Luqaasi Xaafidoogaa 6:1-49
-
“Sambbataa Godaa,” Yesuusa (1-5)
-
Kushee silido bitanee paxiis (6-11)
-
Yesuusi kiittido 12ta (12-16)
-
Yesuusi tamaarisseesinne harggidaageeta pattees (17-19)
-
Ufayttiyageetanne aayyeero giyobay gakkiyogeeta (20-26)
-
Morkketa siiqiyogaa (27-36)
-
Pirddiyogaa aggite (37-42)
-
Ba ayfiyan erettees (43-45)
-
Loytti keexxido keettaa; shuchchaa hiixxennan keexxido keettaa (46-49)
6 Issi gallassi sambbatan Yesuusi gisttiya giddoora kanttidi biishin, A kaalliyageeti tiya gisttiya duuttidi bantta kushiyan shigichchidi miidosona.
2 Yaatin, Parisaawetuppe amaridaageeti, “Intte Sambbatan woga gidennabaa ayssi ootteetii?” yaagidosona.
3 Shin Yesuusi etayyo hagaadan giis: “Daawiti inne A asati namisettido wode waatidaakko mule nabbabibeekketii?
4 I Xoossaa keettaa gelidi geeshsha oyttaa* ayyo immin miidi, banaara deꞌiyageetuyyokka hegaappe amaridaagaa immiis; kahinetu xalaalappe attin hara ooninne hegaa miyogee woga gidenna.”
5 Hegaappe guyyiyan, I etayyo, “Asa Naꞌay Sambbatawu Goda” yaagiis.
6 Hara sambbata gallassi I shiiqo keettaa gelidi tamaarissiyogaa doommiis. Qassi ushachcha kushee silido* issi bitanee yan deꞌees.
7 Higgiya tamaarissiyageetinne Parisaaweti Yesuusa mootiyobaa demmanawu, I Sambbatan asa pattiyakkonne beꞌanawu A loytti xeelloosona.
8 Shin I eti qoppiyobaa eriis; hegaa gishshawu, kushee silido* bitaniya, “Denddada giddo yaada eqqa” yaagiis. Yaagin I denddidi yan eqqiis.
9 Hegaappe guyyiyan, Yesuusi eta hagaadan giidi oychchiis: “Sambbatan waatiyogee wogee? Loꞌꞌobaa oottiyogeeyye, qohiyabaa oottiyogee? Shemppo ashshiyogeeyye, woriyogee?”
10 I eta ubbaa yuushshi aatti xeellidi, bitaniya, “Ne kushiya piddi ootta” yaagiis. Yaagin I piddi oottiis, qassi A kushee paxiis.
11 Shin eti hanqquwa eexxi kiyidosona, qassi Yesuusa waatanaakko issoy issuwara haasayiyogaa doommidosona.
12 Issi gallassi I deriya kiyidi, kumetta qammaa Xoossaa woossiiddi aqiis.
13 Qassi saꞌay wonttin, I bana kaalliyaageeta baakko xeegidi eta giddoppe 12ta dooriis; I eta kiitettidaageeta giis.
14 Eta sunttay, I Pheexiroosa giido Simoona, A ishaa Inddiraasa, Yaaqooba, Yohaannisa, Piliphphoosa, Barttalamoosa,
15 Maatiyosa, Toomaasa, Ilppiyosa naꞌaa Yaaqooba, “yeemottiyagaa” giyo Simoona,
16 Yaaqooba naꞌaa Yihudaa, qassi guyyeppe Yesuusa A morkketuyyo aatti immida Asqqorootu Yihudaa.
17 Qassi I etaara duge wodhdhidi dembbattiyasan eqqiis; A kaalliya daro asaynne I yootiyobaa siyanawunne harggiyappe paxanawu Yihuda ubbaappe, Yerusalaameppe, qassi Xiiroosanne Sidoona biittaa abbaa doonappe yiida cora asay etaara deꞌees.
18 Haray atto iita ayyaanati qohiyogeetikka paxidosona.
19 Qassi wolqqay appe kiyidi eta ubbaa pattiyo gishshawu, asay ubbay A bochchanawu koyees.
20 Qassi I bana kaalliyageetukko xeellidi hagaadan giis:
“Hiyyeesatoo, Xoossaa Kawotettay inttessa gidiyo gishshawu, intte ufaytteeta.
21 “Haꞌꞌi namisettiyageetoo, intte ufaytteeta; ayssi giikko, intte kallana.
“Haꞌꞌi yeekkiyageetoo, intte ufaytteeta; ayssi giikko intte miiccana.
22 “Asa Naꞌaa gaasuwan asay inttena ixxiyo wode, qassi eti inttena yedettiyo wodenne inttena iita giidi* toochchiyo wode, intte ufaytteeta.
23 Intte mayzza aawatikka Xoossay erissidobaa yootiyageeta hegaadan oottidosona; intteyyo saluwan gita woytoy deꞌiyo gishshawu, he gallassi ufayttidi poocammite.
24 “Shin duretoo, intte ufayssaa muleera demmiichchido gishshawu, intteyyo aayyeero.
25 “Haꞌꞌi kallidaageetoo, intteyyo aayyeero; ayssi giikko, intte namisettana.
“Haꞌꞌi miicciyageetoo, intteyyo aayyeero; ayssi giikko, intte kayyottananne yeekkana.
