Kiitettidaageetu Oosuwa 14:1-28
14 Eti Iqooniyonen Ayhudatu shiiqo keettaa issippe gelidi Ayhudatuppekka Giriiketuppekka keehi daro asay ammananaadan oottidi yootidosona.
2 Shin ammanibeenna Ayhudati hara biittaa asay* yiillotanaadaaninne ishatu bolli denddanaadan oottidosona.
3 Yaatin eti laggetiyabi baynna ba kehatettaa qaalaa minttida Yihooway immido maatan xalidi yootiiddi, daro wodiya yan takkidosona. I eta baggaara malaatatinne malaaliyabati oosettanaadan eeno giis.
4 Shin he kataman deꞌiya cora asay shaahettiis; amaridaageeti Ayhudatu bagga gidin, harati qassi kiitettidaageetu bagga gididosona.
5 Hara biittaa asatinne Ayhudati banttana kaalettiyageetuura issippe eta kawushshanawunne shuchchan caddanawu malido wode,
6 eti hegaa eridi, Liqaaꞌooniya, Lisxxiranne Darbbe katamatanne he katamatu matan deꞌiya heeraakka biidosona.
7 Eti yankka mishiraachchuwa yootidosona.
8 He wode, gundda gididi yelettida, hemettana danddayenna issi bitanee Lisxxiran deꞌees.
9 He bitanee Phawuloosi yootiyobaa uttidi siyees. Phawuloosi A tishshi ootti xeellidi, he bitanee I yootiyobaa ammaniyogaanne paxanaagaa ammanettidoogaa akeekidi,
10 ba qaalaa xoqqu oottidi, “Dendda eqqa” yaagiis. Yaagin bitanee shuttu giisinne hemettiyogaa doommiis.
11 Asay Phawuloosi oottidobaa beꞌido wode, Liqaaꞌoonettuwan bantta qaalaa xoqqu oottidi, “Asa milatidi xoossati nuukko yiidosona!” yaagidosona.
12 Qassi eti Barnnaabaasa Zuusa giyogaanne Phawuloosi daro haasayido gishshawu, A Hermmeesa giyogaa doommidosona.
13 Katamaa geliyosan garoy deꞌiyo Zuusa giyo xoossaa kahinee booratanne irzzo mala ciishshata katamaa pengge efiidi asaara issippe yarshshanawu koyiis.
14 Shin kiitettidaageeti Barnnaabaasinne Phawuloosi hegaa siyido wode, bantta maayuwa daakkidi woxxiiddi asaa giddo biidi, bantta qaalaa xoqqu oottidi hagaadan giidosona:
15 “Ha asawu, intte hagaa ayssi ootteetii? Nuunikka inttenadan waayettiya asa. Qassi intte ha hadabata aggidi, saluwa, saꞌaa, abbaanne eta giddon deꞌiya ubbabaa medhdhida, merinawu deꞌiya Xoossaayyo goynnana mala, nuuni intteyyo mishiraachchuwa yootoos.
16 Kase yeletaa wode, I asay ubbay koyidobaa oottennaadan diggibeenna,
17 shin I intteyyo saluwappe iraa bukissidi, bessiya wodiyan kattay loytti ayfanaadaaninne intte kalli miidi ufayttanaadan oottidi, loꞌꞌobaa oottiyogan I ay mala Xoossakko bessiis.”
18 Eti he ubbabaa yootikkonne, keehi baaxetidi asay etayyo yarshshennaadan diggidosona.
19 Shin Ayhudati Anxxookiyappenne Iqooniyoneppe yiidi asaa denttettidosona; yaatin eti Phawuloosa shuchchan caddidi, hayqqiis gi qoppidi katamaappe goochchi kessidosona.
20 Gidikkonne, Yesuusa kaalliyageeti Phawuloosa mati shiiqido wode, I denddiis, yaatidi katamaa geliis. Wonttetta gallassi I Barnnaabaasaara Darbbe biis.
21 Eti mishiraachchuwa yootidinne daro asay Yesuusa kaallanaadan maaddi simmidi, Lisxxira, Iqooniyonenne Anxxookiya biidosona.
22 Yan eti Yesuusa kaalliyageeta* minttettidosonanne eti ammanuwan minnana mala hagaadan giidi zoridosona: “Nuuni Xoossaa Kawotettaa gelanaappe kase daro waayettidi kanttana bessees.”
23 Hegaa bollikka, eti woossidinne xoomidi, galchchatu ubban cimata dooridosona, qassi eti aani ammaniyageeta gidido Yihoowayyo eta sheedhdhidosona.
24 Hegaappe guyyiyan, eti Phisddiya biittaara kanttidi Phinifiliya biidosona,
25 qassi Pherggen Xoossaa qaalaa yooti simmidi, Axaaliya wodhdhidosona.
26 Eti yaappe denddidi, haꞌꞌi ootti wurssido oosuwawu Xoossay laggetiyabi baynna ba kehatettaa bessanaadan ishati eta awu sheedhdhido Anxxookiya katamaa biidosona.
27 Eti yaa gakkidi galchchaa issippe shiishshido wode, Xoossay eta baggaara oottido darobaanne I hara biittaa asawu ammanuwa penggiya dooyidoogaa yootidosona.
28 Yaatidi eti Yesuusa kaalliyageetuura unddenna wodiya takkidosona.
