Kiitettidaageetu Oosuwa 11:1-30
11 Yihudan deꞌiya kiitettidaageetinne ishati hara biittaa asatikka Xoossaa qaalaa ammanidoogaa siyidosona.
2 Pheexiroosi Yerusalaame biido wode, qaxxaraa higgiya mintti naagiyageeti aara palamettiyogaa doommidosona;
3 eti, “Neeni qaxxarettibeenna asatu soo gelada etaara qumaa maadasa” yaagidosona.
4 Yaagin, Pheexiroosi hagaadan giidi etayyo ubbabaa qonccissiis:
5 “Taani Yoophphe kataman Xoossaa woossaydda issi ajjuutaa beꞌaas; he ajjuutan oyddu gaxaa oyqqido wogga afala milatiyabay saluwappe duge wodhdhidi taakko yiis.
6 Taani A giddo loytta xeellada oyddu gedee deꞌiyogeeta, shooshshata, zareta, saꞌan deꞌiya ubba qommo doꞌatanne saluwa kafota beꞌaas.
7 Tana, “Pheexiroosaa, dendda, shukkada ma!” yaagiyogaakka siyaas.
8 Shin taani, ‘Akkay, Godawu, taani tunabaa woy geeshsha gidennabaa ma erenna gishshawu, hegaa mule oottikke’ yaagaas.
9 Naaꞌꞌanttuwan qassi saluwappe, ‘Xoossay geeshshidobaa tuna giyogaa agga’ yaagiyogaa siyaas.
10 Heezzanttuwan, hegaadan haniisinne aybakko he ubbabaa saluwa pude efiis.
11 Qassi he wode, Qiisaariyappe taakko kiitettidi yiida heezzu asati nuuni deꞌiyo keettaa gakkidosona.
12 Hegaappe guyyiyan, taani aynne sirennan etaara baanaadan ayyaanay taayyo yootiis. Shin ha usuppun ishatikka tanaara biidosona, qassi nuuni he bitaniya soo gelida.
13 “I ba son kiitanchchaa waati beꞌidaakko nuuyyo yootiis, qassi kiitanchchay ayyo hagaadan giis: ‘Asaa Yoophphe kiittada Simoonakka giyo Pheexiroosa xeesa;
14 yaatin, neeninne ne keettaa asay waanidi attana danddayiyakko I neeyyo yootana.’
15 Shin taani haasayaa doommiyo wode, geeshsha ayyaanay koyro nu bolli wodhdhidoogaadan eta bollikka wodhdhiis.
16 Goday, ‘Yohaannisi asaa haattan muukkiis, shin intte geeshsha ayyaanan muukettana’ yaagidoogaa taani he wode hassayaas.
17 Hegaa gishshawu, Xoossay Godaa Yesuus Kiristtoosa ammanida nuuyyo coo immidobaa etayyokka immi uttidaashin, I ba shenedan oottennaadan digganawu* taani oonee?”
18 Eti hegaa siyido wode, sirphphi giidosona, qassi, “Simi yaanikko, Xoossay hara biittaa asaykka deꞌuwa demmana mala zilꞌꞌettidi laamettanaadan koyees” yaagidi Xoossaa sabbidosona.
19 Isxxifaanoosi hayqqi simmin denddida waayiya gaasuwan laalettidaageeti haray atto Pinqqe, Qophiroosanne Anxxookiyakka gakkidosona, shin eti Ayhudatu xalaalawu mishiraachchuwa yootidosona.
20 Shin hegeetuppe amaridaageeti Qophphiroosappenne Qareenappe Anxxookiya biidi, Giriikettuwa haasayiya asatussi Godaa Yesuusa mishiraachchuwa yootiiddi eta haasayissiyogaa doommidosona.
21 Hegaa bollikka, Yihoowa kushee etaara deꞌees, qassi daro asay ammanidi Godaa kaalliis.
22 Yerusalaamen deꞌiya galchchay etabaa siyiis; eti siyidi Barnnaabaasa Anxxookiya kiittidosona.
23 I yaa gakkidi laggetiyabi baynna Xoossaa kehatettaa beꞌido wode, keehi ufayttiis, qassi eti wozanappe murttidi Godaa baqqi oyqqidi deꞌanaadan eta ubbaa minttettiyogaa doommiis.
24 Barnnaabaasi geeshsha ayyaanaynne ammanoy an eellido loꞌꞌo asa. Hegaappe denddidaagan, daro asay Godaa ammaniis.
25 Hegaa gishshawu, I Saaꞌoola awankka ashshennan koyanawu Xarsseese biis.
26 I Saaꞌoola demmi simmidi, A Anxxookiya efiis. Yaatin eti issi laytta kumettaa yan deꞌiya galchchan ishatuuranne michchotuura shiiqidosonanne daro asaa tamaarissidosona, qassi Yesuusa kaalliyageeti Xoossay kaalettin Kiristtaaneta koyro geetettidoy Anxxookiyana.
27 He wode Xoossay erissidobaa yootiyageeti Yerusalaameppe Anxxookiya wodhdhidosona.
28 Agaaboosa giyo etappe issoy kumetta biittan wolqqaama koshay denddana haniyogaa geeshsha ayyaanay maaddin yootiis; he koshay Qalawudeyosi haariyo wode denddiis.
29 Hegaa gishshawu, Yesuusa kaalliyageeti huuphiyan huuphiyan danddayidoogaa keena maaduwa* Yihudan deꞌiya ishatuyyo kiittanawu maacidosona.
30 Eti he maaduwa Barnnaabaasanne Saaꞌoola kushiyan cimatuyyo kiittidosona.
