Luqaasi Xaafidoogaa 3:1-38
3 Xibaariyos Qeesaari kawotoosappe 15tta layttan, Phenxxeniya Philaaxoosi Yihudaa haariyo wode, Heeroodisi* Galiilaa biittaa haariyo* wode, A ishay Piliphphoosi Ixuriyasanne Xiraakonidoosa biittaa haariyo wode, qassi Lisaaniyosi Abilaanisa biittaa haariyo wode,
2 waanna kahinetu Haannanne Qayaafa wode, bazzuwan Xoossaa kiitay Zakkaariyasa naꞌaa Yohaannisakko yiis.
3 Hegaa gishshawu, I asay zilꞌꞌettidi laamettidoogaa bessanawunne Xoossay eta nagaraa atto gaana mala, haattan muukettanaadan yootiiddi Yorddaanoosa heeran ubbasaa biis.
4 Hegee Xoossay erissidobaa yootiya Isiyasa maxaafan xaafettidoogaadankka haniis; Isiyasi hagaadan giis: “Issi uri bazzuwan ba qaalaa xoqqu oottidi hagaadan giis: ‘Yihoowa ogiya giigissitenne sittayite!
5 Dilbbattiya soho ubbay kumana bessees, qassi dere ubbaynne zumbbulla ubbay dembba gidana bessees, geella oge ubbay sitti gaana bessees, qassi gelikessa oge ubbay salallana bessees;
6 qassi Xoossay waatidi ashshanaakko asay ubbay* beꞌana.’”
7 Hegaa gishshawu, Yohaannisi haattan muukettanawu baakko yiya asaa hagaadan giis: “Ha hasotoo, inttena naagiya, Xoossaa pirddaappe baqatana mala intteyyo oonee yootiday?
8 Yaatikko, intte intte nagaran zilꞌꞌettidi laamettidoogaa bessiyabaa oottite. Intte intte wozanan, ‘Abrahaami nu aawaa’ gaanawu qoppoppite. Ayssi giikko, Xoossay ha shuchchatuppe Abrahaamassi naata denttana danddayiyogaa taani intteyyo yootays.
9 Mittaa xaphuwappe qanxxi olanawu kalttay giigi uttiis. Hegaa gishshawu, loꞌꞌo ayfe ayfenna mitta ubbay qanxxettidi taman olettana.”
10 Hegaappe guyyiyan, asay A, “Yaatin nuuni ay oottana koshshii?” giidi oychchiis.
11 Yaagin, I etayyo hagaadan giis: “Naaꞌꞌu maayoy* deꞌiyo asi maayoy baynna urawu issuwa immo; qassi miyobi deꞌiyo asi miyobi baynna urawu immo.”
12 Haray atto, qaraxaa shiishshiyageetikka haattan muukettanawu yiidi A, “Asttamaariyawu, nuuni ay oottana koshshii?” giidosona.
13 I etayyo, “Higgiyan odettidaagaappe aadhdhiya qaraxaa oychchoppite”* yaagiis.
14 Qassi wotaaddarati A, “Nuuni ay oottana koshshii?” giidi oychchidosona. Yaagin I eta hagaadan giis: “Ooppenne wolqqan miishsha ekkoppite, woykko oonanne wordduwan mootoppite, shin intteyyo imettiyaban* ufayttidi deꞌite.”
15 He wode asay Kiristtoosi yaana giidi naagees; qassi eti ubbay Yohaannisa, “I Kiristtooseeshsha” giidi qoppidosona.*
16 Yohaannisi etawu ubbawu hagaadan giis: “Taani inttena haattan muukkays, shin taappe simmin yiyagee taappe minnees; taani A caammaa birshshanawukka bessikke. I inttena geeshsha ayyaanaaninne taman hegaadan oottana.*
17 I kattaa qoxxiyo ba awudiya muleera geeshshidi gisttiya gootaran qolanawu A kushiyan kattaa suraggiyobay deꞌees, shin I dalaa toꞌenna taman xuuggana.”
