Kiitettidaageetu Oosuwa 1:1-26
1 Tewofiloosaa, taani neeyyo Yesuusi bana Xoossay saluwa efaanaappe kase oottidobaanne tamaarissidobaa koyro maxaafan xaafaas.
2 I doorido kiitettidaageetuyyo geeshsha ayyaanaa baggaara kaaletuwa yooti simmin, Xoossay A saluwa efiis.
3 I hayqqana gakkanaashin waayetti simmidi, ammanttiya daro naqaashan I paxa deꞌiyogaa eta bessiis. Eti 40 gallassa giddon A darotoo beꞌidosona, qassi I Xoossaa Kawotettaabaa etawu yootiis.
4 I etaara shiiqido wode, eta hagaadan giidi azaziis: “Taani intteyyo yootido, Aaway immana giido imotaa naagiteppe attin, Yerusalaameppe kiyoppite;
5 ayssi giikko, Yohaannisi inttena haattan muukkiis, shin mata wode intte geeshsha ayyaanan muukettana.”
6 Qassi eti shiiqido wode A, “Godawu, ha wodiyan Israaꞌeela kawotettaa zaara essuutee?” yaagidi oychchidosona.
7 I etayyo hagaadan giis: “Aaway ba daannatettaa* garssan wottido saatiya woy wodiya intte erana koshshenna.
8 Shin geeshsha ayyaanay intte bolli wodhdhiyo wode, intte wolqqaa demmana, yaatidi Yerusalaamen, Yihudaaninne Samaariyan ubbasan, qassi kumetta saꞌan* tabaa markkattana.”
9 I hegaa yooti simmin, eti xeellishin Xoossay A pude efiis, qassi shaaray kammido gishshawu, eti A beꞌana danddayibookkona.
10 Qassi I biyo wode eti saluwa xeellishin, sohuwara bootta maayuwa maayida naaꞌꞌu asati eta matan eqqidi,
11 hagaadan giidosona: “Galiilaa asatoo, ayssi saluwa xeelliiddi eqqidetii? Xoossay saluwa efiido, inttenaara deꞌida ha Yesuusi saluwa biishin intte beꞌido hanotan simmidi yaana.”
12 Eti Yerusalaameppe darin haakkenna* Dabira Zayte giyo deriyappe Yerusalaame simmidosona.
13 Yaa gakkidi, issi keettawu bollaara deꞌiya, eti aqiyo kifiliya gelidosona. Pheexiroosi, Yohaannisi, Yaaqoobi, Inddiraasi, Piliphphoosi, Toomaasi, Barttalamoosi, Maatiyosi, Ilppiyosa naꞌay Yaaqoobi, yeemottiya Simooninne Yaaqooba naꞌay Yihuday yan deꞌoosona.
14 Hageeti ubbay amarida macca asatuura, Yesuusa aayee Mayraamiiranne A ishatuura qofan issuwa gididi, darotoo woossoosona.
15 He wode issi gallassi Pheexiroosi ishatu (he asatu ubbaa qooday 120 gidana) giddon eqqidi hagaadan giis:
16 “Asawu, ta ishatoo, Yesuusa oyqqida asata kaalettida Yihudaabaa Daawiti geeshsha ayyaanay kaalettin kasetidi odidobay polettana bessees.
17 I kase nunaara deꞌiyageetuppe issuwa, qassi nunaara issippe haggaaziis.
18 (Yaanido gishshawu, he bitanee iitabaa oottidi demmido damoozan gadiya shammiis, I kunddin A uloy xuuqqiis,* qassi A maraccee kiyiis.
19 Yerusalaamen deꞌiya asay ubbay hegaa erees; hegaa gishshawu, he gadee eta qaalan Akelddaama, hegeekka, “Suuttaa Gade” geetettiis.)
20 Ayssi giikko, Mazamuretu maxaafay, ‘A keettay ona gido, yan ooninne deꞌoppo,’ qassi, ‘I asaa heemmiyo maataa hara uri ekko’ yaagees.
21 Hegaa gishshawu, Goday Yesuusi ba oosuwa nu giddon oottiyo wode* ubban nunaara zuppetida asatuppe issuwa A sohuwan doorana bessees.
22 He bitanee Yohaannisi Yesuusa haattan muukkido wodeppe doommidi, Xoossay A nu giddoppe pude efaana gakkanaashin nunaara zuppetidanne I hayquwappe denddidoogaa nunaara marakkattiya ura gidana bessees.”
23 Hegaa gishshawu, eti naaꞌꞌata qoppidosona; hegeeti Yosxxoosakka geetettiya, Barssaaba giyo Yooseefanne Maatiyasa.
24 Yaatidi eti hagaadan giidi woossidosona: “Ubbaa wozanaa eriya Yihoowa, neeni ha asatuppe oona dooridaakko nuna bessa.
25 Yihuday aggi bayidi ba ogiya biido ha haggaazuwanne kiitettidaagaa gidiyo maataa neeni dooriyogee ekkana.”
26 Yaagidi, eti he naaꞌꞌatun saamaa yeggin, saamay Maatiyasawu kiyiis; yaatin I kiitettida 11tuura qoodettiis.*
Footnotes
^ Woykko “aawatettaa.”
^ Woykko “saꞌaa gaxaa gakkanawu.”
^ Sambbatan baana danddayiyogaa keenaa haakkees.
^ Woykko “I gidduwan xuuqqiis.”
^ Mise, “Yesuusi nu giddon geliyo wodenne kiyiyo wode.”
^ Woykko “xeelettiis.”
