Kiitettidaageetu Oosuwa 16:1-40
-
Phawuloosi Ximootiyosa dooriis (1-5)
-
Phawuloosi ajjuutan beꞌido Maqidooniya bitaniya (6-10)
-
Piliphisiyusan Lidiya Kiristtaane gidaasu (11-15)
-
Phawuloosinne Sillaasee qashettidosona (16-24)
-
Qasho keettaa naagiyageenne A so asay haattan muukettidosona (25-34)
-
Sunttati moorida gaanaadan Phawuloosi oychchiis (35-40)
16 Hegaa gishshawu, I Darbbe katamaanne Lisxxira katamaakka gakkiis, qassi Yesuusa kaalliya Ximootiyosa giyo, Ayhuda maccaasee naꞌay yan deꞌees; he maccaasiya Yesuusa kaalliya asa, shin A aaway Giriike asa,
2 qassi Ximootiyosi Lisxxiraaninne Iqooniyonen deꞌiya ishati loꞌꞌoban denttiyo asa.
3 Phawuloosi Ximootiyosa banaara efaanawu koyiyogaa yootiis; yaatidi he katamatu heeran deꞌiya Ayhudati ubbay A aaway Giriike asa gidiyogaa eriyo gishshawu, A qaxxariis.
4 Eti katamatuura aadhdhidi biyo wode, Yerusalaamen deꞌiya kiitettidaageetinne cimati maacidobaa naaganaadan ishatussi yootidosona.
5 Yaatin, galchchati ammanuwan minni minnidinne ubba galla dicci dicci biidosona.
6 Qassi Isiya moottan Xoossaa qaalaa yootennaadan geeshsha ayyaanay eta diggido gishshawu, eti Pirggiya biittaaranne Galaatiya biittaara aadhdhidosona.
7 Hegaa bollikka, eti Miisiya wodhdhido wode, Bitiniya baanawu malidosona, shin Yesuusa ayyaanay eti beennaadan diggiis.
8 Hegaa gishshawu, eti Miisiyara aadhdhidi Xiroꞌaada wodhdhidosona.
9 Qassi Maqidooniya bitane issoy A sinttan eqqidi, “Maqidooniya yaada nuna maadda” yaagidi A woossishin, Phawuloosi qammi ajjuutan beꞌiis.
10 Phawuloosi he ajjuutaa beꞌosaara, Maqidooniya asaassi mishiraachchuwa yootanaadan Xoossay nuussi yootidoogaa akeekidi yaa baanawu denddida.
11 Hegaa gishshawu, nuuni markkabiyan Xiroꞌaadappe denddidi eqqennan Saamootiraaqe gakkida, shin wonttetta gallassi Naaphphule biida;
12 qassi yaappe Maqidooniya biittaa waanna katamaa, Roome asatu katamaa Piliphphisiyusa biida. Nuuni he kataman amarida gallassaa takkida.
13 Sambbata gallassi katamaappe gaxan shaafaa matan, asay shiiqidi woossiyo sohoy deꞌees giidi nuuni qoppidosaa biida; yaatidi, yan uttidi shiiqida macca asatussi yootiyogaa doommida.
14 Qassi Xoossawu goynniya, alꞌꞌo maayuwa bayzziya Lidiyo giyo Tiyaxiroona katamaa maccaasiya he wode ezggawusu, qassi Phawuloosi yootiyobaa A siyanaadaaninne loytta ezgganaadan Yihooway O maaddiis.
15 Anne I soo asay haattan muukettido wode nuna A, “Intte tana Yihoowawu ammanettiya asadan xeellikko, hinddite ta son takkite” yaagaasu. Qassi A nuna mintta woossido gishshawu, iira biida.
16 Issi gallassi nuuni woosaa sohuwa biishin, daydanttay oyqqido, aylle naꞌiya nunaara gayttaasu. A sinttappe hananabaa yootana danddayiyo gishshawu, I godati hegan daro miishshaa demmoosona.
17 He naꞌiya Phawuloosanne nuna kaallada aggennan ixxaasu, qassi ba qaalaa xoqqu oottada, “Ha asati Ubbaappe Xoqqa Xoossaa aylleta, qassi eti intteyyo atotettaa ogiya yootoosona” yaagaasu.
