaadan oychchidi I, “A sunttay Yohaannisa” yaagidi xaafiis. Yaatin eti ubbay malaalettidosona.
64 Sohuwara A doonay pogettiininne A inxxarssaykka birshshettin haasayiyogaa doommiisinne Xoossaa sabbiis.
65 Qassi eta shooron deꞌiya asay ubbay yayyiisinne Yihudaa biittan ubbasan asay ha ubbabaa haasayiyogaa doommiis.
66 Hegaa siyida ubbay ba wozanan, “Ha naꞌay diccidi waananeeshsha?” yaagidi qoppiis. Ayssi giikko, Yihoowa wolqqay tumukka aara deꞌees.
67 Hegaappe guyyiyan, A aaway Zakkaariyasi geeshsha ayyaanay an kumin, hagaadan giidi Xoossay erissidobaa yootiis:
68 “Israaꞌeela Xoossay Yihooway ba asaa ashshanawu etawu qarettido gishshawu, sabay ayyo gido.
69 Qassi I ashshiya wolqqaamaa* ba ashkkaraa Daawita zerettaappe nuuyyo denttiis.
70 Daro wodiyappe kase, geeshshati Xoossay erissidobaa yootidoogaadan, I qaalaa gelidobay hegaa;
71 I nu morkketuppenne nuna ixxiya ubbatuppe nuna ashshanawu qaalaa geliis.
72 I nu mayzza aawatuyyo qaalaa gelidoogaadan, nuna maarananne ba geeshsha maachchaa hassayana;
73 I nu mayzza aawaa Abrahaamayyo ha qaalaa geliis.
74 Xoossay nuna nu morkketuppe ashshi simmidi, yayyennan ayyo goynniyo maataa nuuyyo immana;
75 yaatiyogan, nuuni ammanettiyageeta gidananne nu deꞌo ubban suurebaa oottana.
76 Shin ha naꞌawu, neeni A ogiya giigissanaadan Yihooway nena baappe sinttawu kiittiyo gishshawu, neeni Ubbaappe Xoqqa Xoossay erissidobaa yootiyagaa gidana;
77 hegee, Xoossay eta nagaraa atto giyogan eta ashshanaagaa neeni A asaa erissanaadaana;
78 nu Xoossay ha ubbabaa ba qaretaa gishshawu oottana. He qaretaappe denddidaagan, away kiyiyo wodiyagaa mala pooꞌoy saluwappe pooꞌiyagaa nuuni beꞌana;
79 hegee, xumaaninne hayquwa kuwan uttidaageetuyyo pooꞌissanaadaana. He pooꞌoy nuuni sarotettaa demmanawu ay oottana koshshiyakko bessees.”
80 Qassi naꞌay dicciis, Xoossaa ayyaanan minniisinne Israaꞌeela asawu mishiraachchuwa yootiyo wodee gakkanaashin bazzuwan deꞌiis.
Footnotes
^ Woykko “gamꞌꞌida wogaadan.”
^ Woykko “aayee uluwappe doommidi.”
^ Woykko “Ta shemppoy.”
^ Woykko “naatuyyo.”
^ Mise, “atotettaa kaciya.”
