Kiitettidaageetu Oosuwa 13:1-52
13 Anxxookiya galchchan Xoossay erissidobaa yootiyageetinne asttamaareti deꞌoosona; eti Barnnaabaasa, Nigera giyo Simoona, Qareena Luqiyosa, issi biittaa haariya Heeroodisaara tamaarida Minaahanne Saaꞌoola.
2 Eti Yihoowayyo haggaazishiininne* xoomishin, geeshsha ayyaanay, “Taani eta xeesido issi oosuwawu Barnnaabaasanne Saaꞌoola taayyo doorite” yaagiis.
3 Yaatin eti xoomidoogaappenne woossidoogaappe guyyiyan, bantta kushiya eta bolli wotti simmidi moyssidosona.
4 Hegaa gishshawu, Xoossay ba geeshsha ayyaanaa baggaara kiittido he asati Selewuqiya wodhdhidosona, yaatidi yaappe markkabiyan Qophphiroosa biidosona.
5 Eti Silmmaana gakkido wode, shiiqo keettan Ayhudatuyyo Xoossaa qaalaa yootiyogaa doommidosona. Eta maaddiya Yohaannisikka etaara deꞌees.
6 Eti he haruuruwan ubbasaa biiddi Phaafu gakkidi, Bar-Yesuusa giyo bitiyanne Xoossay erissidobaa yootays giya worddanchcha Ayhuda bitaniyara gayttidosona.
7 I Qophphiroosa haruuruwa haariya* eranchcha bitaniya Sarggiyos Phawuloosayyo oottees. Sarggiyos Phawuloosi Xoossaa qaalaa siyanawu keehi koyido gishshawu, Barnnaabaasanne Saaꞌoola baakko xeegiis.
8 Shin he bitiyagee (A sunttay hegaadan birshshettees) Eliimaasi, Sarggiyos Phawuloosi Godaa ammanennaadan digganawu koyidi, eti yootiyobaa phalqqiyogaa doommiis.
9 Yaatin Phawuloosakka geetettiya Saaꞌooli banan geeshsha ayyaanay eellin, A tishshi ootti xeellidi,
10 hagaadan giis: “Balibakkoynne iitatettay ubbay nenan eellido ha bitaniyawu, Dabloosa naꞌawu, geeshshabaa ubbaa morkkiyawu, Yihoowa suure ogiya geellayiyogaa aggikkii?
11 Siya! Yihooway ba kushiya ne bolli denttiis, qassi neeni qooqada amarida wodiyawu awaa pooꞌuwa beꞌennan takkana.” Sohuwara A ayfee ciggaaraa maayidi xumin, I bana kaalettanaadan yaa haa asa koyiyogaa doommiis.
12 Yaatin, Sarggiyos Phawuloosi Yihoowabaa tamaaridoban malaalettido gishshawu, hanidabaa beꞌidi Godaa ammaniis.
13 Phawuloosinne A laggeti markkabiyan gelidi Phaafuppe denddidosona. Yaatidi Phinifiliyan deꞌiya Phergge gakkidosona. Shin Yohaannisi etappe shaahettidi Yerusalaame biis.
14 Gidikkonne, eti Pherggeppe denddidi Phisddiyan deꞌiya Anxxookiya biidosona. Qassi Sambbata gallassi shiiqo keettaa gelidi uttidosona.
15 Higgeenne Xoossay erissidobaa yootiyageeti xaafidobay asaayyo nabbabetti simmin, shiiqo keettan kaalettiyageeti eta, “Asawu, ta ishatoo, intte asaa minttettiyobi deꞌikko, yootite” yaagidosona.
16 Hegaa gishshawu, Phawuloosi denddi eqqidi, eti coꞌꞌu gaanaadan ba kushiyan bessidi hagaadan giis:
“Israaꞌeela asatoonne Xoossawu yayyiya hara asatoo, siyite.
17 Israaꞌeela asaa Xoossay nu mayzza aawata dooriis, qassi asay Gibxxen hara biittaa asa gididi deꞌiyo wode eta xoqqu xoqqu oottiisinne ba mino kushiyan eta yaappe kessiis.
18 Qassi I 40 gidiya layttawu bazzuwan eta danddayiis.
19 I Kanaane biittan deꞌiya laappun dereta xayssi simmidi, nu mayzza aawata eta biittaa laatissiis.
20 Ha ubbabay hananaashin 450 gidiya layttay aadhdhiis.
“Hegaappe simmin, Xoossay I erissidobaa yootiya Sameela gakkanaashin etayyo daannata denttiis.
21 Shin hegaappe guyyiyan, eti kawo kawoyanaadan oychchin, Xoossay 40 layttawu Biniyama yaraappe Qiisa naꞌaa Saaꞌoola etawu immiis.
22 Xoossay A diggirggidi, I abaa markkattido Daawita denttidi etayyo kawoyiis; Xoossay, ‘Ta wozanaa ufayssiya Daawita, Isseya naꞌaa demmaas; I taani koyiyobaa ubbaa oottana’ yaagiis.
23 Xoossay qaalaa gelidoogaadan, Israaꞌeela ashshiya Yesuusa ha bitaniya zerettaappe denttiis.
24 Yesuusi yaanaappe kase, Israaꞌeela asay ubbay zilꞌꞌettidi laamettidoogaa bessanawu haattan muukettana mala Yohaannisi etawu yootiis.
25 Shin Yohaannisi ba haggaazaa wurssana haniyo wode, darotoo hagaadan gees: ‘Tana A giidi qoppeetii? Taani A gidikke, shin I taappe simmin yees, qassi taani A caammaa kessanawukka bessikke.’
