Kiitettidaageetu Oosuwa 12:1-25
12 He wode kawoy Heeroodisi galchchan deꞌiya amaridaageeta naaqqiyogaa doommiis.
2 I Yohaannisa ishaa Yaaqooba bisuwan worissiis.
3 I hegee Ayhudata ufayssidoogaa beꞌidi, Pheexiroosakka oyqqiis. (Oyttaa Baalaa wode hegee haniis.)
4 I Pheexiroosa oyqqidi, Paasikaappe simmin A asaa sintti kessanawu,* oyddu oyddu wotaaddarati oyddu kayan naaganaadan etawu aatti immidi A qashissiis.
5 Yaatin Pheexiroosa qachchi wottidosona, shin galchchay sheekkidi ayyo wozanappe Xoossaa woossees.
6 Heeroodisi A kessanaappe kase qammi Pheexiroosi naaꞌꞌu sanssalatan qashettidi naaꞌꞌu wotaaddaratuppe gidduwan xiskkiis, qassi penggiyappe sintta baggan deꞌiya zabeti qasho keettaa naagoosona.
7 Shin he wode Yihoowa kiitanchchay yan eqqiis, qassi Pheexiroosi deꞌiyo kifiliyan pooꞌoy pooꞌiis. I Pheexiroosa miyyiya baqqidi, “Eesuwan dendda!” yaagidi A denttiis. Qassi sanssalatati A kushiyappe saꞌan wodhdhidosona.
8 Kiitanchchay A, “Gixxada ne caammaa wotta” yaagiis. Pheexiroosi hegaadan oottiis. Wurssettan I Pheexiroosa, “Ne afalaa maayada tana kaalla” yaagiis.
9 Pheexiroosi kare kiyidi A kaalliis, shin kiitanchchay oottidobay tuma gidiyogaa I eribeenna. I ajjuutaa beꞌaas giidi qoppiis.
10 Eti naaguwa santtariyyeta koyroogaanne naaꞌꞌanttoogaa kanttidi katamaa kiyiyo birata penggiya gakkidosona, yaatin he penggee eta sinttan bawu dooyettiis. Eti kiyidi issi ogiyara duge wodhdhidosona, qassi kiitanchchay sohuwara appe shaahettiis.
11 Yaanin Pheexiroosi haniiddi deꞌiyabaa akeekidi hagaadan giis: “Yihooway ba kiitanchchaa kiittidi Heeroodisa kushiyappenne Ayhudati hanana giidi naagido ubbabaappe tana ashshidoogaa haꞌꞌi eraas.”
12 I hegaa akeeki simmidi, Marqqoosakka giyo Yohaannisa aayee Mayraami soo biis; yan daroti shiiqidi woossoosona.
13 I penggiya qoxxin, Roodo giyo danggiriixiya I oonakko beꞌanawu baasu.
14 A Pheexiroosa cenggurssaa shaakka erada keehi ufayttido gishshawu penggiya dooyabeykku, shin guyye woxxa gelada Pheexiroosi penggen eqqidoogaa yootaasu.
15 Eti O, “Neeni baqettayiyye?” yaagidosona. Shin Pheexiroosi yiidoogaa A zaara zaarada yootaasu. Eti, “Yaanikko hegee A kiitanchchaa” yaagidosona.
16 Shin Pheexiroosi penggiya qoxxiiddi yan takkiis. Eti penggiya dooyiyo wode, A beꞌidi malaalettidosona.
17 Shin eti coꞌꞌu gaanaadan I ba kushiyan bessidi Yihooway A qasho keettaappe waati kessidaakko etayyo ubbabaa yootiis, qassi, “Ha ubbabaa Yaaqoobayyonne hara ishatuyyo yootite” yaagiis. Yaagi simmidi, kiyidi harasaa biis.
18 Saꞌay wonttiyo wode, Pheexiroosi waani xayideeshsha giidi wotaaddarati shabbirettidosona.
19 Heeroodisi awankka ashshennan A koyikkonne demmibeenna gishshawu, zabeta iisetti oychchiisinne eta efiidi qaxxayana mala azaziis; I yaatidi Yihudaappe Qiisaariya wodhdhidi yan amarida wodiya takkiis.
20 Heeroodisi Xiiroosanne Sidoona asan keehi yiillotiis.* He biittaa asay I haariyo biittaappe kattaa shammees. Hegaa gishshawu, eti issi wozanan yiidi, kawuwa keettan* aawatettay imettido Bilasxxoosi banttana maaddana mala woossidosona, yaatidi kawuwara sigettanawu A haasayissidosona.
21 Issi gallassi asay shiiqidaashin Heeroodisi kawo maayuwa maayidi pirddiyo sohuwan uttidi asaayyo haasayiyogaa doommiis.
22 Yaatin shiiqida asay ba qaalaa xoqqu oottidi, “Ha haasayay xoossabappe attin, asaba gidenna!” yaagiis.
23 I Xoossaa bonchchibeenna gishshawu, sohuwara Yihoowa kiitanchchay I hargganaadan oottin, guxuniyan meetettidi hayqqiis.
24 Shin Yihoowa qaalay aakki aakkidi biisinne daro asay ammaniis.
25 Barnnaabaasinne Saaꞌooli ishati maaddanawu yeddidobaa Yerusalaame gatti simmidi, Marqqoosakka giyo Yohaannisaara Anxxookiya simmidosona.
Footnotes
^ Woykko “oyshan paaccanaassi kessanawu.”
^ Woykko “asaara ooyettiis.”
^ Mise, “hiitta kifliyan.”
