Kiitettidaageetu Oosuwa 10:1-48
-
Qornneliyosi beꞌido ajjuutaa (1-8)
-
Xoossay geeshshido doꞌatubaa Pheexiroosi beꞌido ajjuutaa (9-16)
-
Pheexiroosi Qornneliyosakko biis (17-33)
-
Pheexiroosi hara biittaa asawu mishiraachchuwa yootees (34-43)
-
‘Xoossay asaa ubbaa issi ayfiyan xeellees’ (34, 35)
-
-
Hara biittaa asay geeshsha ayyaanaa ekkiisinne haattan muukettiis (44-48)
10 Qornneliyosa giyo bitanee Qiisaariyan deꞌees; I Xaaliya wotaaddaratu xeetatu halaqaa.
2 I ba soo asaa ubbaara Xoossaayyo goynniyanne ayyo yayyiya asa, qassi I hiyyeesatuyyo daro imotaa immeesinne ubbatoo wozanappe Xoossaa woossees.
3 Uddufun saate heeran, Xoossaa kiitanchchay akko gelidi, “Qornneliyosaa!” yaagishin, I ajjuutan beꞌiis.
4 Qornneliyosi A tishshi ootti xeellidi, yayyiiddi, “Godawu, taani ay oottanaadan koyay?” yaagidi oychchiis. Kiitanchchay ayyo hagaadan giis: “Ne woosaynne neeni hiyyeesata maaddanawu oottidobay Xoossaa sinttan hassayettiyaba gididi pude biis.
5 Hegaa gishshawu, asaa Yoophphe kiittada Simoonakka giyo Pheexiroosa xeesa.
6 Ha bitanee A keettay abbaa matan deꞌiyo, galbbaa qaaciya Simoona son imatta gididi* deꞌees.”
7 Ayyo yootida kiitanchchay bosaara, I baayyo haggaaziyageetuppe naaꞌꞌatanne ayyo oottanawu giigi uttida wotaaddaratuppe Xoossaayyo yayyiya issuwa xeegidi,
8 etayyo ubbabaa yootidi eta Yoophphe kiittiis.
9 Wonttetta gallassi eti ogiyara biiddi katamaa matishin, Pheexiroosi usuppun saate heeran woossanawu keettawu bollaara deꞌiya kifiliya kiyiis.
10 Shin I keehi namisettidi qumaa maanawu koyiis. Eti qumaa kattishin, I ajjuutaa beꞌiis;
11 I saloy dooyettiyogaanne oyddu gaxaa oyqqido wogga afala milatiyabay duge saꞌaa wodhdhiyogaa beꞌiis;
12 qassi oyddu gedee deꞌiyogeeti, shooshshati, zareti, saꞌan deꞌiya ubba qommo doꞌatinne saluwa kafoti an deꞌoosona.
13 Hegaappe simmin, “Pheexiroosaa, dendda, shukkada ma!” yaagiyogaa I siyiis.
14 Shin Pheexiroosi, “Akkay, Godawu, taani tunabaanne geeshsha gidennabaa ma erenna gishshawu, hegaa mule oottikke” yaagiis.
15 Naaꞌꞌanttuwan qassi, “Xoossay geeshshidobaa tuna giyogaa agga” yaagiyogaa I siyiis.
16 Heezzanttuwan hegaadan haniisinne sohuwara aybakko hegaa saluwa pude efiis.
17 I beꞌido ajjuutay aybakko Pheexiroosawu xiphphi gi uttidaashin, Qornneliyosi kiittido asati Simoona keettay awaanakko oychchidosonanne penggen eqqidosona.
18 Eti keettaawaa xeegidi, Pheexiroosakka geetettiya Simoona giyo imattay he son deꞌiyakkonne oychchidosona.
19 Pheexiroosi he ajjuutaabaa qoppiiddi deꞌishin, ayyaanay hagaadan giis: “Siya! Heezzu asati nena koyosona.
20 Hegaa gishshawu, denddada duge wodhdha; taani eta kiittido gishshawu, aynne sirennan etaara ba.”
21 Yaagin Pheexiroosi asatukko duge wodhdhidi, “Hekko, intte koyiyo taani yaas. Intte ayssi yiidetii?” yaagiis.
22 Eti hagaadan giidosona: “Wotaaddaratu halaqay Qornneliyosi kumetta Ayhuda deree loꞌꞌoban denttiyo, Xoossawu yayyiya xillo asa. Xoossay geeshsha kiitanchchaa kiittidi, I nena ba soo xeeganaadaaninne neeni yootiyobaa siyanaadan A azaziis.”
23 Hegaa gishshawu, I eta soo gelissidi ba imatta oottidi mokkiis.
Wonttetta gallassi I denddidi etaara biis, qassi Yoophphe ishatuppe amaridaageeti aara biidosona.
24 Kaalliya gallassi I Qiisaariya geliis. Qornneliyosi ba dabbotanne ba mata laggeta xeesi shiishshidi eti yaanaagaa naagees.