18 Qassi I hara darobaa zoriisinne kaseegaadan asaayyo mishiraachchuwa yootiis.
19 Shin biittaa haariya Heeroodisi ba ishaa machchee Heeroodiyadiira gayttidaagan oottidobaanne I oottido iitabaa ubbaa gaasuwan, Yohaannisi I mooridobaa yootiis.
20 Hegaa gishshawu, Heeroodisi hara iitabaakka oottiis; I Yohaannisa qasho keettan qachchi wottiis.
21 Asay ubbay haattan muukettiyo wode, Yesuusikka muukettiis. I woossishin, saloy dooyetti bayiis;
22 qassi geeshsha ayyaanay haraphphe milatidi A bolli wodhdhiisinne Xoossay saluwappe, “Neeni taani siiqiyo ta Naꞌaa; taani nenan ufayttays” yaagiis.
23 Yesuusi ba oosuwa doommiyo wode, ayyo layttay 30 gidana; asay qoppiyogaadan, IYooseefa naꞌa,Eela naꞌa,
24 Maaxaata naꞌa,Leewa naꞌa,Milkka naꞌa,Yoona naꞌa,Yooseefa naꞌa,
25 Maataatiya naꞌa,Amoxa naꞌa,Naahooma naꞌa,Esiliima naꞌa,Naaga naꞌa,
26 Maaꞌata naꞌa,Maataatiya naꞌa,Seemeya naꞌa,Yooseeka naꞌa,Yooda naꞌa,
27 Yoonaana naꞌa,Reesa naꞌa,Zarubaabeela naꞌa,Salaatiyala naꞌa,Neera naꞌa,
28 Milkka naꞌa,Hada naꞌa,Qosaama naꞌa,Elmmodaama naꞌa,Eera naꞌa,
29 Yesuusa naꞌa,Elꞌꞌeezara naꞌa,Yoriima naꞌa,Maaxaata naꞌa,Leewa naꞌa,
30 Simoona naꞌa,Yihudaa naꞌa,Yooseefa naꞌa,Yoonaama naꞌa,Eliyaqiima naꞌa,
31 Meliyo naꞌa,Maynaano naꞌa,Maaxaata naꞌa,Naataana naꞌa,Daawita naꞌa,
32 Isseya naꞌa,Yobeeda naꞌa,Booꞌeeza naꞌa,Salimoona naꞌa,Naꞌasoona naꞌa,
33 Aminadaaba naꞌa,Arnna naꞌa,Hexiroona naꞌa,Paareesa naꞌa,Yihudaa naꞌa,
34 Yaaqooba naꞌa,Yisaaqa naꞌa,Abrahaama naꞌa,Taara naꞌa,Naakoora naꞌa,
35 Saruuga naꞌa,Raaꞌu naꞌa,Peeleega naꞌa,Ebeera naꞌa,Sheela naꞌa,
36 Qaynaana naꞌa,Arifaakisaada naꞌa,Seema naꞌa,Nohe naꞌa,Laameeka naꞌa,
37 Maatusaala naꞌa,Heenooka naꞌa,Yaareeda naꞌa,Malaaliꞌeela naꞌa,Qaynaana naꞌa,
38 Heenoosa naꞌa,Seeta naꞌa,Addaame naꞌa,Xoossaa naꞌa.
Footnotes
^ Woykko “Heeroodis Anttiphaasi.”
^ Mise, “tetrark.” Rooma Kawoy sunttido biittan haariyagaa.
^ Woykko “asho ubbay.”
^ Woykko “Hara maayoy.”
^ Woykko “shiishshoppite.”
^ Woykko “intte damoozan.”
^ Mise, “bantta wozanan qoppidosona.”
^ Maatiyosa 3:11 tohossa qofaa xeella.
