Maatiyosi Xaafidoogaa 2:1-23
2 Yesuusi Yihudaa Beeteliheemen yeletti simmin, Kawuwa Heeroodisa wode, maliya asati* Arshsho baggappe Yerusalaame yiidosona.
2 Eti hagaadan giidosona: “Ayhudatu kawoy awan yelettidee? Ayssi giikko, nuuni Arshsho baggan deꞌiyo wode A xoolinttiya beꞌida; yaatidi ayyo zigganawu yiida.”
3 Kawuwa Heeroodisinne Yerusalaamen deꞌiya asay ubbay hegaa siyidi shabbirettidosona.
4 I waanna kahinetanne higgiya tamaarissiyageeta ubbaa shiishshidi, Kiristtoosi* yelettana sohoy awaanakko oychchiis.
5 Eti ayyo hagaadan giidosona: “Yihudan deꞌiya Beeteliheemeena; ayssi giikko, Xoossay erissidobaa yootiyagee hagaadan giidi xaafiis:
6 ‘Nenoo, Yihudaa biittan deꞌiya Beeteliheemee, haariyagee neeppe kiyiyo gishshawu, Yihudaa haariyageetu katamatu ubbaappe neeni laafa gidakka; I ta asaa Israaꞌeela heemmana.’”
7 Hegaappe simmin, Heeroodisi maliya asata asi beꞌennan xeesidi, he xoolinttee awude beettidaakko shaakki eriis.
8 Guyyeppe, eta Beeteliheeme yeddiyo wode hagaadan giis: “Biidi he naꞌaa loytti koyite; yaatidi A demmiyo wode, taanikka baada ayyo ziggana mala yiidi taayyo yootite.”
9 Eti kawoy yootidobaa siyi simmidi, Beeteliheeme biidosona; qassi eti arshsho baggan deꞌiyo wode beꞌido xoolinttee, naꞌay deꞌiyo sohuwappe bollaara eqqana gakkanaashin eta kaalettiis.
10 Eti xoolinttee eqqidoogaa beꞌidi keehi ufayttidosona.
11 Eti soo geliyo wode naꞌaanne A aayyiyo Mayraamo beꞌidi, gulbbatidi ayyo ziggidosona. Yaatidi, worqqaanne sawiya naaꞌꞌu qommo ixaanaa* imotaa ayyo immidosona.
12 Shin, eti Heeroodisakko simmenna mala Xoossay aymuwan azazido gishshawu, hara ogiyara bantta biitti biidosona.
13 Eti bi simmin, Yihoowa kiitanchchay Yooseefawu aymuwan qonccidi hagaadan giis: “Heeroodisi naꞌaa woranawu koshshaa doommana haniyo gishshawu, naꞌaanne A aayyiyo ekkada, taani neeyyo yootana gakkanaashin Gibxxe baada yan deꞌa.”
14 Yaatiyo gishshawu, Yooseefi qammi denddidi, naꞌaanne A aayyiyo ekkidi Gibxxe biis.
15 Heeroodisi hayqqana gakkanaashin I yan deꞌiis. Hegaappe denddidaagan, Yihooway ba erissidobaa yootiyagaa baggaara, “Taani ta naꞌaa Gibxxeppe xeesaas” yaagidoogee polettiis.
16 Hegaappe guyyiyan, Heeroodisi maliya asati bana cimmidoogaa eridi hanqquwa suulliis. Yaatidi, maliyageetuppe naꞌaa layttay ay keenakko shaakki eridoogaadan, asa kiittidi, Beeteliheemeeninne hegaa heera biittatu ubban deꞌiya, naaꞌꞌu layttanne hegaappe guuxxiya attuma naata ubbaa worissiis.
17 Xoossay erissidobaa yootiya Ermmaasi odidobay he wode polettiis. I hagaadan giis:
18 “Raama kataman keehi yeekkiyogeenne zilaaliyogee siyettiis. Raaheela ba naatussi yeekkaasu; eti hayqqido gishshawu A minettennan ixxaasu.”
19 Heeroodisi hayqqido wode, Yihoowa kiitanchchay Gibxxen Yooseefawu aymuwan qoncciis.
20 Qonccidi hagaadan giis: “Naꞌaa woranawu* koyiyageeti hayqqido gishshawu, naꞌaanne A aayyiyo ekkada Israaꞌeela biitti ba.”
21 Yaatiyo gishshawu, I naꞌaanne naꞌaa aayyiyo ekkidi Israaꞌeela biitti biis.
22 Shin, Arkkelawoosi ba aawaa Heeroodisa sohuwan Yihudaa haariyogaa I siyidi, yaa baanawu yayyiis. Qassi, I bana Xoossay aymuwan azazido gishshawu, Galiilaa biitti biis.
23 Qassi, I Naazireete giyo katamaa biidi yan deꞌiis. Hegee, Xoossay erissidobaa yootiyageeti, “I Naazireete asa* geetettana” giidoogee polettana mala haniis.
Footnotes
^ Woykko “xoolintteta xeellidi kaayiya asati.”
^ Woykko “Masee; Doorettidaagee.”
^ “Karbbiyanne bootta ixaanaa.”
^ Mise, “shemppuwa.”
^ “Naazireete asa” geetettidaagee Ibraawettuwan mittay ooratta yeliyo maraara gayttidaba gidennan aggenna.
