Kiitettidaageetu Oosuwa 15:1-41
-
Anxxookiyan qaxxaraara gayttidaagan palamettidosona (1, 2)
-
Yohuwa Yerusalaame efiidosona (3-5)
-
Cimatinne kiitettidaageeti issippe shiiqidosona (6-21)
-
Oosuwa kaalettiya citaa dabddaabbiya (22-29)
-
Suuttaappe teqettite (28, 29)
-
-
Dabddaabbee galchchata minttettiis (30-35)
-
Phawuloosinne Barnnaabaasi shaahettidi biidosona (36-41)
15 Issi issi asati Yihudaappe wodhdhidi, “Intte Muuse wogaadan qaxxarettana xayikko attana danddayekketa” yaagidi, ishata tamaarissiyogaa doommidosona.
2 Shin Phawuloosinne Barnnaabaasi etaara keehi yootettinne palametti simmin, eti hara amarida ishatuura Yerusalaamen deꞌiya kiitettidaageetukkonne cimatukko biidi he yohuwabaa* yootana mala, ishati eta kiittanawu maacidosona.
3 Galchchay eta amarida ogiya moyssi simmin, eti hara biittaa asay waani laamettidaakko ubbabaa yootiiddi Pinqqe biittaaranne Samaariya biittaara aadhdhidosona, qassi ishati ubbay hegaa siyidi keehi ufayttidosona.
4 Eti Yerusalaame gakkin, galchchay, kiitettidaageetinne cimati eta mokki ekkidosona; yaatin eti bantta baggaara Xoossay oottido darobaa yootidosona.
5 Shin Parisaawetu timirttiya kaalliyageetuppe Yesuus Kiristtoosa ammanida issoti issoti uttosaappe denddidi, “Eta qaxxarananne Muuse Higgiya naaganaadan azazana bessees” yaagidosona.
6 Hegaa gishshawu, kiitettidaageetinne cimati ha yohuwa pilggi xeellanawu shiiqidosona.
7 Keehi palametti simmin, Pheexiroosi denddidi etayyo hagaadan giis: “Asawu, ta ishatoo, hara biittaa asay ta doonaappe mishiraachchuwa siyidi ammanana mala, daro layttaappe kase Xoossay tana intte giddoppe dooridoogaa intte loytti ereeta.
8 Qassi wozanaa eriya Xoossay nuuyyo immidoogaadan, etayyokka geeshsha ayyaanaa immidi, etan ufayttidoogaa bessiis.
9 I ammanuwan eta wozanaa geeshshiisippe attin, etappenne nuuppe gidduwan zagaa wottibeenna.
10 Yaatin nu mayzza aawatikka nuunikka tookkana danddayibeenna qambbaraa Yesuusa kaalliyageetu morggiyan wottidi, Xoossaa ayssi paacceetii?
11 Shin etikka nuugaadan laggetiyabi baynna Godaa Yesuusa kehatettan attidoogaa ammanoos.”
12 He wode eti ubbay sirphphi giidi, Barnnaabaasinne Phawuloosi Xoossay eta baggaara hara biittaa asaa giddon oottido daro malaatatanne malaaliya darobata yootiyo wode siyiyogaa doommidosona.
13 Eti yootidi wurssi simmin, Yaaqoobi hagaadan giis: “Asawu, ta ishatoo, siyite.
14 Xoossay hara biittaa asaa giddoppe ba sunttan xeegettanaadan asaa dooriyogaa doommidi, eta waati hassayidaakko Simooni loytti yootiis.
15 Hagee Xoossay erissidobaa yootiyageeti xaafidobaara maayees; he sohuwan hagaadan gees:
16 ‘Ha ubbabaappe guyyiyan, taani simma yaada kunddida Daawita keettaa* pude denttana; laalettida he keettaa taani zaarettada keexxananne giigissana,
17 attiya asati hara ubba biittaa asaara Yihoowa wozanappe koyanaadan taani hegaa oottana; qassi ha ubbabaa oottiya Xoossay Yihooway eti A sunttan xeegettanaagaa yootiis;
18 ha ubbabay daro wodeppe kase erettiis.’
19 Hegaa gishshawu, taani hagaadan qoppaas:* Xoossaayyo goynniyogaa doommiya hara biittaa asaa wayssennaadan,
20 shin eeqaa goynuwara gayttida aybippenne, pokkiya tuna nagaraappe,* sulettidabaappenne* suuttaappe teqettanaadan etayyo xaafana mala qoppaas.