26 “Asawu, ta ishatoo, Abrahaama naatoonne Xoossawu yayyiya hara asatoo, ha atotettaa qaalay nuuyyo kiitettiis.
27 Yerusalaamen deꞌiya asaynne eta kaalettiyageeti he ashshiyagaa ekkibookkona, shin eti A bolli pirddido wode, sambbata ubban asaayyo nabbabettiya, Xoossay erissidobaa yootiyageeti odidobaa polidosona.
28 Eti A worissiyaba aybanne demmana xayikkonne, Philaaxoosi A worissanaadan oychchidosona.
29 Qassi eti abaa xaafettida ubbabaa polido wode, A anhaa* mittaappe duge wottidi duufuwan wottidosona.
30 Shin Xoossay A hayquwappe denttin,
31 Galiilaappe Yerusalaame aara biidaageeti A daro gallassi beꞌidosona. Hegeeti haꞌꞌi asaayyo abaa markkattoosona.
32 “Hegaa gishshawu, Xoossay nu mayzza aawatuyyo immana giidobaa mishiraachchuwa nuuni intteyyo yootoos.
33 Xoossay Yesuusa hayquwappe denttiyogan, hegaa nuussi eta naatussi muleera poliis; hegee naaꞌꞌantto mazamuriyan, ‘Neeni ta naꞌaa; taani hachchi ne aawaa gidaas’ geetettidaagaadan haniis.
34 Qassi I zaarettidi mule musennaadan* hayquwappe A denttidoogaa, Xoossay hagaadan giidi yootiis: ‘Taani immanawu Daawitayyo ammanettiya qaalaa gelido tasenna siiquwa intteyyo immana.’
35 Qassi hara mazamuriyan, ‘Neeyyo ammanettiyagee musanaadan koyakka’ geetettiis.
36 Shin Daawiti ba deꞌo layttan Xoossay koyiyobaa* oottiis, hayqqiis,* ba mayzza aawatuura moogettiisinne musiis.
37 Gidoppe attin, Xoossay hayquwappe denttidoogee musibeenna.
38 “Ishatoo, yaanikko hagaa erite, nagaray A baggaara atto geetettiyogee intteyyo odettiiddi deꞌees,
39 qassi Muuse Higgiyan intte mooribeekketa geetettana danddayenna ubbaban, ammaniya ubbay Yesuusa baggaara moorabaakka geetettees.
40 Hegaa gishshawu, Xoossay erissidobaa yootiyageeti odidobay inttena gakkenna mala naagettite:
41 ‘Inttenoo, qilliiciyageetoo, ooninne intteyyo ubbabaa yootiyakkonne intte mule ammanenna oosuwa taani intte wodiyan oottaydda deꞌiyo gishshawu, hegaa beꞌidi malaalettitenne xayite.’”
42 Eti kare kiyiyo wode, kaalliya Sambbatankka he yohota yootanaadan asay eta woossiis.
43 Hegaa gishshawu, asay shiiqo keettaappe kiyi simmin, daro Ayhudatinne Xoossaayyo goynniya, ammanuwa laammidi Ayhuda gidida daroti Phawuloosanne Barnnaabaasa kaallidosona; eti asaara haasayiiddi, Xoossaa gita kehatettay bessiyogeeta gididi deꞌanaadan eta zoridosona.
44 Kumetta katamaa gidiyagaa keena asay Yihoowa qaalaa siyanawu kaalliya Sambbatan shiiqiis.
45 Ayhudati cora asaa beꞌido wode, keehi qanaatidi Phawuloosi yootiyobaa phalqqiyogaa doommidosona, yaatidi Xoossaa bonchchennaagaa bessidosona.
46 Phawuloosinne Barnnaabaasi xalidi etayyo hagaadan giidosona: “Xoossaa qaalay koyro intteyyo odettana bessees. Shin intte siyanawu koyekketa, qassi inttena merinaa deꞌoy bessiyo asadan xeellekketa. Siyite! nuuni hara biittaa asawu yootana.
47 Ayssi giikko, Yihooway nuna, ‘Intte saꞌaa gaxaa gakkanaashin atotettaa oge gidana mala, taani inttena hara biittaa asawu pooꞌo oottada sunttaas’ yaagidi azaziis.”
48 Hara biittaa asati hegaa siyido wode, ufayttidosonanne Yihoowa qaalaa sabbidosona, qassi merinaa deꞌuwawu suure xeelay deꞌiyogeeti ubbay ammanidosona.
49 Hegaa bollikka, he biittan ubbasan asay Yihoowa qaalaabaa haasayees.
50 Shin Ayhudati Xoossaayyo yayyiya wogo macca asatanne kataman deꞌiya erettida attuma asata Phawuloosanne Barnnaabaasa bolli denttettidosona; yaatidi eta naaqqidosonanne bantta biittaappe kessidosona.
51 Hegaa gishshawu, eti bantta tohuwappe buhiya shocidi* Iqooniyone biidosona.
52 Qassi Yesuusa kaalliyageetun ufayssaynne geeshsha ayyaanay eelliyogaa aggibeenna.
Footnotes
^ Woykko “Yihoowayyo asaa haggaazishiininne.”
^ Beni Rooman ‘prokonsil’ geetettees.
^ Woykko “A.”
^ Woykko “moorettennaadan.”
^ Woykko “Xoossaayyo.”
^ Mise, “xiskkiis.”
^ Tohuwappe buhiya shociyogee bessiyabaa oottidoogaa qonccissiyaba.