25 Pheexiroosi soo gelin, Qornneliyosi aara gayttidi A tohuwan kunddiisinne ayyo goynniis.*
26 Shin Pheexiroosi, “Dendda, taanikka asa” yaagidi, A pude denttiis.
27 Pheexiroosi aara haasayiiddi giddo geliyo wode, daro asay shiiqidaagaa beꞌiis.
28 I etayyo hagaadan giis: “Ayhuda asi hara biittaa asaara zuppetiyogee woy A soo biyogee woga gidennaagaa loytti ereeta, shin taani ay asanne tuna woy geeshsha gidenna gaana bessennaagaa Xoossay tana bessiis.
29 Yaatin, taani yaanaadan intte kiittido wode aynne sirennan yaas. Hegaa gishshawu, taani yaanaadan intte ayssi kiittidaakko ane yootite.”
30 He wode Qornneliyosi hagaadan giis: “Oyddu gallassappe kase ha saatiyan, uddufun saate heeran, ta son woossishin waciwaciya maayuwa maayida issi bitanee ta sinttan eqqidi,
31 hagaadan giis: ‘Qornneliyosaa, Xoossay ne woosaa siyiis, qassi neeni hiyyeesata maaddanawu oottidobaa hassayiis.
32 Hegaa gishshawu, asaa Yoophphe kiittada Simoonakka giyo Pheexiroosa xeesa. Ha bitanee A keettay abbaa matan deꞌiyo galbbaa qaaciya Simoona son imatta gidi deꞌees.’
33 I yaagin taani sohuwara neekko kiittaas, qassi neeni yiido gishshawu nena keehi galatays. Hegaa gishshawu, haꞌꞌi neeni yootanaadan Yihooway azazidobaa siyanawu Xoossaa sinttan nuuni ubbay shiiqi uttida.”
34 He wode Pheexiroosi haasayiyogaa doommidi hagaadan giis: “Xoossay asaa ubbaa issi ayfiyan xeelliyogaa taani haꞌꞌi tumu akeekaas,
35 qassi biitta ubban ayyo yayyiyanne suurebaa oottiya uri A ufayssees.
36 I Yesuus Kiristtoosa baggaara sarotettaa mishiraachchuwa Israaꞌeela naatuyyo odiyogan ba qaalaa etayyo kiittiis, qassi Yesuusi ubbaa Godaa.
37 Haattan muukettiyogaabaa Yohaannisi asawu yooti simmin, Galiilaappe doommidi Yihudaa biittan ubbasan odettiyabaa intte ereeta.
38 He odettiyabay Naazireete Yesuusabaa. Xoossay A geeshsha ayyaanan dooriisinne wolqqaa ayyo immiis, qassi Xoossay aara deꞌiyo gishshawu, I biyosan ubban loꞌꞌobaa oottiisinne Dabloosi naaqqidoogeeta ubbaa pattiis.
39 Qassi I Ayhudati deꞌiyo katamatuuninne Yerusalaamen oottidobawu ubbawu nuuni markka; shin eti A mittan kaqqidi woridosona.
40 Xoossay heezzantto gallassi A hayquwappe denttidi asay beꞌanaadan oottiis.
41 Xoossay A beꞌanaadan oottidoogeeti I hayquwappe denddi simmin aara miidanne uyida, Xoossay kasetidi sunttido markkata nunappe attin, asaa ubbaa gidenna.
42 Qassi paxa deꞌiyageetunne hayqqidaageetu daanna gidanaadan Xoossay sunttidoogee A gidiyogaa nuuni asaayyo yootanaadaaninne poli markkattanaadan I nuna azaziis.
43 Xoossay A ammaniya ubbaa nagaraa A sunttan atto gaanaagaa, Xoossay erissidobaa yootiya ubbati markkattidosona.”
44 Pheexiroosi hegaa yootiiddi deꞌishin, Xoossaa qaalaa siyiya ubbaa bolli geeshsha ayyaanay wodhdhiis.
45 Qassi Xoossay immiyo geeshsha ayyaanay hara biittaa asaa bollikka gukkido gishshawu, Pheexiroosaara biida qaxxarettida ammaniya* asati malaalettidosona.
46 Ayssi giikko, eti he asati dumma dumma qaalaa* haasayiyogaanne Xoossaa sabbiyogaa siyidosona. Yaatin Pheexiroosi hagaadan giis:
47 “Ha asati nunadan geeshsha ayyaanaa ekkidosona; yaatin eti haattan muukettennaadan diggana danddayiyay oonee?”
48 Yaagidi, eti Yesuus Kiristtoosa sunttan haattan muukettanaadan azaziis. Hegaappe simmin, guutta wodiya takkanaadan eti A woossidosona.
Footnotes
^ Woykko “Simooni ba son mokkin.”
^ Woykko “ziggiis.”
^ Woykko “ammanettida.”
^ Mise, “inxxarssaa.”