26 “Asay ubbay inttena sabbiyo wode intteyyo aayyeero; ayssi giikko, intte mayzza aawati Xoossay erissidobaa yootoos yaagidi worddotiyageetuyyo hegaadan oottidosona.
27 “Shin hagaa siyiya intteyyo yaagays: Intte morkketa siiqiyogaanne inttena ixxiyageetuyyo loꞌꞌobaa oottiyogaa aggoppite;
28 inttena qanggiyageeta anjjiyogaanne inttena cayiyageetuyyo woossiyogaa aggoppite.
29 Neessi issi bagga qinxxalliya baqqiya urawu hankko baggaakka bessa; qassi neeni bollaara maayidobaa wotti ekkiya urawu garssaara maayidobaakka diggoppa.
30 Nena oychchiya ubbawu imma, qassi nebaa wotti ekkida uri hegaa zaaranaadan oychchoppa.
31 “Qassi asay intteyyo oottanaadan intte koyiyogaadan etayyokka oottite.
32 “Intte inttena siiqiyageetu xalaalaa siiqikko, hegee inttena ay goꞌꞌii? Ayssi giikko, nagaraa oottiyageetikka banttana siiqiyageeta siiqoosona.
33 Qassi intte intteyyo loꞌꞌobaa oottiyageetuyyo loꞌꞌobaa oottikko, hegee inttena ay goꞌꞌii? Nagaraa oottiyageetikka hegaadan oottoosona.
34 Intte intteyyo zaaridi immana giidi qoppiyogeetussi talꞌꞌikko, hegee inttena ay goꞌꞌii? Nagaraa oottiyageetikka, immidoogaa keenaa ekkanawu, nagaraa oottiyageetussi talꞌꞌoosona.
35 Shin intte intte morkketa siiqiyogaa, qassi aybanne demmana giidi qoppennan loꞌꞌobaa oottiyogaanne talꞌꞌiyogaa aggoppite; yaatikko, intte gita woytuwa demmana, qassi intte Ubbaappe Xoqqa Xoossaa naata gidana; ayssi giikko, I galatennaageetuyyonne iitatuyyo keha.
36 Intte Aaway qarettiyogaadan, inttekka ubbatoo qarettite.
37 O bollinne pirddiyogaa aggite, yaatikko Xoossay intte bolli pirddenna; qassi boriyogaa aggite, yaatikko Xoossay inttena borenna. Ubbatoo atto giite, yaatikko Xoossay intteyyo atto gaana.
38 Immiyogaa aggoppite, yaatikko asay intteyyo immana. Eti qaatti bessidi naaqqin, kumi palahida keehi darobaa intte afalan intteyyo immana. Ayssi giikko, intte makkiyogaa keenay intteyyo makettidi imettana.”
39 Hegaappe simmin, I etayyo issi leemisuwakka hagaadan giidi yootiis: “Qooqe asi qooqe kaalettana danddayiiyye? Danddayenna; eti naaꞌꞌaykka ollan kunddana.
40 Tamaaree ba asttamaariyappe aadhdhenna, shin tamaaridi polida ooninne ba asttamaariya mala gidana.
41 Neeni ne ayfiyan deꞌiya hootaa beꞌakka, shin ne ishaa ayfiyan deꞌiya buuxaa ayssi xeellay?
42 Neeni ne ayfiyan deꞌiya hootaa beꞌakka, shin waanada ne ishaa, ‘Ta ishawu, taani ne ayfiyan deꞌiya buuxaa kessoo?’ gay? Shollooriyawu, koyro ne ayfiyappe hootaa kessargga; yaatikko, neeni ne ishaa ayfiyan deꞌiya buuxaa waata kessanaakko loyttada xeellana.
43 “Ayssi giikko, loꞌꞌo mittay iita ayfe ayfenna; qassi musa mittay loꞌꞌo ayfe ayfenna.
44 Ayssi giikko, mitta ubbay ba ayfiyan erettees. Leemisuwawu, asay agunttaappe balasiya woykko woyniya shiishshenna.
45 Loꞌꞌo asi ba wozanan deꞌiya loꞌꞌobaappe loꞌꞌobaa kessees, shin iita asi ba wozanan deꞌiya iitabaappe iitabaa kessees; ayssi giikko, doonay wozanaappe kiyiyabaa haasayees.
46 “Intte taani yootiyobaa oottekketa, shin yaatin ayssi tana, ‘Godawu! Godawu!’ geetii?
47 Taakko yiyanne taani yootiyobaa siyidi hegaa oottiya ooninne O malakko taani intteyyo yootana:
48 I keehi bookkidi, zaallaa bolli shuchchaa hiixxidi, keettaa keexxida ura mala. Yaanido gishshawu, shaafay kixxin goggiya haattay he keettaa sugiis, shin keettaa minttidi keexxido gishshawu haattay A qaattana danddayibeenna.
49 Shin ta yootiyobaa siyidi aynne oottenna ooninne shuchchaa hiixxennan biittaa bolli keettaa keexxida ura mala. Shaafaa haattay he keettaa sugin keettay sohuwara kunddi bayiis, qassi he keettay muleera xayiis.”
Footnotes
^ Woykko “Xoossaa sintti aattido oyttaa.”
^ Woykko “gundda.”
^ Woykko “gundda.”
^ Woykko “intte sunttaa iita giidi.”
