Maatiyosi Xaafidoogaa 1:1-25
1 Abrahaama naꞌaa, Daawita naꞌaa, Yesuus Kiristtoosa* deꞌuwabaa yootiya maxaafaa:
2 Abrahaami Yisaaqa yeliis;Yisaaqi Yaaqooba yeliis;Yaaqoobi Yihudaanne A ishantta yeliis;
3 Yihuday Tiꞌimaarippe Paareesanne Zaraaha yeliis;Paareesi Hexiroona yeliis;Hexirooni Raama yeliis;
4 Raami Aminadaaba yeliis;Aminadaabi Naꞌasoona yeliis;Naꞌasooni Salimoona yeliis;
5 Salimooni Raꞌaabippe Booꞌeeza yeliis;Booꞌeezi Uruutippe Yobeeda yeliis;Yobeedi Isseya yeliis;
6 Isseyi kawuwa Daawita yeliis.
Daawiti Ooriya machcheeppe Solomona yeliis;
7 Solomoni Robiꞌaama yeliis;Robiꞌaami Abiiya yeliis;Abiiyi Aasa yeliis;
8 Aasi Yoosaafixa yeliis;Yoosaafixi Yoraama yeliis;Yoraami Ooziyana yeliis;
9 Ooziyani Yoꞌaataama yeliis;Yoꞌaataami Akaaza yeliis;Akaazi Hizqqiyasa yeliis;
10 Hizqqiyasi Minaasa yeliis;Minaasee Amoona yeliis;Amooni Yoosiyasa yeliis;
11 Baabiloone omoodduwa wode, Yoosiyasi Yoꞌaakiinanne A ishantta yeliis.
12 Baabiloone omoodduwappe simmin, Yoꞌaakiini Salaatiyala yeliis;Salaatiyali Zarubaabeela yeliis;
13 Zarubaabeeli Abiyuuda yeliis;Abiyuudi Eliyaqiima yeliis;Eliyaqiimi Azoora yeliis;
14 Azoori Xaadooqa yeliis;Xaadooqi Akiima yeliis;Akiimi Eliyuuda yeliis;
15 Eliyuudi Elꞌꞌaazara yeliis;Elꞌꞌaazari Maataana yeliis;Maataani Yaaqooba yeliis;
16 Yaaqoobi Kiristtoosa geetettida Yesuusa yelida Mayraami azinaa Yooseefa yeliis.
17 Hegaa gishshawu, ubba yeletati hageeta: Abrahaamappe Daawita gakkanawu 14 yeleta; Daawitappe Baabiloone omoodduwa gakkanawu 14 yeleta; Baabiloone omoodduwappe Kiristtoosa gakkanawu 14 yeleta.
18 Yesuus Kiristtoosi yelettanaappe kase hanidabay hagaa. Mayraama Yooseefayyo giiga uttaasu. Shin eti azinanne machcho gididi issippe deꞌanaappe kase, A geeshsha ayyaanan* shahaaraasu.
19 Shin, Yooseefi* xillo asa gidiyo gishshawu, O asa sinttan kawushshanawu koyibeenna. Hegaa gishshawu, asi erennan O yeddanawu qoppiis.
20 I hegaa qoppi uttidaashin, Yihoowa* kiitanchchay aymuwan awu qonccidi hagaadan giis: “Yooseefaa, Daawita naꞌawu, Mayraamo ekkanawu yayyoppa;* ayssi giikko, A geeshsha ayyaanan shahaaraasu.
21 A attuma naꞌaa yelana, qassi neeni A Yesuusa* gaada sunttana; ayssi giikko, I ba asaa eta nagaraappe ashshana.”
22 Hagee ubbay tumuppe hanidaba; qassi Yihooway ba erissidobaa yootiyagaa baggaara kasetidi hagaadan gi uttiis:
23 “Geelaꞌiya shahaarada attuma naꞌaa yelana, qassi eti A Amaanuꞌeela giidi sunttana”; he sunttaa birshshettay, “Xoossay Nunaara Deꞌees” giyogaa.
24 Hegaappe simmin, Yooseefi xiskkuwappe beegottiis; qassi Yihoowa kiitanchchay yootidoogaadan, Mayraama ayyo machcho gidana mala ba soo efiis.
25 Shin A naꞌa yelana gakkanaashin iira zinꞌꞌibeenna, qassi naꞌaa Yesuusa giidi sunttiis.
Footnotes
^ Woykko “Masiya; Doorettidaagaa.”
^ Woykko “Xoossaa wolqqan.”
^ Woykko “I azinay Yoosefi.” Ayhuda wogan machcho giigissida uri machchidabadan xeelettees.
^ Giriiketto Geeshsha Maxaafaa shaahuwan Yihoowa giyo Xoossaa sunttay deꞌiyo 237 sohotuppe hagee koyruwa.
^ Woykko ‘Mayraamo ne machchiyo soo efaanawu yayyoppa.’
^ Ibraawettuwan, “Yeshuwa” giyogee “Yihooway Ashshees” giyogaa.