18 A daro gallassi hegaadan gaasu. Wurssettan Phawuloosi salettidi guyye simmidi, he ayyaanaa, “Neeni ippe kiyanaadan nena Yesuus Kiristtoosa sunttan azazays” yaagiis. Yaagin sohuwara ippe kiyiis.
19 He naꞌee godati eti demmiyo miishshay attiichchidoogaa beꞌidi, Phawuloosanne Sillaasa oyqqidi goochchiiddi sunttatukko giyaa efiidosona.
20 Eta katamaa ayssiyageetukko efiidi, hagaadan giidosona: “Ha asati nu katamaa keehi shabbiroosona. Eti Ayhuda asa,
21 qassi nuuni Roome asa gidiyo gishshawu ekkana woy meezetana bessenna wogaa eti yootoosona.”
22 Yaanin, asay eta bolli issippe denddiisinne katamaa ayssiyageeti eta maayuwa daakkidi, eta gatiman shocana mala azazidosona.
23 Eta darotoo shoci simmidi qasho keettan yeggidosona, yaatidi qasho keettaa naagiyagee eta mintti naaganaadan azazidosona.
24 Eti A hegaadan azazido gishshawu, I eta giddo qasho keettan yeggidi eta gediya mittaara gattidi mintti qachchiis.
25 Shin qammaappe usuppun saate heeran, Phawuloosinne Sillaasee woossoosonanne yexxiiddi Xoossaa sabboosona, qassi qashettida hara asati hegaa siyoosona.
26 Biittay wolqqaama qaatta qaaxxi bayin, qasho keettay yeeqiyeeqiis. Hegaa bollikka, penggeti ubbay dooyetti bayidosona, qassi asaa ubbaa sanssalatay birshshettiis.
27 Naagiyagee xiskkuwappe denddiyo wode, qasho keettaa penggeti dooyettidoogaa beꞌidi, qashettida asay ubbay kessi ekkiichchiis gi qoppidi bana woranawu bisuwa shoddiis.
28 Shin Phawuloosi ba qaalaa xoqqu oottidi, “Nuuni ubbay hagan deꞌiyo gishshawu, ne shemppuwa woroppa” yaagiis.
29 Hegaa gishshawu, I xomppiya ehaanaadan oychchiisinne woxxiiddi giddo gelidi, kokkoriiddi Phawuloosanne Sillaase sinttan kunddiis.
30 I eta kare kessidi, “Ta godatoo, taani attanawu ay oottana bessii?” yaagiis.
31 Eti, “Godaa Yesuusa ammana, yaatikko neeni attana; qassi ne soo asaabaykka hegaadaana” yaagidosona.
32 Hegaappe simmin, eti assinne A son deꞌiyageetussi ubbaassi Yihoowa qaalaa yootidosona.
33 Qassi I qammi he saatiyan eta efiidi eta masunttaa meecciis. Hegaappe simmin, inne A soo asay ubbay sohuwara haattan muukettidosona.
34 I eta ba soo gelissidi qumaa eta sintti aattiisinne Xoossaa ammanido gishshawu keehi ufayttiis, qassi A soo asay ubbaykka keehi ufayttiis.
35 Saꞌay wonttin, katamaa ayssiyageeti xaaceta, “He asata birshshite” yaagidosona.
36 Qasho keettaa naagiyagee, “Katamaa ayssiyageeti inttena naaꞌꞌaa birshshanaadan asaa kiittidosona. Yaanido gishshawu, haꞌꞌi kiyite; qassi saro biite” yaagidi eta kiitaa Phawuloosawu yootiis.
37 Shin Phawuloosi etayyo hagaadan giis: “Akkay, eti yiidi nuna birshshana bessees! Nuuni Roome asata gidikkonne, aynne moorennan* eti nuna asaa sinttan shocidi qasho keettan yeggido gishshawu, asi erennan kessanawu koyoosona.”
38 Xaaceti Phawuloosi odidobaa katamaa ayssiyageetuyyo yootidosona. Katamaa ayssiyageeti eti Roome asata gidiyogaa siyidi yayyidosona.
39 Yaatin eti yiidi Phawuloosanne Sillaasa woossidosona, qassi eta birshshi simmidi, he katamaappe baanaadan oychchidosona.
40 Shin eti qasho keettaappe kiyidi Lidee soo biidosona; qassi eti ishata beꞌido wode, eta minttettidosona; yaatidi yaappe biidosona.
Footnotes
^ Woykko “Nuna aynne paaccennan.”