21 Beniisappe doommidi katamatu ubban sambbatan sambbatan shiiqo keettatun Muuse maxaafati nabbabettiyo gishshawu, he maxaafatuppe yootiyageeti deꞌoosona.”
22 Hegaappe guyyiyan, kiitettidaageetinne cimati ishatu giddoppe naaꞌꞌata dooridi Anxxookiya kiittanawu maacidosona. Kumetta galchchaykka hegaa maayiis. Yaatin, ishatu giddon gita aawatettay deꞌiyo Barssaaba giyo Yihudaanne Sillaasa Phawuloosaaranne Barnnaabaasaara kiittidosona.
23 Eti hagaadan gi xaafidi eta bolli kiittidosona:
“Nuuni kiitettidaageetinne cimati, intte ishati, Anxxookiyan, Sooriyaninne Kilqqiyan deꞌiya inttessi hara biittaa ishatuyyo hagaa xaafoos: Siiqo ishatoo,
24 hegee nuuni yootidoba gidenna, shin nu giddoppe biida issi issi asati intteyyo yootidoban inttena* balettanawu malidi wayssidoogaa nuuni siyida;
25 nuuni naaꞌꞌu asata dooridi nu siiqo ishatu Barnnaabaasaaranne Phawuloosaara inttekko kiittanawu maayettida;
26 eti nu Godaa Yesuus Kiristtoosa sunttaa gishshawu banttana* yeggi bayida asata.
27 Hegaa gishshawu, ha yohota Yihudaynne Sillaaseekka intteyyo yootana mala, nuuni eta kiittida.
28 Ayssi giikko, geeshsha ayyaanay maaddin, nuuni ha koshshiyabatuppe harabaa inttena toossenna mala murttida:
29 eeqa misiletussi yarshshidobaappe, suuttaappe, sulettidabaappenne* pokkiya tuna nagaraappe* teqettidi deꞌite. Intte hageetuppe teqettidi deꞌikko, intteyyo hirattana. Saro deꞌite!”
30 Ha asati moysetti kiyidi Anxxookiya wodhdhidosona, yaatidi Yesuusa kaalliyageeta ubbata shiishshidi dabddaabbiya etawu immidosona.
31 Eti hegaa nabbabi simmidi, minttettiyabaa siyido gishshawu ufayttidosona.
32 Yihudaynne Sillaaseekka Xoossay erissidobaa yootiyageeta gidiyo gishshawu, darobaa yootidi ishata maaddidosonanne minttettidosona.
33 Eti amarida wodiya yan takki simmin, ishati eta saro gakkite giidi eta kiittidaageetukko moyssidosona.
34 ——
35 Shin Phawuloosinne Barnnaabaasi tamaarissiiddinne hara darotuura Yihoowa qaalaa mishiraachchuwa yootiiddi Anxxookiyan takkidosona.
36 Amarida gallassappe guyyiyan, Phawuloosi Barnnaabaasayyo, “Nuuni Yihoowa qaalaa yootido katamatu ubban deꞌiya ishatu hanotaa beꞌanawu ane haꞌꞌi* boos” yaagiis.
37 Barnnaabaasi Marqqoosa giyo Yohaannisa ekkidi baanawu murttiis.
38 Shin Marqqoosi Phinifiliyan etappe shaahettidi oosuwawu etaara bibeenna gishshawu, Phawuloosi banttanaara I baanaadan koyibeenna.
39 Yaanin, eti yiillotidi walaqettido gishshawu, issoy issuwappe shaahettidosona; qassi Barnnaabaasi Marqqoosa ekkidi markkabiyan Qophphiroosa biis.
40 Phawuloosi Sillaasa dooriis, qassi Yihooway laggetiyabi baynna ba kehatettaa bessanaadan ishati Phawuloosa awu sheedhdhi simmin, I yaappe biis.
41 I galchchata minttettiiddi Sooriya biittaaranne Kilqqiya biittaara aadhdhiis.
Footnotes
^ Woykko “palamaabaa.”
^ Woykko “daasiya; dunkkaaniya.”
^ Woykko “maacaas.”
^ Giriikettuwan, porniya.
^ Woykko “suuttaa xexxeefidi gussennan woridobaappenne.”
^ Woykko “intte shemppuwa.”
^ Woykko “bantta shemppuwa.”
^ Woykko “suuttaa xexxeefidi gussennan woridobaappenne.”
^ Giriikettuwan, porniya.
^ Woykko geella, “aynne hanidi.”
